ពិភពលោកជម្រុញកម្ពុជា ដាំដើមឈើឲ្យបានច្រើន
ខេត្តកំពង់ចាម ៖ «បណ្តាប្រទេសនៅលើពិភពលោកមួយចំនួន បានជំរុញឲ្យប្រទេសកម្ពុជាបន្តថែរក្សាព្រៃឈើ និងការដាំដុះបន្ថែមទៀតឲ្យបានច្រើន
ខេត្តកំពង់ចាម ៖ «បណ្តាប្រទេសនៅលើពិភពលោកមួយចំនួន បានជំរុញឲ្យប្រទេសកម្ពុជាបន្តថែរក្សាព្រៃឈើ និងការដាំដុះបន្ថែមទៀតឲ្យបានច្រើន សម្រាប់បង្កើតនូវឧស្ម័នកាបូនិកកាន់តែច្រើនសាយភាយទៅលើលំហអាកាស សម្រាប់កាត់បន្ថយកំដៅព្រះអាទិត្យមកលើភពផែនដី» នេះជាការលើកឡើងរបស់លោក គួច ចំរើន អភិបាលនៃគណៈអភិបាលខេត្ត បានថែ្លងនៅក្នុងពិធីបុណ្យរុក្ខទិវានៅសាលាបឋមសិក្សាស្គន់ ក្នុងភូមិតាសែន ឃុំសូទិព្វ ស្រុកជើងព្រៃ នាព្រឹកថ្ងៃទី១៨ កក្កដា ២០១៧ ដោយមានការចូលរួមពីលោក ខ្លូត ផន ប្រធានក្រុមប្រឹក្សាខេត្ត រួមទាំងសិស្សានុសិស្ស លោកគ្រូអ្នកគ្រូ ប្រជាពលរដ្ឋមន្ត្រីរាជការរាប់រយនាក់បានចូលរួមផងដែរ។ លោក គឹម សាវឿន ប្រធានមន្ទីរកសិកម្មរុក្ខាប្រមាញ់ និងនេសាទបានថ្លែងថា ក្នុងសកម្មភាពបន្តវេន នៃវប្បធម៌ដាំដើមឈើដ៏ល្អប្រពៃនេះគិតពីឆ្នាំ១៩៩០ដល់ឆ្នាំ២០១៧ នៅក្នុងខេត្តកំពង់ចាម បានប្រារព្ធពិធីបុណ្យរុក្ខទិវាចំនួន២៣លើករួចមកហើយ ដោយបានដាំកូនឈើចម្រុះប្រភេទបានចំនួន៥៤ហិកតា ក្នុងនោះ១លើកដាំក្នុងពិធីបុណ្យរុក្ខទិវាថ្នាក់ជាតិនៅរមណីដ្ឋានទឹកឆា ស្រុកព្រៃឈរ ក្រោមព្រះរាជអធិបតីភាពដ៏ខ្ពង់ខ្ពស់របស់សម្តេចព្រះមហាក្សត្រីព្រះវររាជមាតាជាតិខ្មែរ ។
លោក គឹម សាវឿន ប្រធានមន្ទីរកសិកម្មខេត្តបន្តថា បន្ថែមលើសពីនេះទៀត ក្រោមការដឹកនាំចង្អុលបង្ហាញរបស់ថ្នាក់ដឹកនាំខេត្តកំពង់ចាម មកដល់ពេលនេះខណ្ឌរដ្ឋបាលព្រៃឈើកំពង់ចាម បានបង្កើតសួនដាំឈើអនុស្សាវរីយ៍ និងសួនអាពាហ៍ពិពាហ៍បានចំនួន២កន្លែង ក្នុងនោះ១កន្លែងនៅភូមថ្មី ឃុំក្រូចស្រុកព្រៃឈរ និងមួយកន្លែងទៀតនៅក្នុងវត្តនគរបាជ័យក្រៅ ក្នុងស្រុកកំពង់សៀម សម្រាប់ផ្តល់ដល់ថ្នាក់ដឹកនាំ និងជាឱកាសជូនដល់គូរស្រករថ្មី ដាំដើមឈើទុកជាអនុស្សាវរីយ៍។ ដោយឡែកសម្រាប់ឆ្នាំ២០១៧ ខណ្ឌរដ្ឋបាលព្រៃឈើកំពង់ចាម មានថ្នាលធំបណ្តុះកូនឈើចំនួន០៤កន្លែងមាន ១-សួនបណ្តុះកូនឈើលោក ហ៊ុន ណេង ភ្នំប្រុស ២-សួនបណ្តុះកូនឈើសម្តេចតេជោហ៊ុន សែន ព្រៃកុង(ស្គន់) ៣-ថ្នាលបណ្តុះកូនឈើឧបនាយករដ្ឋមន្ត្រី យឹម ឆៃលី ៤-សួនបណ្តុះកូនឈើទឹកឆា។ ជាមួយនោះបានចែកកូនឈើចម្រុះប្រភេទដល់ប្រជាពលរដ្ឋបានចំនួន១៩២.៦២៨ដើម ហើយក្នុងកម្មវិធីនេះផ្ទាល់នៅសាលាបឋមសិក្សាស្គន់ មានកូនឈើចំនួន១.៥០០ដើម ជាប្រភេទគ្រញូង និងកូនឈើចែកជូនសិស្ស អង្គភាពសាលារៀន ប្រជាពលរដ្ឋយកទៅដាំតាមផ្ទះមានចំនួន៣.០០០ដើម មានបេង គ្រញូង គគីរ ស្វាយហូបផ្លែ ស្តៅ រំដួល ទៀប មៀន សោប។
បន្ទាប់មកលោក គួច ចំរើន អភិបាលនាំគណៈអភិបាលខេត្ត មានប្រសាសន៍ឲ្យដឹងដែរថា នៅខេត្តកំពង់ចាមត្រូវបានជ្រើសរើសយកថ្ងៃទី១៨ កក្កដា ២០១៧ ជាថ្ងៃទិវាបុណ្យរុក្ខទិវាដោយបានធ្វើឡើងនៅសាលាបឋមសិក្សាស្គន់ ស្រុកជើងព្រៃ ដែលទិវានេះពិតជាមានសារសំខាន់ណាស់។ ដោយកម្ពុជាប្រកាន់យកនូវទិវានេះជាច្រើនឆ្នាំមកហើយ តាំងពីអតីតព្រះមហាក្សត្រ ព្រះបរមរតនៈកោដ្ឋម្លេះ។ ដែលព្រះរាជពិធីដាំកូនឈើត្រូវបានធ្វើបន្តបន្ទាប់រាល់ឆ្នាំ សំដៅធ្វើយ៉ាងណាឲ្យមានការដាំដុះព្រៃឈើមានការរីកដុះដាលឡើងវិញសម្រាប់បង្កើតជាគំរបបៃតងដ៏មានសារសំខាន់។ លោក គួច ចំរើន អភិបាលនៃគណៈអភិបាលខេត្ត ថ្លែងបន្តថា ក្រោមការដឹកនាំរបស់សម្តេចតេជោសែន នាយករដ្ឋមន្ត្រីនៃព្រះរាជាណាចក្រកម្ពុជា ក៏បានរៀបចំឲ្យតាមបណ្តាខេត្តរាជធានីនីមួយៗត្រូវតែរៀបចំបុណ្យរុក្ខទិវានេះដែលតាមថ្ងៃខុសៗគ្នាផងដែរ។ នៅកន្លែងខ្លះក៏បានតម្រូវឲ្យភ្ញៀវទេសចរណ៍ដាំកូនឈើក្នុងម្នាក់១ដើម សម្រាប់ជាប្រយោជន៍ដ៏សំខាន់ក្នុងថ្ងៃអនាគត និងបង្កើតឲ្យមានគំរបបៃតង និងមានឧស្ម័នកាបូនិកសាយភាយទៅលើលំហអាកាស។
លោកថានៅប្រទេសដទៃទៀតលើពិភពលោកគេកាប់ព្រៃឈើអស់ ហើយក៏បានជំរុញឲ្យកម្ពុជាយើងបន្តដាំព្រៃឈើបន្ថែមទៀត ឲ្យបានច្រើនសម្រាប់បង្កើតឲ្យមានឧស្ម័នកាបូនិក ភាយទៅលើអាកាសដើម្បីកាត់បន្ថយការកើនកំដៅផែនដី ដែលទទួលបានប្រាក់ចំណូលជាច្រើនផងដែរ។ កន្លងទៅថ្មីៗនេះប្រាសាទសំបូរព្រៃគុក ក្នុងខេត្តកំពង់ធំ ត្រូវបានដាក់បញ្ជូលជាសម្បត្តិបេតិកភណ្ឌពិភពលោក ដែលសម្តេចតេជោសែន ធ្វើជាអធិបតីនៅស្តាតអូឡាំពិកដោយមានពលរដ្ឋបានចូលរួមជាច្រើនកុះករផងដែរ។ រូបលោកធ្លាប់បានទៅដល់ប្រាសាទព្រៃគុកហើយក៏សំបូរទៅដោយព្រៃឈើ ថ្ងៃអនាគតភ្ញៀវទេសចរណ៍ជាតិ និងអន្តរជាតិទៅលេងកម្សាន្ត និងបានបង្កើនប្រាក់ចំណូលដល់ប្រជាពលរដ្ឋនៅខេត្តកំពង់ធំ តាមរយៈការស្នាក់នៅសណ្ឋាគារ និងការចាយវាយលើសេវាផ្សេងៗជាដើម៕
ចែករំលែកព័តមាននេះ