យូណេស្កូ ៖ ករណីផ្តាច់ជីវិតអ្នកកាសែតកើនឡើង ៥០% នៅក្នុងឆ្នាំ២០២២
បារាំង ៖ អ្នកសារព័ត៌មាន និងបុគ្គលិកនៃប្រព័ន្ធផ្សព្វផ្សាយចំនួន ៨៦នាក់ ត្រូវបានសម្លា.ប់នៅជុំ
បារាំង ៖ អ្នកសារព័ត៌មាន និងបុគ្គលិកនៃប្រព័ន្ធផ្សព្វផ្សាយចំនួន ៨៦នាក់ ត្រូវបានសម្លា.ប់នៅជុំវិញពិភពលោកកាលពីឆ្នាំ ២០២២ ពោលគឺម្នាក់រៀងរាល់៤ថ្ងៃម្តង។ នេះបើយោងតាមទិន្នន័យចេញផ្សាយដោយអង្គការយូណេស្កូ (UNESCO) កាលពីពេលថ្មីៗនេះ ដោយលើកឡើងអំពីហានិភ័យធ្ងន់ធ្ងរ និងភាពងាយរងគ្រោះ ដែលអ្នកសារព័ត៌មានបន្តប្រឈមមុខក្នុងដំណើរការការងាររបស់ពួកគេ។
របាយការណ៍បន្តថា អ្វីដែលធ្វើឱ្យតួលេខកាន់តែគួរឱ្យព្រួយបារម្ភគឺ ជាងពាក់កណ្តាលនៃអ្នកកាសែត ដែលត្រូវបានគេសម្លា.ប់ ត្រូវបានគេកំណត់គោលដៅក្រៅកាតព្វកិច្ច ហើយមិនមែននៅពេលពួកគេកំពុងបំពេញការងារនោះទេ ដោយត្រូវបានគេកំណត់គោលដៅពេលធ្វើដំណើរនៅផ្ទះ និងតាមទីសាធារណៈ ដែលនេះឆ្លុះបញ្ចាំងថា អ្នកសារព័ត៌មានមិនមានសុវត្ថិភាពឡើយ សូម្បីតែក្នុងកន្លែងឯកជនរបស់ពួកគេ។
លោកស្រី Audrey Azoulay អាយុ៥០ឆ្នាំ ដែលជាអគ្គនាយិកានៃអង្គការយូណេស្កូ បានលើកឡើងថា «បន្ទាប់ពីការធ្លាក់ចុះជាច្រើនឆ្នាំជាប់ៗគ្នា ការកើនឡើងយ៉ាងខ្លាំងនៃចំនួនអ្នកកាសែត ដែលត្រូវបានសម្លា.ប់ គឺស្ថិតនៅក្នុងឆ្នាំ ២០២២ គឺគួរឱ្យព្រួយបារម្ភខ្លាំងណាស់។ អាជ្ញាធរត្រូវតែបង្កើនកិច្ចខិតខំប្រឹងប្រែងរបស់ពួកគេ ដើម្បីបញ្ឈប់ឧក្រិដ្ឋកម្មទាំងនេះ និងធានាថា ជនល្មើសត្រូវបានផ្តន្ទាទោស ពីព្រោះការព្រងើយកន្តើយគឺជាកត្តាចម្បងបង្កជាអំពើហិ.ង្សាបែបនេះ»។
ដោយមានករណីឃា.តកម្មចំនួន១៩ករណី ប្រទេសម៉ិកស៊ិកជាប់ចំណាត់ថ្នាក់កំពូលនៃបញ្ជីប្រទេស ដែលមានអ្នកកាសែតត្រូវបានសម្លា.ប់ច្រើនជាងគេ បន្ទាប់មកគឺប្រទេសអ៊ុយក្រែន និងហៃទី។
នៅក្នុងឆ្នាំ ២០២២ បានកត់សម្គាល់ការបញ្ច្រាស់យ៉ាងគំហុក នៅក្នុងនិន្នាការវិជ្ជមានដែលត្រូវបានមើលឃើញក្នុងប៉ុន្មានឆ្នាំថ្មីៗនេះ អំពីសុវត្ថិភាពអ្នកសារព័ត៌មាន។ អង្គការយូណេស្កូបានលើកឡើងថា អ្នកកាសែតចំនួន ៩៩នាក់ ត្រូវបានសម្លា.ប់ក្នុងឆ្នាំ ២០១៨ ប៉ុន្តែតួលេខនេះ បានធ្លាក់ចុះមកនៅត្រឹម ៥៨នាក់ក្នុងមួយឆ្នាំបន្ទាប់ ចាប់ពីឆ្នាំ ២០១៩ រហូតដល់ឆ្នាំ ២០២១។
យោងតាមការបូកសរុបឆ្នាំ ២០២២ ដោយអង្គការអន្តរជាតិអ្នកកាសែតគ្មានព្រំដែន Reporters Without Borders បានបង្ហាញថា សង្គ្រាមឈ្លានពានរបស់រុស្ស៊ីលើអ៊ុយក្រែន បានរួមចំណែកដ៏ធំដល់កំណើននៃការស្លា.ប់អ្នកកាសែត។
របាយការណ៍របស់អង្គការយូណេស្កូបានបន្ថែមថា ចំនួនអ្នកកាសែត ដែលត្រូវបានសម្លា.ប់នៅក្នុង តំបន់ជម្លោះបានកើនឡើងដល់ទៅ ២៣នាក់ក្នុងឆ្នាំ ២០២២ បើធៀបនឹង ២០ឆ្នាំមុន។
បន្ថែមលើសពីនេះទៀត អង្គការដែលមានការិយាល័យកណ្តាលនៅក្នុងទីក្រុងប៉ារីស ប្រទេសបារាំងមួយនេះ បានអះអាងថា អត្រានិទណ្ឌភាព សម្រាប់ការសម្លា.ប់អ្នកកាសែតនៅតែខ្ពស់គួរឱ្យភ្ញាក់ផ្អើលជាទីបំផុត គឺរហូតដល់ ៨៦%៕ (ដកស្រង់ចេញពី Firstpost)
ចែករំលែកព័តមាននេះ