ខេត្តបាត់ដំបង ៖ អ្នកបើកបររថយន្តដឹកដីដ៏ព្រហើនម្នាក់ ត្រូវបានកម្លាំងនគរបាលចរាចរណ៍ប្រចាំគោលដៅតាមស្ទាក់ក្របួច.កជាប់ភ្លាមៗ ក្រោយពីបើករថយន្តបុកអ្នកជិះម៉ូតូ០៣នាក់ ប្ដីប្រពន្ធនិងកូន បណ្ដាលឲ្យរងរបួសធ្ងន់ និងស្រាល ហើយព្យាយាមរត់គេចខ្លួនចោលរថយន្តពីកន្លែងកើតហេតុ កាលពីវេលាម៉ោងជាង១០ព្រឹកថ្ងៃទី២១ មករា នៅចំណុចខាងមុខសាលាខេត្តបាត់ដំបង។
សេចក្ដីរាយការណ៍បានឲ្យដឹងថា អ្នកបើកបររថយន្តនោះឈ្មោះ ប៊ុន ធី អាយុ៣១ឆ្នាំ មុខរបរបើករថយន្តដឹកដី រស់នៅភូមិវត្តគរ សង្កាត់វត្តគរ ក្រុងបាត់ដំបង។ ជននេះ បើករថយន្តដឹកដី ចង្កូតស្ដាំ ពាក់ស្លាកលេខ BB-1627 ។
សេចក្ដីរាយការណ៍ដដែលបានបញ្ជាក់ថា អ្នកបើករថយន្តដឹកដីរូបនេះ ត្រូវកម្លាំងនគរបាលចរាចរណ៍ប្រចាំគោលដៅ នៅជិតកន្លែងកើតហេតុ តាមស្ទាក់ចាប់បានភ្លាមៗ ពេលព្យាយាមរត់គេចខ្លួនមិនទទទួលខុសត្រូវចំពោះករណីគ្រោះថ្នាក់ចរាចរណ៍ ដែលខ្លួនបើករថយន្តបុកអ្នកជិះម៉ូតូ ពេលកំពុងធ្វើដំណើរស្របទិសគ្នា បណ្ដាលឲ្យរងរបួសចំនួន០៣នាក់ (ប្ដី ប្រពន្ធ និង កូនប្រុស)។
របាយការណ៍បឋមរបស់សមត្ថកិច្ចបានឲ្យដឹងថា ជនរងគ្រោះទាំង០៣នាក់ ឈ្មោះ លឿន ណាត អាយុ២៧ឆ្នាំ របួសបាក់ជើងស្ដាំ (ប្ដី) ចំណែកប្រពន្ធ និងកូនប្រុសតូច គេមិនទាន់ស្គាល់ឈ្មោះទេ តែរងរបួសស្រាល ។ បើតាមសាក្សីបានផ្ដល់ព័ត៌មានបឋមថា អ្នកបើករថយន្តដឹកដីនោះ ហាក់មិនបានបន្ថយល្បឿនទេ ពេលបើកមកដល់ចំណុចផ្លូវប្រសព្វ នៅខាងមុខសាលាខេត្ត។ រថយន្តនេះ បានបុកអ្នកជិះម៉ូតូពីក្រោយ ពេលកំពុងព្យាយាមបត់ឆ្លងស្ពានខាងមុខសាលាខេត្តដូចគ្នា។
សាក្សីបានប្រាប់ថា ពេលនោះ គេឃើញអ្នកជិះទាំង០៣នាក់ ឪពុក ម្ដាយ និង កូនប្រុសតូច និង ម៉ូតូរបស់គាត់ ស្ថិតនៅក្រោមរថយន្ត ព្រោះត្រូវរថយន្តបុកសង្កត់ជាប់។ ភ្លាមៗ គេឃើញអ្នកដំណើរនិងសមត្ថកិច្ចព្យាយាមជួយទាញពួកគាត់ទាំង០៣នាក់ចេញពីក្រោមក្បាលរថយន្ត ខណៈអ្នកបើកបររថយន្តដ៏ចម្លើយនោះ បានបើកទ្វាររថយន្តចុះរត់គេចខ្លួន មិនទទូលខុសត្រូវ តែត្រូវបានកម្លាំងនគរបាលចរាចរណ៏ប្រចាំគោលដៅនៅក្បែរនោះតាមស្ទាក់ក្របួចកជាប់ភ្លាមៗដែរ។
សមត្ថកិច្ចបានបញ្ជាក់ដែរថា អ្នកបើករថយន្តបង្កហេតុ ត្រូវបានចាប់វាយខ្នោះ ក្រៀកឡើងម៉ូតូបញ្ជុនទៅកាន់ការិយាល័យចរាចរណ៏ភ្លាមៗ ជាមួយនឹងរថយន្តដឹកដីក្រោយពីធ្វើការវាស់វែងនៅកន្លែងកើតហេតុ រីឯជនរងគ្រោះ ត្រូវបានបញ្ជូនទៅកាន់មន្ទីរពេទ្យ ៕
ចែករំលែកព័តមាននេះ