រាជធានីភ្នំពេញ ៖ រថយន្តកុងតឺន័របើកគេចរថយន្តចតតាមផ្លូវ ចូលហូបបាយ បណ្តាលឲ្យរថយន្តយីឌុបបុក បណ្តាលឲ្យកៀបអ្នកបើករថយន្តកុងតឺន័រជាប់ក្នុងរថយន្តសន្លប់ស្តូកស្តឹង កាលពីវេលាម៉ោង០៧និង៣០នាទីយប់ ថ្ងៃទី២០ ខែកក្កដា ឆ្នាំ២០១៧ តាមបណ្តោយផ្លូវទំនប់កប់ស្រូវ ទុលមុខបូរីសិលា លក់បាយ និងកាហ្វេ ស្ថិតនៅភូមិត្រពាំងធ្ងង់ សង្កាត់សំរោងក្រោម ខណ្ឌពោធិ៍សែនជ័យ ។
រថយន្តបង្កប្រភេទយីឌុបម៉ាកហ៊ីយ៉ាន់ដាយ ពណ៌ស ពាក់ស្លាកលេខ ព្រហសីហនុ ៣A-០៩៦៤ បើកបរក្នុងទិសដៅពីត្បូងទៅជើងទៅជើង រងការខូចខាតតិចតួច តៃកុងរត់បាត់ ។ រថយន្តរងគ្រោះប្រភេទកុងតឺន័រម៉ាកហ៊ីណូ ពណ៌ស ពាក់ស្លាកលេខ ភ្នំពេញ ៣B-៦៦៣៣ បើកបរក្នុងទិសដៅពីជើងទៅត្បូង រថយន្តរងការខូចខាតធ្ងន់ អ្នកបើករថយន្តសន្លប់ ។
តាមប្រភពព័ត៌មានពីប្រជាពលរដ្ឋនៅកន្លែងកើតហេតុ បាននិយាយថា នៅមុនពេលកើតហេតុ រថយន្តកុងតឺន័រ បើកបរដោយបុរសម្នាក់ក្នុងទិសដៅពីជើងទៅត្បូង យ៉ាងលឿន លុះបើកមកដល់ចំណុចកើតហេតុ មានរថយន្តមួយគ្រឿងឈប់នៅតាមដងផ្លូវកំពង់ឈប់ហូបបាយ ធ្វើឲ្យរថយន្តកុងតឺន័រងាកចង្កូតទៅឆ្វេងបន្តិច ត្រូវរថយន្តយីឌុបបើកបញ្ច្រាសទិសគ្នា មកដល់បានបុកចំពីមុខពេញទំហឹងធ្វើឲ្យរថយន្តកុងតឺន័របែរក្បាលត្រលប់ក្រោយ កណ្តាលផ្លូវ ចំណែករថយន្តយីឌុបជ្រុលទៅកៀររថយន្តកុងតឺន័របន្ថែមទៀត បណ្តាលឲ្យអ្នកបើករថយន្តកុងតឺន័រកៀបជាប់ក្នុងរថយន្តសន្លប់ស្ដូកស្តឹង ចំណែកអ្នកបើករថយន្តយីឌុប មិនមានរងរបួសទេ បានចុះពីលើរថយន្ត ហើយរត់គេចខ្លួនបាត់ ។
ភ្លាមៗនោះដែរ ជនរងគ្រោះខាងរថយន្តកុងតឺន័រ ត្រូវបានប្រជាពលរដ្ឋលើកចេញពីរថយន្ត ហៅរថយន្តសង្គ្រោះដឹកយកទៅព្យាបាល ។ បើតាមប្រភពព័ត៌ពីកន្លែងកើតហេតុបាននិយាយថា ផ្លូវបេតុងទំនប់កប់ស្រូវ កំពុងតែស្ថាបនាបានមួយចំហៀង នៅសល់មួយចំហៀងទៀត មិនទាន់រួចរាល់ ធ្វើឲ្យមានការចង្អៀតក្នុងការធ្វើចរាចរណ៍ ម្យ៉ាងទៀតមានរថយន្តធុនធំជាច្រើនគ្រឿង បានចតនៅតាមបណ្តោយផ្លូវបេតុងចូលហូបបាយ ឬក៏ចតបូបប្រេងលក់ បានឈប់បន្តកន្ទុយគ្នាហូហែរ នៅតាមដងផ្លូវ ធ្វើឲ្យផ្លូវកាន់តែរួមតូច ពិបាកបើកបរ និងពិបាកបើកជៀសគ្នា បង្កឲ្យគ្រោះថ្នាក់ចរាចរណ៍ជា យថាហេតុ ។
ប្រជាពលរដ្ឋដែលបើកឆ្លងកាត់នៅតាមបណ្តោយផ្លូវខាងលើ សុំសំណូមពរដល់អភិបាលខណ្ឌពោធិ៍សែនជ័យ ចូលជួយសម្រួលចំពោះរថយន្តដែលចតនៅតាមដងផ្លូវ ទំនប់កប់ស្រូវខាងលើផង ព្រោះពិបាកធ្វើចរាចរណ៍ណាស់ ។
ក្រោយពេលកើត ជនរងគ្រោះខាងរថយន្តកុងតឺន័រ ត្រូវបានរថយន្តសង្គ្រោះរបស់សម្ភពរស្មី បានដឹកទៅសង្គ្រោះភ្លាមៗផងដែរ ចំណែករថយន្តរងគ្រោះ និងរថយន្តបង្ក ត្រូវបានជំនាញចរាចរណ៍ខណ្ឌពោធិ៍សែនជ័យ បានប្រគល់ឲ្យជំនាញខាងចរាចរណ៍រាជធានីភ្នំពេញ រងចាំការដោះស្រាយ ៕
ចែករំលែកព័តមាននេះ