ខេត្តកំពង់ឆ្នាំង ៖ ប្រជាពលរដ្ឋជាច្រើនគ្រួសារដែលមានទីលំនៅក្នុងភូមិត្រពាំងចិក្សា សង្កាត់កំពង់ឆ្នាំង ក្រុងកំពង់ឆ្នាំង បានប្រឈមមុខនឹងបញ្ហាបរិស្ថាន ព្រោះតែរយៈពេលជិត៣ឆ្នាំកន្លងទៅនេះរោងចក្រផលិតទឹកកកមួយបង្ហូរកាកសំណល់ជះក្លិនអាក្រក់ពិបាកទ្រាំ និងធ្វើឱ្យប៉ះពាល់ដល់សត្វពាហនៈ និងទឹកអណ្តូងប្រើប្រាស់ផងដែរ។ ដោយអស់ជំនឿលើការដោះស្រាយរបស់មន្ត្រីជំនាញផ្នែកបរិស្ថានទើបកាលពីថ្ងៃទី១១ មេសា ពួកគាត់បានហៅក្រុមអ្នកសារព័ត៌មានឱ្យទៅជួយពិនិត្យមើលខាងក្រោយរោងចក្រទឹកកកដែលកំពុងបង្ហូរកាកសំណល់ដែលមានក្លិនអាក្រក់ពិបាកទ្រាំ ។
នៅជាប់របងថ្មខាងក្រោយរោងចក្រមានបំពង់បង្ហូរទឹកតូចធំយ៉ាងច្រើន ប៉ុន្តែមានបំពង់ទឹកតែ២ទេដែលមានទំហំប្រហែល១ទឹកកន្លះបង្ហូរទឹកអាក្រក់ចេញធ្លាក់ចូលកូនស្រះទឹកតូចមួយដែលមានទឹកមិនល្អនេះពេញប្រៀប។ ទឹកនេះបានហៀរចេញពីមាត់ស្រះកាត់តាមកូនប្រឡាយតូចៗ២ទៅ៣ហូរកាត់ដីភូមិប្រជាពលរដ្ឋដែលនៅក្បែរនោះមានចំងាយប្រមាណ២ទៅ៣រយម៉ែត្រទើបធ្លាក់មកចូលប្រឡាយធំមួយទៀតដែលនៅតាមផ្លូវលំក្នុងភូមិ។
ប្រជាពលរដ្ឋនិយាយថា ទឹកអណ្តូងរបស់គាត់បានប្រែទៅជាមានរសជាតិប្រៃប្រើពុំកើតទេ។ ចំណែកអ្នកខ្លះទៀតនិយាយថា សត្វគោរបស់គាត់ឱ្យតែផឹកទឹកដែលហូរចេញពីរោងចក្រនេះវានឹងរាគភ្លាម ដោយគាត់ត្រូវបង្ខំចិត្តចងគោឱ្យឆ្ងាយពីទីនេះមិនលែងបានដូចមុនទៀតទេ ។ មានអ្នកភូមិខ្លះនិយាយថា ពួកគាត់ឈឺក្បាលវិលមុខ កោសខ្យល់ស្ទើររាល់ថ្ងៃ ព្រោះក្លិនអាក្រក់ចេញពីរោងចក្រនេះ។
ប្រជាពលរដ្ឋបានដាក់ពាក្យប្តឹងទៅសមត្ថកិច្ចពាក់ព័ន្ធដែរ ប៉ុន្តែមិនឃើញមានវិធានការទប់ស្កាត់សោះ។ ពាក្យបណ្តឹងពួកគាត់បានដាក់តាំងពីចុងខែកញ្ញា ២០១០ ប៉ុន្តែមិនមានលទ្ធផលទើបហៅក្រុមអ្នកកាសែតឱ្យជួយម្តង។
មន្ត្រីមន្ទីរបរិស្ថានបានបកស្រាយថា ក្រោយពីមានបណ្តឹងប្រជាពលរដ្ឋខាងមន្ទីរបានទៅពិនិត្យ ហើយឃើញសភាពដូចប្រជាពលរដ្ឋប្តឹងមែន។ មន្ទីរបានហៅម្ចាស់រោងចក្រឱ្យធ្វើកិច្ចសន្យានៅថ្ងៃទី១ ខែមីនា ២០១១ រួចរាល់ហើយ ប៉ុន្តែបើនៅតែមិនគោរពកិច្ចសន្យាទៀតខាងមន្ទីរនឹងមានវិធានការតឹងរ៉ឹងជាងនេះទៀតរហូតដល់មានសំណងការខូចខាតរបស់ប្រជាពលរដ្ឋទៀតផង។ វិធានការនេះនឹងធ្វើនៅក្រោយឱកាសបុណ្យចូលឆ្នាំខ្មែរ៕
ចែករំលែកព័តមាននេះ