យុវជនម្នាក់ជិះម៉ូតូគេចគោយន្ដដួលបាក់ឆ្អឹងខ្នង បានលាចាកលោកហើយ
ខេត្តពោធិ៍សាត់ ៖ បុរសម្នាក់បានទទួលមរណៈភាពនៅថ្ងៃទី១៨ ខែកក្កដានេះ ក្រោយពីគ្រូពេទ្យព្យាបាលអស់លទ្ធភាពជាងពីរសប្ដាហ៍បន្ទាប់ពីជួបគ្រោះថ្នាក់ចរាចរណ៍
ខេត្តពោធិ៍សាត់ ៖ បុរសម្នាក់បានទទួលមរណៈភាពនៅថ្ងៃទី១៨ ខែកក្កដានេះ ក្រោយពីគ្រូពេទ្យព្យាបាលអស់លទ្ធភាពជាងពីរសប្ដាហ៍បន្ទាប់ពីជួបគ្រោះថ្នាក់ចរាចរណ៍ ជិះម៉ូតូគេចគោយន្ដដួលធ្លាក់ចូលទៅក្នុងស្រែបណ្ដាលឲ្យរងរបួសបាក់ឆ្អឹងខ្នង កាលពីថ្ងៃទី០២ ខែកក្កដា ឆ្នាំ២០១៧ កន្លងមក នៅឃុំផ្ទះរុង ស្រុកភ្នំក្រវាញ។ សមត្ថកិច្ចឲ្យដឹងថា ជនរងគ្រោះឈ្មោះ ខឹម រ៉ាឈី ភេទប្រុស អាយុ២៤ឆ្នាំ រស់នៅភូមិពាលញែក២សង្កាត់ផ្ទះព្រៃ ក្រុងពោធិ៍សាត់ ជាក្រុមយុវជន និងជាប្រជាការពារភូមិពាលញែក២ ដែលមានម្ដាយជាមេភូមិផងដែរ។
យុវជន ខឹម រ៉ាឈី នេះជាក្រុមយុវជន និងជាកម្លាំងប្រជាការពារមួយរូប ក្នុងចំណោមយុវជន និងប្រជាការពារដទៃទៀតនៅក្រុងពោធិ៍សាត់ ដែលបានចូលរួមយ៉ាងសកម្មក្នុងផែនការភូមិឃុំមានសុវត្ថិភាពហើយទទួលបានការស្រលាញ់រាប់អានពីប្រជាពលរដ្ឋស្ទើរតែគ្រប់ៗគ្នា។ ប្រភពព័ត៌ឲ្យដឹងថា កាលពីថ្ងៃទី០២ខែកក្កដា ឆ្នាំ២០១៧ ខឹម រ៉ាឈី បានជួបគ្រោះថ្នាក់ចរាចរណ៍នៅឃុំផ្ទះរុង ស្រុកភ្នំក្រវាញ ដោយជិះម៉ូតូគេចគោយន្ដដួលធ្លាក់ចូលទៅក្នុងស្រែបណ្ដាលឲ្យបាក់ឆ្អឹងខ្នងរងរបួសយ៉ាងធ្ងន់ធ្ងរ ហើយបានត្រូវក្រុមគ្រួសារបញ្ជូនទៅសង្គ្រោះនៅមន្ទីរពេទ្យឯភ្នំពេញ។
ក្នុងការព្យាបាលនេះគ្រូពេទ្យបានពិនិត្យឃើញបាក់ឆ្អឹងខ្នងទី០៦ហើយបានព្យាបាលដោយយកចិត្តទុកដាក់អស់រយៈពេលជាងពីរសប្ដាហ៍ លុះមកដល់ថ្ងៃទី១៨នេះ ក៏ទទួលមរណៈភាពបាត់ទៅដែលធ្វើឲ្យក្រុមគ្រួសារ បងប្អូន និងញាតិមិត្តមានការសោកសង្រេង និងសោកស្ដាយយ៉ាងខ្លាំង។ សពយុវជន ខឹម រ៉ាឈី បានធ្វើបុណ្យនៅគេហដ្ឋាននៃសពដែលស្ថិតនៅភូមិពាលញែក២ សង្កាត់ផ្ទះព្រៃ ក្រុងពោធិ៍សាត់៕
ចែករំលែកព័តមាននេះ