ឃាត់ខ្លួនជនសង្ស័យ៣នាក់ តាមដីកាផ្សេងគ្នាក្នុងថ្ងៃតែមួយ
ខេត្តសៀមរាប ៖ កម្លាំងការិយាល័យនគរបាលព្រហ្មទណ្ឌកម្រិតស្រាល ចំណុះផែនព្រហ្មទណ្ឌ ដឹកនាំដោយលោកវរសេនីយឯក ភឹង ចិន្តារ៉េត ស្នងការង
ខេត្តសៀមរាប ៖ កម្លាំងការិយាល័យនគរបាលព្រហ្មទណ្ឌកម្រិតស្រាល ចំណុះផែនព្រហ្មទណ្ឌ ដឹកនាំដោយលោកវរសេនីយឯក ភឹង ចិន្តារ៉េត ស្នងការង និងជាប្រធានការិយាល័យកណ្តាលព្រហ្មទណ្ឌខេត្តសៀមរាប បានឱ្យកម្លាំងជំនាញបែងចែកកម្លាំងជាក្រុម ដើម្បីចុះតាមបណ្ដាក្រុង ស្រុក និងប៉ុស្ដិ៍រដ្ឋបាល ជាពិសេសកម្លាំងបានចុះទៅដល់ផ្ទះមុខសញ្ញាតែម្ដង ដើម្បីស្រាវជ្រាវរុករកចាប់ខ្លួនមុខសញ្ញា តាមដីកា ដែលមាន៣ទីតាំងផ្សេងគ្នា ក្នុងថ្ងៃតែមួយគឺ តាំងពីវេលាម៉ោង៦ព្រឹក រហូតដល់ម៉ោងម៉ោង៣រសៀល ថ្ងៃទី១៨ ខែកក្កដា ឆ្នាំ២០១៧ ដែលទីតាំងទី១-ស្ថិតក្នុងក្រុងសៀមរាប ទីតាំងទី២-ស្ថិតនៅភូមិធ្នង់ ឃុំចាឈូក ស្រុកអង្គរជុំ និងទីតាំងទី ៣-ស្ថិតនៅស្រុកបន្ទាយស្រី រហូតឈានដល់ឃាត់ខ្លួនបានជនសង្ស័យ៣នាក់ រួចយកមកសួរនាំនៅការិយាល័យជំនាញ។
លោកវរសេនីយឯក ភឹង ចិន្តារ៉េត ស្នងការង និងជាប្រធានការិយាល័យកណ្តាលព្រហ្មទណ្ឌខេត្តសៀមរាប បានប្រាប់ឱ្យដឹងថា ដោយអនុវត្តតាមដីការបស់តុលាការខេត្តសៀមរាប ទើបលោកបានឱ្យកម្លាំងក្រោមឱវាទ អនុវត្តផែនការនេះតាមស្រុក/ក្រុង ជាបន្តបន្ទាប់ទៀត មាន៥ទិសដៅ ដើម្បីដាក់កម្លាំងតាមគោលដៅល្បាតពួនស្ទាក់ នៅទូទាំងខេត្ត និងដាក់កម្លាំងការពារគោលដៅក្នុងតំបន់ ផាប់ស្ទ្រីត កម្លាំងការិយាល័យព្រហ្មទណ្ឌ នគរបាលកម្រិតស្រាលនៃស្នងការដ្ឋាននគរបាលខេត្តសៀមរាប។ លោកបានបន្តថា ក្រុមការងារបានសហការណ៍គ្នាចុះដល់ផ្ទះមុខសញ្ញាអនុវត្តដីកាបានឃាត់ខ្លួនចំនួន៣នាក់ ទី១.ឈ្មោះ ប្រុញ ប្រេម ភេទប្រុស អាយុ២៨ឆ្នាំ ជនជាតិខ្មែរ មុខរបរមិនពិតប្រាកដ មានទីលំនៅបច្ចុប្បន្ននៅភូមិវាល សង្កាត់ជ្រាវ ក្រុង/ខេត្តសៀមរាប ចាប់តាមដីកាលេខ២៩៤ ចុះថ្ងៃទី០៥/៨/២០១១ ចេញដោយ អឿង វណ្ណា ចៅក្រមស៊ើបសួរនៃសាលាដំបូងខេត្តសៀមរាប ពីបទប៉ុនប៉ងមនុស្សឃាតដោយចេតនា ប្រព្រឹត្តនៅភូមិវាល សង្កាត់ជ្រាវ ក្រុង/ខេត្តសៀមរាប កាលពីថ្ងៃទី១១ ខែកញ្ញា ឆ្នាំ២០១០។
ទី២.ឈ្មោះ សយ សាលី ភេទប្រុស អាយុ២៨ឆ្នាំ ជនជាតិខ្មែរ មុខរបរជាងកាត់ដេរ ទីលំនៅបច្ចុប្បន្ននៅភូមិតាចេក សង្កាត់ជ្រាវ ក្រុង/ខេត្តសៀមរា ចាប់តាមដីកាលេខ០០៦ ចុះថ្ងៃទី១៣/០១/២០១៥ ចេញដោយ កូយ សៅ ចៅក្រមស៊ើបសួរនៃសាលាដំបូងខេត្តសៀមរាប ពីបទហិង្សាចេតនាដោយមានស្ថានទម្ងន់ទោស ប្រព្រឹត្តនៅភូមិគោកធ្លក ឃុំកណ្តែក ស្រុកប្រាសាទបាគង ខេត្តសៀមរា កាលពីថ្ងៃទី២៤ ខែមករា ឆ្នាំ២០១៤ និងទី៣.ឈ្មោះ សេង ប៊ុនណិត ភេទប្រុស អាយុ ៣៤ឆ្នាំ ភូមិបន្ទាយស្រី ឃុំខ្នារសណ្តាយ ស្រុកបន្ទាយស្រី ខេត្តសៀមរាបអនុវត្តតាមដីកាលេខ២១ ចុះថ្ងៃទី០៧ ខែកុម្ភៈ ឆ្នាំ២០១១ ពី បទបង្ករបួសស្នាមដោយចេតនាប្រព្រឹត្តនៅ បន្ទាយស្រី ឃុំខ្នារសណ្តាយ ស្រុកបន្ទាយ ស្រី ខេត្តសៀមរាប កាលពីថ្ងៃទី១៩ ធ្នូ ២០០៨ ចេញដោយលោក អ៊ិត សម្ផស្ស ចៅក្រមស៊ើបសួរនៃសាលាដំបូងខេត្តសៀមរាប។ បច្ចុប្បន្នជនសង្ស័យទាំង៣នាក់ ដែលតាមចាប់ដីកានោះត្រូវបានកម្លាំងជំនាញ កំពុងរៀបចំកសាងសំណុំរឿងបញ្ជូនទៅតុលាការខេត្តសៀមរាប នៅរសៀលថ្ងៃទី១៨ ខែកក្កដា ឆ្នាំ២០១៧ ដើម្បីចាត់ការទៅតាមផ្លូវច្បាប់៕
ចែករំលែកព័តមាននេះ