រាជធានីភ្នំពេញ៖ ក្រុមអ្នកតំណាងរាស្ត្រគណបក្សសង្គ្រោះជាតិបានថ្វាយលិខិតមួយច្បាប់ទៅព្រះមហាក្សត្រព្រះបាទសម្តេច ព្រះបរមនាថ នរោត្តមសីហមុនី សូមព្រះអង្គកុំឲ្យឡាយព្រះហសត្ថលេខាលើសេចក្តីស្នើវិសោធនកម្មច្បាប់ស្តីពីគណប្សនយោបាយ បន្ទាប់ពីព្រឹទ្ធសភា និងអនុរដ្ឋសភាអនុម័តកាលពីពេលថ្មីៗនេះ ។
យោងតាមលិខិតដែលកោះសន្តិភាពទទួលបានរបស់ក្រុមអ្នកតំណាងរាស្ត្រគណបក្សប្រឆាំងដែលបានដាក់ថ្វាយព្រះមហាក្សត្រកាលពីថ្ងៃទី១៩ ខែកក្កដា ឆ្នាំ២០១៧ បានអះអាងថា សេចក្តីស្នើវិសោធនកម្មច្បាប់ស្តីពីគណបក្សនយោបាយ មិនបានស្របតាមគោលការណ៍នីតិរដ្ឋ ហើយផ្ទុយពីគោលការណ៍ប្រជាធិបតេយ្យ សេរី ពហុបក្សដែលធានាដោយរដ្ឋធម្មនុញ្ញនៃព្រះរាជាណាចក្រកម្ពុជា ជាពិសេសនោះសេចក្តីស្នើច្បាប់នេះ មានចរិកនយោបាយ គាបសង្កត់លើសិទ្ធិបុគ្កល បំបែកបំបាក់ជាតិ និងគាបសង្កត់មកលើកគណបក្សនយោបាយក្នុងន័យកម្ចាត់កម្ចាយខ្មែរគ្នាឯង និងគាបសង្កត់គូប្រជែងនយោបាយតែប៉ុណ្ណោះ ហើយអាចបណ្តាលឲ្យការបោះឆ្នោតនាពេលខាងមុនមិនសេរី និងយុត្តិធម៌។
លិខិតរបស់ក្រុមអ្នកតំណាងរាស្ត្របក្សប្រឆាំងបញ្ជាក់ថា៖ «សេចក្តីច្បាប់ស្តីពីវិសោធនកម្មច្បាប់ស្តីពីគណបក្សនយោបាយនេះ បានដើរផ្ទុយពីព្រះរាជបំណងរបស់អតីតព្រះមហាក្សត្រព្រះករុណាព្រះនរោត្តម សីហនុ ព្រះបរមរតនកោដ្ឋ ព្រះបិតាឯករាជ្យ បង្រួបបង្រួមជាតិ ដែលចង់ឲ្យបង្រួបង្រួមគ្នា ដោះស្រាយបញ្ហារវាងខ្មែរនិងខ្មែរ ពិសេសព្រះរាជបន្ធូលព្រះអង្គ «ខ្មែររួមគ្នា ទើបខ្មែរខ្លាំង»។ មិនតែប៉ុណ្ណោះសេចក្តីស្នើច្បាប់នេះបានរំលោភបំពានទៅលើរដ្ឋធម្មនុញ្ញដែលជាច្បាប់កំពុងត្រង់មាត្រា ៣៥ វាក្យខណ្ឌទី១ ចែងថា «ប្រជាពលរដ្ឋខ្មែរទាំងពីរភេទ មានសិទ្ធិចូលរួមយ៉ាងសកម្មក្នុងជីវិតនយោបាយ សេដ្ឋកិច្ច សង្គមកិច្ច និងវប្បធម៌របស់ប្រទេសជាតិ»។
ទោះបីជាមានការអន្តរាគមន៍ទៅព្រះមហាក្សត្រយ៉ាងណាក្តីអ្នកសិក្សាស្រាវជ្រាវនាំគ្នាលើកឡើងថា ព្រះមហាក្សត្រមិនអាចជូយបានទេ។
លោក សុខ ទូច អនុប្រធានរាជបណ្ឌិតសភាកម្ពុជា បានលើកឡើងក្នុងវេទិការតុមូលកាលពីថ្ងៃទី១៩ កក្កដា ស្តីពីវិសោធនកម្មច្បាប់ស្តីពីគណបក្សនយោបាយមកពិភាក្សាបានកត់សំគាល់ថា ព្រះមហាក្សត្រនឹងមិនអាចជួយគណបក្សប្រឆាំងបានទេ។ លោកបានលើកឧទាហរណ៍នាពេលកន្លងមកថា នៅពេលព្រះមហាក្សត្រអវត្តមានពីក្នុងប្រទេសនោះ ប្រមុខរដ្ឋស្តីទី ដែលមានប្រធានព្រឹទ្ធសភា និងបន្តបន្ទាប់មកមានប្រធានរដ្ឋសភា និងអនុប្រធានជាដើម នឹងចុះហត្ថលេខាជំនួសព្រះអង្គ។
សូមជម្រាបសេចក្តីស្នើវិសោធនកម្ម ច្បាប់ស្តីពីគណបក្សនយោបាយ ត្រូវបានផ្តួចផ្តើមឡើងជាថ្មី ដោយក្រុមតំណាងរាស្ត្រគណបក្សប្រជាជនកម្ពុជា ចំនួន៤១រូបហើយត្រូវបានរដ្ឋសភា អនុម័ត កាលពីថ្ងៃទី១០ ខែកក្កដា ឆ្នាំ២០១៧ ព្រមទាំងត្រូវបានអនុម័តគាំទ្រទាំងស្រុង ដោយព្រឹទ្ធសភា កាលពីថ្ងៃទី១៨ ខែកក្កដា ឆ្នាំ២០១៧ ផងដែរ៕
ចែករំលែកព័តមាននេះ