រាជធានីភ្នំពេញ ៖ ស្របពេលកម្រិតជីវភាពប្រជាពលរដ្ឋកាន់តែប្រសើរឡើង បានធ្វើឲ្យអ្នកដើរផ្សារមាននិន្នាការផ្លាស់ប្តូរជាបន្តបន្ទាប់ និងងាកទៅរកផ្សារទំនើបខ្នាតអន្តរជាតិ ធ្វើឲ្យផ្សារទំនើបធម្មតា ឬហៅថា Shopping Mall នានាពិបាកក្នុងការប្រកួតប្រជែង និងកំពុងរងផលប៉ះពាល់ ។
ការផ្លាស់ប្តូរនេះ ត្រូវបានគេមើលឃើញថា ដោយសារផ្សារទំនើបលំដាប់អន្តរជាតិមានការរៀបចំ និងចាត់ចែងល្អជាង សូម្បីតែចំណតម៉ូតូ និងរថយន្ដ ក៏មានស្ដង់ដាដែរ ។ ចំណែកនៅក្នុងផ្សារវិញ ជាន់នីមួយៗមានលក់ផលិតផលសម្បូរបែប មានអាហារដ្ឋាន កន្លែងកម្សាន្ដប្រកបដោយសោភ័ណភាព និងអនាម័យខ្ពស់ ដែលធ្វើឲ្យអ្នកដើរផ្សារយល់ថា មានផាសុកភាព និងសេចក្ដីថ្លៃថ្នូរ ។ កត្តាមួយចំនួនទៀតដូចជា កំណើនប្រជាសាស្ត្រ កំណើនប្រាក់ចំណូល និងលក្ខខណ្ឌនៃការទិញទំនិញកាន់តែងាយស្រួល ក៏ជាបច្ច័យជំរុញឲ្យពលរដ្ឋងាកមករកផ្សារទំនើបលំដាប់អន្តរជាតិនេះដែរ ។
បើតាមអាជីវករលក់សម្លៀកបំពាក់នៅផ្សារទំនើបសូរិយា ដែលសុំមិនបញ្ចេញឈ្មោះលើកឡើងថា ពេលផ្សារទំនើបសូរិយាបើកដំណើរការដំបូង ការលក់ដូររបស់អាជីវករម្នាក់ៗមានភាពល្អប្រសើរ ប៉ុន្តែក្រោយមកបន្ទាប់ពីមានវត្តមានផ្សារទំនើបអុីអនបើកភ្លាម ភ្ញៀវនៅទីនេះធា្លក់ចុះប្រហែលជា៥០% ហើយការធ្លាក់ចុះនេះដោយសារអតិថិជនបង្វែរការទិញទំនិញទៅផ្សារអីុអនអស់។
លោកបន្ដថា ៖ « ដោយសារខ្ញុំចង់ដឹង ខ្ញុំក៏បានទៅផ្សារទំនើបអុីអន ស្រាប់តែឃើញអតិថិជនដែលធ្លាប់តែដើរទិញអីវ៉ាន់ កំពុងដើរនៅទីនោះមែន តែត្រង់ថា ពួកគេទិញទំនិញឬមិនទិញ ខ្ញុំមិនចាប់អារម្មណ៍ទេ » ។
ចំណែកផ្សារទំនើបសូរិយា ក៏កំពុងតែរៀបចំកែលម្អឡើងវិញដែរ ធ្វើយ៉ាងណាដើម្បីទាក់ទាញអតិថិជនមកវិញ ហើយលោករំពឹងថា នៅពេលផ្សារនេះបើកដំណើរការឡើងវិញ យ៉ាងហោចណាស់ ក៏ទាក់ទាញភ្ញៀវបាន៧០%ដែរ ព្រោះផ្សារនេះគេធ្លាប់ស្គាល់ហើយ គេមិនបោះបង់ទេ ប៉ុន្ដែលុះត្រាតែមានការរៀបចំឲ្យកាន់តែប្រសើរឡើង បើពុំនោះទេ កុំថាឡើយផ្សារនេះស្ថិតនៅចំកណ្ដាលទីប្រជុំជន អតិថិជននឹងងាកទៅរកផ្សារទំនើបដែលមានស្ដង់ដាមិនខាន ។
ស្របនឹងការលើកឡើងរបស់អាជីវករផ្សារទំនើបសូរិយា អាជីវករលក់គ្រឿងអលង្ការនៅផ្សារទំនើបសុវណ្ណា ដែលសុំមិនបញ្ចេញឈ្មោះដូចគ្នា បានឱ្យដឹងថា ឥឡូវនេះស្ងាត់ភ្ញៀវណាស់ លក់អត់ដាច់ទេ ជួនកាល៥ថ្ងៃមិនទាន់មានអ្នកកៅឆាយមួយផង ។ អ្នកស្រីថា ៖ « ពេលខ្លះ ខ្ញុំមិនសប្បាយចិត្តសោះទៅនឹងពាក្យគេថា សេដ្ឋកិច្ចឡើងៗ តែអាជីវករលក់មិនដាច់ផង រកតែលុយបង់ថ្លៃតូបស្ទើរមិនបាន » ។
អ្នកស្រីបន្តថា ៖ « ផ្សារទំនើបសុវណ្ណានេះ កាលពីបើកដំបូង អាចរស់បានរាងគ្រាន់ តែក្រោយមកចេះតែធា្លក់ទៅៗ មានអាជីវករមួយចំនួនបានផ្អាកអាជីវកម្មហើយ ។ ចំណែកខ្ញុំគ្រោងនឹងបិទចោលដែរ តែខាងផ្សារគេបញ្ចុះតម្លៃឱ្យខ្លះ បានចេះតែត្រដរទៅ ដើម្បីឱ្យកូនមានមុខរបររកស៊ីឯករាជ្យមួយ វាប្រសើរជាងទៅធ្វើការឲ្យគេ » ។
អ្នកស្រី ស៊ីន កូលាប ជាអតិថិជនរបស់ផ្សារទំនើបអីុអន ឱ្យដឹងថា ៖ « តាំងពីផ្សារនេះបើកដំណើរការមក នៅពេលត្រូវការទិញសម្ភារផ្សេងៗសម្រាប់ប្រើប្រាស់ក្នុងគ្រួសារ ខ្ញុំតែងមកទិញនៅទីនេះ ដោយសារតែមានកន្លែងចតរថយន្តធំទូលាយ បរិវេណក្នុងផ្សារត្រជាក់ មានផាសុកភាព និងអនាម័យខ្ពស់ មើលទៅស្រឡះមុខមាត់ ហើយចង់ញ៉ាំអ្វី ក៏មានភាពងាយស្រួលដែរ ។ ជាក់ស្តែង ខ្ញុំមកថ្ងៃនេះ ត្រូវការទិញ ដូចជា សាប៊ូ, មី, ទឹកស៊ីអីុវ និងគ្រឿងទេស ប្រើប្រាស់ផ្សេងទៀតសម្រាប់បំពេញតម្រូវការក្រុមគ្រួសារ » ។
អ្នកស្រីថា កាលពីមុនមិនទាន់មានផ្សារទំនើបអីុអននេះ អ្នកស្រីតែងតែទៅទិញនៅផ្សារឡាក់គី និងសូរិយាដែរ ប៉ុន្តែក្រោយពីផ្សារនេះបើកដំណើរការមក អ្នកស្រីពុំដែលចូលផ្សារទាំងនោះទេ គឺចូលចិត្តតែមកផ្សារអីុអន បើទោះបីត្រូវធ្វើដំណើរឆ្ងាយក៏ដោយ ។
អ្នកស្រីបញ្ជាក់ថា ៖ « ក្នុងមួយឬពីរសប្តាហ៍ ខ្ញុំមកផ្សារទំនើបនេះម្តង ដោយក្នុងម្តងៗ ត្រូវការចំណាយមិនក្រោម៧០ដុល្លារនោះទេទៅលើការទិញសម្ភារប្រើប្រាស់សម្រាប់ក្រុមគ្រួសារ ដូចជា សម្លៀកបំពាក់ ទូរទស្សន៍ និងម៉ាស៊ីនបោកខោអាវ ជាដើម » ។
យោងតាមលទ្ធផលនៃការសិក្សាបឋមរបស់ក្រុមហ៊ុនប៊ុណ្ណា ដែលបានបញ្ចប់កាលពី ពេលថ្មីៗនេះរកឃើញថា តម្រូវការប្រើប្រាស់ផ្សារទំនើប បានកើនឡើងពី៧៩%កាលពីត្រីមាសទី១ឆ្នាំមុន ដល់៨២%នៅដំណាច់ត្រីមាសទី១ ឆ្នាំនេះ ៕
ចែករំលែកព័តមាននេះ