រាជធានីភ្នំពេញ ៖ សេចក្តីរាយការណ៍ឱ្យដឹងថា កាលពីវេលាម៉ោង០២ និង៣០នាទីរសៀលថ្ងៃទី២១ កក្កដា ស្ថិតលើផ្លូវជាតិលេខ៤ (ខាងកើតអតីតបញ្ជរបង់ប្រាក់) ក្នុងភូមិត្រពាំងគល់ សង្កាត់កន្ទោក ខណ្ឌពោធិ៍សែនជ័យ បុរសមិនស្គាល់ឈ្មោះម្នាក់ តែត្រូវដឹងជាថា ជាអ្នករត់ម៉ូតូឌុប ត្រូវបានរថយន្តហ៊ីយ៉ាន់ដាយ១តោនកន្លះ មានដឹកអេតចាយបើកបុកស្លាប់យ៉ាងអាណោចអាធ័ម ។ ហើយរថយន្តបង្កនេះនៅមិនអស់ចិត្ត ក៏បន្តទៅបុកម៉ូតូ៣គ្រឿងទៀតចូលទៅក្នុងសាលាឯកជនមួយកន្លែង ដែលសំណាងធំហើយ សិស្សចូលរៀនក្នុងសាលាអស់ ។
សេចក្តីរាយការណ៍បន្តថា ជនរងគ្រោះដែលស្លាប់នេះ ត្រូវសមត្ថកិច្ចកំពុងស្រាវជ្រាវរកសាច់ញាតិ គាត់ជិះម៉ូតូសង់២០១០ ពណ៌ខ្មៅ អត់ស្លាកលេខ ។ រីឯអ្នកបើកបរបង្កឈ្មោះសន ចន អាយុ៣៩ឆ្នាំ ជាអ្នកដឹកអេតចាយ មានស្រុកកំណើតនៅខេត្តព្រៃវែង បច្ចុប្បន្នស្នាក់នៅភូមិបុរីកម្មករ ឃុំបែកចាន ខេត្តកណ្តាល ត្រូវសមត្ថកិច្ចឃាត់ខ្លួនភ្លាមៗ ។
បើតាមបុរសជាអ្នកបើកបររថយន្តនេះថា មុនពេលកើតហេតុ ខ្លួនកំពុងបើករថយន្តធ្វើដំណើរពីលិចទៅកើត លុះដល់ចំណុចខាងលើ ស្រាប់តែឃើញម៉ូតូដែលបើកដោយបុរសដែលស្លាប់នេះមកនៅពីមុខរថយន្តទៅវិញ ទើបខ្លួនទាញចង្កូតមិនទាន់ក៏បុកតែម្តង។
ទោះបីជាយ៉ាងណា សមត្ថកិច្ចកំពុងចុះអន្តរាគមន៍និងធ្វើការវាស់វែងហើយនៅកន្លែងកើតហេតុ ដើម្បីរកមូលហេតុច្បាស់ ។
ចែករំលែកព័តមាននេះ