«The Sun» របស់អង់គ្លេសកាលពីពេល ថ្មីៗកន្លងមកបានបង្ហាញរឿងគួរឱ្យតក់ស្លុតមួយគឺអ្នកនេសាទម្នាក់នៅអាមេរិកត្រូវឆ្លាមប្រវែងប្រហែល១,២ម៉ែត្រ ខាំត្របាក់ដៃដោយសារក្លាហានលូកចាប់កន្ទុយវា ។
វីដេអូឃ្លីបបង្ហាញបុរស២នាក់ព្យាយាមចាប់ឆ្លាមមួយក្បាលដែលជាប់សន្ទូចរបស់ពួកគេនៅក្បែរឆ្នេរ «Wrightsville» រដ្ឋន័រឃែរ៉ូឡៃណា កាលពីថ្ងៃទី២៩ មិថុនា ២០១៧ ។ ក្នុងចំណោមអ្នកទាំង២នោះម្នាក់ចាប់នៅត្រង់កន្ទុយក៏ត្រូវឆ្លាមត្របាក់ដៃបណ្តាលឱ្យហូរឈាម និងភ័យរត់ឡើងគោក ។
«WWAY» ផ្សាយថា ត្រីឆ្លាមនោះត្រូវគេចាប់ទាញឡើងលើច្រាំងដើម្បីដោះផ្លែសន្ទូចចេញមុនពេលលែងទៅសមុទ្រវិញ ។
អ្នកជំនាញនៅសារមន្ទីរសត្វទឹកនៅរដ្ឋន័រឃែរ៉ូឡៃណា បញ្ជាក់ថា «ឆ្លាមជាសត្វសាហាវ ដូច្នេះយើងមិនគួរប្រឡែងលេង ឬលេងសើចជាមួយវាទេ » ។
តាំងពីដើមឆ្នាំ២០១៧មក ត្រីឆ្លាមវាយប្រហារលើមនុស្សជាង២៦លើក នៅសហរដ្ឋអាមេរិក ក្នុងនោះ១៨លើកកើតឡើងនៅរដ្ឋផ្លរីដា និង១លើកនៅហាវ៉ៃ ។ កាលពីខែកន្លងមកស្ត្រីម្នាក់ក៏ត្រូវឆ្លាមខាំដាច់ដៃពេលងូតទឹកនៅកាលីហ្វ៊័រនីញ៉ាខាងជើង ៕
Like our Page
