ខេត្តពោធិ៍សាត់ ៖ កងកម្លាំងប្រដាប់អាវុធ លោកគ្រូអ្នកគ្រូ និងសិស្សានុសិស្សជាង៦០០នាក់បានមកចូលរួមទិវាអន្ដរជាតិប្រយុទ្ធប្រឆាំងគ្រឿងញៀន ២៦ មិថុនា ដែលរដ្ឋបាលសាលាខេត្តប្រារព្ធធ្វើនៅវិទ្យាល័យពោធិ៍សាត់នាព្រឹកថ្ងៃទី១៨ ខែកក្កដា ឆ្នាំ២០១៧ ក្រោមប្រធានបទ “ ត្រូវស្ដាប់កូនចៅ និងយុវជន គឺជាជំហានដំបូងដើម្បីជួយពួកគេឲ្យលូតលាស់ប្រកបដោយសុខភាព និងសុវត្ថិភាព “ ដើម្បីពញ្ញាក់ស្មារតីដល់សិស្សនៅក្នុងសហគមន៍ និងសាលារៀន ឱ្យជៀសផុតពីបញ្ហាអវិជ្ជមាននៃគ្រឿងញៀន ។
យោងតាមរបាយការណ៍របស់គណៈកម្មាធិការត្រួតពិនិត្យគ្រឿងញៀនខេត្ត បានឱ្យដឹងថា ក្នុងឆមាសទី១ដើមឆ្នាំ២០១៧ លើវិធានការអប់រំ ដោយបានធ្វើការផ្សព្វផ្សាយ និងអប់រំដល់ប្រជាពលរដ្ឋ ព្រះសង្ឃ និងសិស្សានុសិស្ស បាន១,២៥៨លើក អ្នកចូលរួម២៤១ពាន់នាក់ វិធានការរដ្ឋបាល បានធ្វើការណែនាំអប់រំ និងធ្វើកិច្ចសន្យា សហការណ៍បង្ការទប់ស្កាត់ មិនឱ្យមានគ្រឿងញៀននៅក្នុងទីតាំងម្ចាស់អាជីវកម្ម ដែលកំណត់ជាគោលដៅងាយរងគ្រោះបានចំនួន២៦១នាក់ និងវិធានការអនុវត្តច្បាប់ចុះបង្ក្រាបបទល្មើសគ្រឿងញៀនបាន១០១ករណី ឃាត់ខ្លួនមនុស្សបាន១៧២នាក់ និងដកហូតវត្ថុតាង បានមួយចំនួន ។
លោកស្រី ជុក សុផានី អភិបាលរងខេត្ត តំណាងលោក ម៉ៅ ធនិន អភិបាល នៃគណអភិបាលខេត្តពោធិ៍សាត់ បានថ្លែងថា ស្របតាមប្រធានបទត្រូវស្តាប់កូនចៅ និងយុវជន គឺជាជំហានដំបូងដើម្បីជួយពួកគេឱ្យលូតលាស់ប្រកបដោយសុខភាព និងសុវត្ថិភាព គឺជាប្រធានបទមួយមានសារសំខាន់ណាស់ ព្រោះថាទាំងនៅក្នុងតំបន់ និងសាកកលោកមានការព្រួយបារម្ម យ៉ាងខ្លាំងចំពោះបហ្ហាគ្រឿងញៀន ។ ដូចនេះរាជរដ្ឋាភិបាលកម្ពុជា បានគិតគូរ និងដាក់ចេញនូវយុទ្ធនាការនេះជារៀងរាល់ឆ្នាំ ដើម្បីឱ្យរដ្ឋបាលថ្នាក់ក្រោមជាតិ អនុវត្តការងារនេះដោយចុះធ្វើការផ្សព្វផ្សាយអប់រំ ព្យាបាល ទប់ស្កាត់ និងបង្ក្រាបបញ្ហាគ្រឿងញៀននេះដល់សហគមន៍ គ្រួសារ និងបណ្តាសាលារៀន ។
គ្រឿងញៀនបង្កបញ្ហាឱ្យកើតមានឡើងនូវអំពើចោរកម្ម អំពើហិង្សា ការរំលោភបំពានផ្លូវភេទ អសន្តិសុខសណ្តាប់ធ្នាប់សង្គម ដូច្នេះទាំងកងកម្លាំងប្រដាប់អាវុធអាវុធ ម្ចាស់ហាង ខារាអូខេ បៀរហ្គាឌិន សិស្សានុសិស្ស និងប្រជាពលរដ្ឋ ត្រូវរួមគ្នាប្រយុទ្ធប្រឆាំង លុបបំបាត់ដាច់ខាតចំពោះគ្រឿងញៀន ។
លោកស្រីបានជម្រាបជូនដែរថា គ្រឿងញៀនជាអាវុធបំផ្លាញអនាគតរបស់ខ្លួន គ្រួសារ ខាតបង់ថវិកា និងប្រឈមនឹងផ្លូវច្បាប់ព្រហ្មទណ្ឌ បើរកឃើញក្នុងការចែកចាយ ប្រើប្រាស់ ការនាំចូលដោយខុសច្បាប់នូវសារធាតុញៀន ។ តាមរយៈនៃទិវានេះ លោកស្រីសូមអំពាវនាវដល់សិស្សានុសិស្ស អាណាព្យាបាល និងប្រជាពលរដ្ឋ ត្រូវចូលរួមពញ្ញាក់ស្មារតី និងដាស់តឿនដោយយកចិត្តទុកដាក់ក្នុងការថែទាំ ស្វែងយល់ពីទំនាក់ទំនង និងតម្រូវការរបស់កូន ចៅ ដើម្បីដោះស្រាយ និងជួយឱ្យពួកគេអាចជៀសផុតពីគ្រឿងញៀន និងឆ្លើយតបទៅនឹងខ្លឹមសារ ចូលរួមទាំងអស់គ្នាដើម្បីជីវិត សហគមន៍ និងគ្រួសារយើងគ្មានគ្រឿងញៀន តាមរយៈគោលនយោបាយភូមិឃុំមានសុវត្ថិភាព ជាពិសេសបទបញ្ជាលេខ០១ស្តីពីវិធានការពង្រឹង និងត្រួតពិនិត្យ គ្រឿងញៀន ដែលរាជរដ្ឋាភិបាលបានដាក់ចេញកាលពីដើមឆ្នាំ២០១៧កន្លងមក ឱ្យទទួលបានជោគជ័យ ៕
ចែករំលែកព័តមាននេះ