ខេត្តឧត្តរមានជ័យ ៖ ឧត្តមសេនីយ៍ត្រី ឡឹក សុខា ស្នងការរងខេត្តឧត្តរមានជ័យបានដឹកនាំកម្លាំងចុះអនុវត្តដីកា ឱ្យចូលខ្លួនដែលជាប់ពាក់ព័ន្ធពីបទលួចម៉ូតូ៣ករណីត្រូវបានឃាត់ខ្លួនបាន៣នាក់ ស្រាប់តែប៉ះចំមនុស្សប្រុសស្រី៤នាក់ទៀតកំពុងតែប្រើប្រាស់នូវសារធាតុញៀន ត្រូវបានធ្វើការឃាត់ខ្លួនបន្តកាលពីវេលាម៉ោង២ និង៣០នាទីរសៀល ថ្ងៃទី១៩ កក្កដា ២០១៧។ ហេតុការណ៍ដែលចុះអនុវត្តដីកាបញ្ជាឱ្យចូលខ្លួនរបស់លោក គង់ រតនា តំណាងអយ្យការអមសាលាដំបូងខេត្តឧត្តរមានជ័យនេះ ធ្វើឡើងនៅក្នុងស្រុកអន្លង់វែង ខេត្តឧត្តរមានជ័យ។
ជនដែលសមត្ថកិច្ចធ្វើការឃាត់ខ្លួនទាំង៧នាក់មាន ទី១.ឈ្មោះ សោម សីហា ភេទប្រុស អាយុ១៥ឆ្នាំ រស់នៅភូមិអូរជីក ឃុំអន្លង់វែង ស្រុកអន្លង់វែងទី២.ឈ្មោះ ហាង មេងគ័ង ភេទប្រុស អាយុ២១ឆ្នាំ រស់នៅភូមិអូរក្រូច ឃុំត្រពាំងប្រាសាទ ស្រុកត្រពាំងប្រាសាទ ទី៣.ឈ្មោះ អែម ហ៊ីប ហៅហ៊ីង ភេទប្រុស អាយុ២៦ឆ្នាំ រស់នៅភូមិជាំ ឃុំត្រពាំងប្រីយ៍ ស្រុកអន្លង់វែង ទាំង៣នាក់នេះមានដីកាជាប់ពាក់ព័ន្ធនឹងករណីលួចម៉ូតូនៅក្នុងភូមិជាំ ឃុំត្រពាំងប្រីយ៍ ស្រុកអន្លង់វែង ដកហូតបានម៉ូតូចំនួន២គ្រឿង។ ដោយឡែក៤នាក់ ស្រីម្នាក់ម្នាក់ឈ្មោះ នី ស្រីនាងភេទស្រី អាយុ២២ឆ្នាំ រស់នៅភូមិអូរញ ឃុំភ្នំធំ ស្រុកមង្គលបូរី ខេត្តបន្ទាយមានជ័យ ២.ឈ្មោះ គង់ វណ្ណៈភេទប្រុស អាយុ២៥ឆ្នាំ រស់នៅភូមិទំនប់ថ្មី ឃុំត្រពាំងតាវ ស្រុកអន្លង់វែង ៣.ឈ្មោះ យាន ដេត ភេទប្រុស អាយុ១៧ឆ្នាំ រស់នៅភូមិទំនប់ថ្មី ឃុំត្រពាំងតាវ ស្រុកអន្លង់វែង និង៤.ឈ្មោះ ប៊ី កាលី ភេទប្រុសអាយុ២០ឆ្នាំ រស់នៅភូមិពរពេល ឃុំផ្អាវ ស្រុកត្រពាំងប្រាសាទ ខេត្តឧត្តរមានជ័យ ទាំង៤នាក់នេះជាប់ពាក់ព័ន្ធការប្រើប្រាសនូវសារធាតុញៀន។
ឧត្តមសេនីយ៍ត្រី ឡឹក សុខា ស្នងការង នៃស្នងការដ្ឋាននគរបាលខេត្តឧត្តរមានជ័យ បានឱ្យដឹងថា ប៉ូលីសបានចុះអនុវត្តដីកាអមសាលាដំបូងខេត្ត ជំហានដំបូងបានជួបមុខសញ្ញាក្រុមចោរលួចម៉ូតូចំនួន៣នាក់ធ្វើការឃាត់ខ្លួន។ បន្ទាប់មកស្រាប់តែបានជួបប្រទះនឹងក្រុមសេពគ្រឿងញៀន ប៉ូលីសបានធ្វើការបង្ក្រាប់មួយករណីទៀតដកហូតវត្ថុតាងបានថ្នាំញៀនប្រភេទយ៉ាម៉ាចំនួន១គ្រាប់ ម៉ាទឹកកកចំនួន១កញ្ចប់ ម៉ូតូមួយគ្រឿង ទូរស័ព្ទដៃចំនួន៥គ្រឿង និងប្រដាប់សេពគ្រឿងញៀនមួយឈុត។ ឧត្តមសេនីយ៍ត្រីបានបន្តថា ជនទាំង៧នាក់នេះ ក្រោយពីបានធ្វើការសាកសួររួចសមត្ថកិច្ចនឹងកសាងសំណុំរឿងបញ្ជូនខ្លួនទៅតុលាការសាលាដំបូងខេត្តចាត់ការតាមនីតិវិធី៕
ចែករំលែកព័តមាននេះ