ខេត្តសៀមរាប ៖ ក្រុមមន្ដ្រីបានអះអាងថា ក្នុងរយៈពេល៣ថ្ងៃនៃពិធីបុណ្យចូលឆ្នាំប្រពៃណីជាតិមានភ្ញៀវទេសចរជាតិ-អន្ដរជាតិប្រមាណជាង១សែននាក់ទៅទស្សនាប្រាសាទអង្គរវត្ដ និងរមណីយដ្ឋានធម្មជាតិនានាក្នុងខេត្ដសៀមរាប គឺមានការកើនឡើងបន្ដិចបន្ដួចបើប្រៀបទៅនឹងឆ្នាំទៅមិញ ប៉ុន្ដែករណីស្ទះចរាចរណ៍ និងគ្រោះថ្នាក់ផ្សេងៗបានថយចុះ។
ប្រធានមន្ទីរទេសចរណ៍ខេត្ដសៀមរាប លោកង៉ូវ សេងកាក់ ប្រាប់ថា នៅក្នុងរយៈពេល ៣ថ្ងៃនៃពិធីបុណ្យចូលឆ្នាំខ្មែរមានភ្ញៀវទេសចរជាតិ-អន្ដរជាតិចំនួន១១៨.១៤៤នាក់ ក្នុងនោះភ្ញៀវទេសចរជាតិមានចំនួន១០៨.៣២៥ គឺមានការកើនឡើងត្រឹមតែ២%ប៉ុណ្ណោះ បើប្រៀបទៅនឹងរយៈពេលដូចគ្នាកាលពីឆ្នាំទៅមិញ ដែលមានចំនួន១០៦.៧៤៥នាក់ ។ ភ្ញៀវទាំងនោះបានចូលមកខេត្ដសៀមរាបតាមផ្លូវបីសំខាន់ៗ រួមមានផ្លូវអន្លង់វែងភ្នំពេញ និងប៉ោយប៉ែត ។ ដោយឡែកសម្រាប់ភ្ញៀវទេសចរអន្ដរជាតិ វិញមានចំនួន៩.៨១៩នាក់ គឺមានការកើនឡើង ២១.៨០% បើប្រៀបទៅនឹងរយៈពេល៣ថ្ងៃដូចគ្នាកាលពីឆ្នាំទៅមិញដែលមានចំនួន៦៩១៦ នាក់ ហើយភ្ញៀវទាំងនោះចូលតាមផ្លូវគោក ចំនួន៣៨២០នាក់ តាមផ្លូវទឹក «បឹងទន្លេសាប» ៤១នាក់ និងជើងអាកាសចំនួន៥.៩៥៨នាក់ ។
លោកង៉ូវ សេងកាក់ បន្ថែមទៀតថាភ្ញៀវទេសចរជាតិ-អន្ដរជាតិទាំងនោះភាគច្រើនធ្វើដំណើរមកកាន់ខេត្ដសៀមរាបក្នុងបំណងទស្សនាប្រាង្គប្រាសាទអង្គរវត្ដដែលជារតនសម្បត្ដិមានតំលៃមហាសាលរបស់ជាតិខ្មែរ និងជាបេតិកភណ្ឌពិភពលោក ប៉ុន្ដែទន្ទឹមនោះពួកគេក៏ទៅមើលផងដែរ រមណីយដ្ឋានវប្បធម៌ធម្មជាតិមួយចំនួនទៀតដូចជារមណីយដ្ឋានភ្នំគូលែន រមណីយដ្ឋានតំបន់មាត់បឹង ទន្លេសាបចុងឃ្នៀស រមណីយដ្ឋានបារាយណ៍ទឹកថ្លា និងប្រាសាទបាគង។
លោកម៉ី ម៉ារាឌី អគ្គនាយករងអាជ្ញាធរអប្សរា នាយកដ្ឋានអភិវឌ្ឍន៍ទេសចរណ៍អង្គរបានថ្លែងថា មន្ដ្រីរបស់លោកនៅមិនទាន់បានបូកសរុបចំនួនភ្ញៀវទេសចរចូលទស្សនាក្នុងរមណីយដ្ឋានអង្គរនៅឡើយទេ ដូច្នេះនៅមិនទាន់ដឹងពិតប្រាកដពីចំនួនភ្ញៀវទេ ក៏ប៉ុន្ដែបើតាមការកត់សម្គាល់របស់លោកឃើញថា ឆ្នាំនេះមានភ្ញៀវច្រើនជាងឆ្នាំទៅមិញ ហើយសណ្ដាប់ធ្នាប់ចរាចរណ៍ក៏ប្រសើរជាងឆ្នាំមុនដែរ ពុំមានការស្ទះដូចមុនទេ។
នៅវេលាម៉ោង១ និង១៥នាទីថ្ងៃទី១៤ មេសា ឆ្នាំ២០១១ ត្រូវនឹងថ្ងៃបុណ្យចូលឆ្នាំថ្មីដំបូងគ្រប់ផ្ទះ រួមទាំងផ្ទះសំណាក់ សណា្ឋគារ និងភោជនីយដ្ឋាននានានៅក្នុងក្រុងទាំងមូលបានរៀបផ្លែឈើគ្រប់មុខ និងផ្កាភ្ញី ទៀនធូប និងភ្លើងចំរុះពណ៌ ដើម្បីទទួលទេវតាឆ្នាំថ្មី ។ ទន្ទឹមនោះ ក៏មានកម្មវិធីលេងល្បែងប្រជាប្រិយទៅតាមប្រពៃណីដូនតាផងដែរ ។ នៅពេលរាត្រីសំឡេងកាំជ្រួចបានបន្លឺឡើងជាមួយពន្លឺរស្មីយ៉ាងចិញ្ចែងចិញ្ចាចលើផ្ទៃអាកាស ។ នៅថ្ងៃជាបន្ដបន្ទាប់នៅតាមដងវិថីនានានៅក្នុងក្រុង និងផ្លូវឆ្ពោះទៅកាន់រមណីយដ្ឋានវប្បធម៌ប្រវត្ដិសាស្ដ្រអង្គរ និងរមណីយដ្ឋានតំបន់មាត់បឹងទន្លេសាបចុងឃ្នៀស រមណីយដ្ឋានភ្នំគូលែន និងផ្លូវទៅកាន់បារាយណ៍ទឹកថ្លា ម៉ូតូ និងរ៉ឺម៉កកងបី ព្រមទាំងរថយន្ដតូចធំគ្រប់ប្រភេទច្រើនកុះករនាំភ្ញៀវទេសចរទៅកាន់ទីកន្លែងកំសាន្ដ តាមការគ្រោងទុករបស់ពួកគេ។
ក្រុមមន្ដ្រីអះអាងថាបញ្ហាគ្រោះថ្នាក់ផ្សេងៗ ជាពិសេសគ្រោះថ្នាក់ចរាចរណ៍នៅលើដងផ្លូវហាក់ដូចជាល្អប្រសើរជាងឆ្នាំមុន ។ លោកង៉ូវ សេងកាក់ ប្រាប់ថា បើយោងតាមព័ត៌មានទទួលបានពីលោកស្នងការរងនគរបាលខេត្ដទទួលបន្ទុកសណ្ដាប់ធ្នាក់ថា ក្នុងរយៈពេលបីថ្ងៃនៃពិធីបុណ្យចូលឆ្នាំថ្មីមានអ្នកស្លាប់បាត់បង់ជីវិតតែ៣នាក់ប៉ុណ្ណោះ នៅទូទាំងខេត្ដ ក្នុងនោះម្នាក់ជាកុមារ ដោយសារលង់ទឹកនៅបារាយណ៍ កាលពីថ្ងៃទី១៥ មេសា និង២នាក់ទៀតស្លាប់ដោយសារគ្រោះថ្នាក់ចរាចរណ៍ម៉ូតូ បុកម៉ូតូ ។ ក្រៅពីនោះ នៅមានអ្នករបួសធ្ងន់ចំនួន៩នាក់ និងស្រាល៤នាក់៕
ចែករំលែកព័តមាននេះ