ខេត្តព្រះសីហនុ ៖ នៅព្រឹកថ្ងៃទី១៧ ខែកក្កដា ឆ្នាំ២០១៧ កម្លាំងនគរបាលផែនអន្តោប្រវេសន៍ នៃស្នងការដ្ឋាននគរបាលខេត្តព្រះសីហនុ បានបញ្ជូនជនបរទេសជាជនជាតិវៀតណាមចំនួន៥នាក់ ទៅអគ្គនាយកដ្ឋានអន្តោប្រវេសន៍ ។
តាមការឱ្យដឹងពីលោកឧត្តមសេនីយ៍ត្រី ហ៊ុន សុរិទ្ធី បានឱ្យដឹងថា ៖ ជនជាតិវៀតណាមទាំង៥នាក់ ត្រូវបានឃាត់ខ្លួននៅម៉ោង១២និង៣០នាទី ថ្ងៃទី១៦ ខែកក្កដា ឆ្នាំ២០១៧ នៅចំណុចផែថ្មចំណតទូក ខាងមុខអង្គភាពកាំសាប ស្ថិតក្នុងសង្កាត់លេខ៣ ក្រុងព្រះសីហនុ ខេត្តព្រះសីហនុ ។
លោកឧត្តមសេនីយ៍ត្រី ហ៊ុន សុរិទ្ធី បានបញ្ជាក់ថា ៖ ដោយមានការចង្អុលបង្ហាញ និងការណែនាំរបស់លោកឧត្តមសេនីយ៍ទោ ជួន ណារិន្ទ ស្នងការខេត្តព្រះសីហនុ កម្លាំងនៃការិយាល័យអន្តោប្រវេសន៍ខេត្តព្រះសីហនុ បានធ្វើការពិនិត្យស្រាវជ្រាវរកឃើញជនជាតិវៀតណាម៥នាក់ ពីបទលួចចូលមកស្នាក់នៅ និងធ្វើការនេសាទ ដោយខុសច្បាប់នៅខេត្តព្រះសីហនុ ដោយគ្នានលិខិតឆ្លងដែន ទើបកម្លាំងធ្វើការឃាត់ខ្លួន ។ ហើយបន្ទាប់ពីឃាត់ខ្លួន កម្លាំងជំនាញធ្វើការសាកសួរកសាងសំណុំរឿងបញ្ជូនទៅអគ្គនាយកដ្ឋានអន្តោប្រវេសន៍ ដើម្បីចាត់ការតាមនីតិវិធី ។
លោកបានបន្តថា ៖ កន្លងមកមន្ត្រីនគរបាលជំនាញ បានចុះទៅធ្វើការពិនិត្យរកលិខិតឆ្លងដែនរបស់ជនបរទេសដែលមកស្នាក់នៅ និងធ្វើការនៅខេត្តព្រះសីហនុ ដោយបានប្រើប្រាស់យុទ្ធសាស្ត្របែបភ្លៀងរលឹម ក្រោមការចង្អុលបង្ហាញពីលោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ និងបានរកឃើញជនបរទេសដែលលួចចូលមកស្នាក់នៅ ដោយគ្នានលិខិតឆ្លងដែនជាបន្តបន្ទាប់ និងកសាងសំណុំរឿងបញ្ជូនទៅអគ្គនាយកដ្ឋានអន្តោប្រវេសន៍ ដើម្បីអនុវត្តតាមនិតិវិធី នៃច្បាប់អន្តោប្រវេសន៍ របស់ព្រះរាជាណាចក្រកម្ពុជាយើងផងដែរ ៕
ចែករំលែកព័តមាននេះ