ប្រគល់ផ្ទះមួយខ្នងជូនអតីតយុទ្ធជនពិការកាលពីសម័យសង្គ្រាមទសវត្សឆ្នាំ80
ខេត្តពោធិ៍សាត់ ៖ ផ្ទះមួយខ្នងទំហំ៥ម៉ែត្រគុណនឹង៨ម៉ែត្រធ្វើអំពីថ្ម ប្រក់ស័ង្កសី មានបន្ទប់ទឹក
ខេត្តពោធិ៍សាត់ ៖ ផ្ទះមួយខ្នងទំហំ៥ម៉ែត្រគុណនឹង៨ម៉ែត្រធ្វើអំពីថ្ម ប្រក់ស័ង្កសី មានបន្ទប់ទឹក និងបំពាក់ដោយសម្ភារប្រើប្រាស់មួយចំនួនទៀតដែលទើបសាងសង់រួចជាអំណោយរបស់សម្ដេចអគ្គមហាសេនាបតីតេជោ ហ៊ុន សែន និងសម្ដេចកិត្តិព្រឹទ្ធិបណ្ឌិត បានត្រូវលោក ម៉ៅ ធនិន អភិបាលនៃគណៈអភិបាលខេត្តពោធិ៍សាត់ និងជាប្រធានកិត្តិយសសមាគមអតីតយុទ្ធជនកម្ពុជាខេត្តធ្វើពិធីប្រគល់ជូនដល់អតីតយុទ្ធជនឈ្មោះ ចាន់ ប៊ុនថន ភេទប្រុស អាយុ៦១ឆ្នាំ រស់នៅភូមិក្ដីស្នួល ឃុំត្រពាំងជង ស្រុកបាកាន កាលពីថ្ងៃទី១៨ ខែកក្កដា ឆ្នាំ២០១៧ ។
លោក ចាន់ ប៊ុនថនជាជនពិការជើងទាំងពីរដោយសារជាន់មីនកាលពីសម័យសង្គ្រាមនាទសវត្សឆ្នាំ៨០ ហើយសព្វថ្ងៃនេះមានប្រពន្ធឈ្មោះ ផៃ អិត អាយុ៥៥ឆ្នាំ និងកូនចំនួន៥នាក់ រស់នៅក្នុងបន្ទុកស្ថិតក្នុងជីវភាពក្រីក្រលំបាក ។
ក្នុងនាមថ្នាក់ដឹកនាំខេត្ត និងក្នុងនាមប្រធានកិត្តិយសសមាគមអតីតយុទ្ធជនកម្ពុជាខេត្តលោក បានពាំនាំនូវការផ្តាំផ្ញើសួរសុខទុក្ខពីសំណាក់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ជូនដល់យុទ្ធជនពិការ និងក្រុមគ្រួសារទាំងអស់ ដែលបានបូជាកម្លាំងកាយចិត្ត សាច់ស្រស់ឈាមស្រស់ និងអាយុជីវិតក្នុងការការពារបូរណភាពទឹកដីជូនជាតិមាតុភូមិ និងប្រជាពលរដ្ឋ ។ ក្នុងឱកាសនោះដែរលោក ម៉ៅ ធនិន បានចែកជូននូវសារុងម្នាក់មួយដល់ក្រុមគ្រួសារអតីតយុទ្ធជន និងប្រជាពលរដ្ឋដែលមកចូលរួមជាង៧០នាក់ ។ បន្ទាប់មកលោកអភិបាលខេត្ត និងប្រតិភូអមដំណើរទាំងអស់ក៏បានចុះទៅពិនិត្យការទិញដីពង្រីកបរិវេណសាលាបឋមសិក្សាក្តីស្នួល ព្រមទាំងបានផ្តល់នូវអនុសាសន៍ល្អៗមួយចំនួនសម្រាប់ការបើកផ្លូវថ្មីចូលសាលា និងបានបន្តចុះទៅសំណេះសំណាលសួរសុខទុក្ខជាមួយបងប្អូនអាជីវករដែកកំពុងលក់ដូរនៅផ្សារតាលោផងដែរ ៕
ចែករំលែកព័តមាននេះ