រាជធានីភ្នំពេញ ៖ សមាជិកព្រឹទ្ធសភានៅព្រឹកថ្ងៃអង្គារ៍ ទី១៨ កក្កដា ឆ្នាំ២០១៧ នេះ បានអនុម័តសេចក្តីស្នើច្បាប់ស្តីពីវិសោធនកម្មច្បាប់ស្តីពីគណបក្សនយោបាយ និងច្បាប់ស្តីពីវិសោធនកម្មច្បាប់ស្តីពីគណបក្សនយោបាយ ជាឯកច្ឆ័ន្ទដោយសម្លេង៤២ លើ៤២សម្លេង។
ព្រឹកនេះព្រឹទ្ធសភាប្រជុំពិភាក្សា និងអនុម័តច្បាប់គណបក្សនយោបាយក្រោមអធិបតីភាពសម្តេច សាយ ឈុំ ប្រធានព្រឹទ្ធសភា ដោយមានតែសមាជិកចូលរួមសរុប៤២រូប ពីគណបក្សប្រជាជនកម្ពុជា ចំណែកសមាជិកព្រឹទ្ធសភាមកពីគណបក្សប្រឆាំងមិនចូលទេ កិច្ចប្រជុំនៅព្រឹកនេះទេ។ ច្បាប់នេះនឹងត្រូវបានឡាយព្រះហត្ថលេខាប្រញាប់ផងដែរ។ ដូច្នេះលោក សម រង្ស៊ី អតីតមេដឹកនាំបក្សសង្គ្រោះជាតិ គឺមិនអាចលូកដៃធ្វើនយោបាយដោយផ្ទាល់ ឬដោយប្រយោលជាមួយបក្សប្រឆាំងទៀតនោះទេ។
ជាពិសេសច្បាប់ថ្មីនេះ គឺតម្រូវឲ្យបក្សប្រឆាំងលុបរូបលោក សម រង្ស៊ី ចេញពីឡូហ្គោរបស់គណបក្សប្រឆាំង ឬឈប់ដាក់តាំងរូបអតីតមេបក្សប្រឆាំងរូបនេះនៅទីសាធារណៈជាដាច់ខាត ដោយថាលោក សម រង្ស៊ី ជាទណ្ឌិត។
កន្លងមក លោក ឈាង វុន អ្នកតំណាងរាស្ត្រគណបក្សប្រជាជនកម្ពុជាបានអះអាងថា គណបក្សកាន់អំណាចនឹងមិនប្រើប្រាស់ច្បាប់ថ្មីនេះ ទៅរំលាយគណបក្សសង្គ្រោះជាតិចោលដូចការលើកឡើងរបស់មជ្ឈដ្ឋានមួយចំនួនទេ។ ព្រោះថាបើមេដឹកនាំគណបក្សប្រឆាំងមិនបំពានច្បាប់នេះ គឺគ្រប់យ៉ាងគ្មានបញ្ហានោះទេ៕
ចែករំលែកព័តមាននេះ