ខេត្តមណ្ឌលគិរី ៖ យុវជនបីនាក់ ត្រូវបានបញ្ជូនពីពេទ្យបង្អែកខេត្តមណ្ឌលគិរី ទៅសង្គ្រោះបន្ទាន់នៅមន្ទីរពេទ្យរុស្ស៊ីទាំងយប់ ក្រោយជួបគ្រោះថ្នាក់ចរាចរ កាលពីវេលាម៉ោង១៩និង១០នាទី ថ្ងៃទី១៦ ខែកក្កដា ឆ្នាំ២០១៧ ។
លោក ចាន់ ទិត្យ នាយការិយាល័យចរាចណ៏ នៃស្នងការដ្ឋាននគរបាលខេត្ត បានឲ្យដឹងថា ៖ មានករណីគ្រោះថ្នាក់ចរាចរ ដោយរថយន្តបុកម៉ូតូ ត្រង់ចំណុចទល់មុខផ្ទះលោក គុជ ម៉េងធូ ចៅសង្កាត់ស្ពានមានជ័យ ស្ថិតនៅភូមិអូរស្ពាន សង្កាត់ស្ពានមានជ័យ ក្រុងសែនមនោរម្យ ខេត្តមណ្ឌលគិរី ។
លោកថា ៖ អ្នកបើកបរម៉ូតូឈ្មោះ ហំ ដេត ភេទប្រុស អាយុ២៣ឆ្នាំ ជនជាតិខ្មែរ មុខរបរកសិករ បច្ចុប្បន្នរស់នៅភូមិឃុំកើតហេតុខាងលើ ។ រួមជាមួយអ្នកដំណើរ២នាក់ ទី១.ឈ្មោះ ត្រែង ភេទប្រុស អាយុ២១ឆ្នាំ ជនជាតិខ្មែរ មុខរបរកសិករ បច្ចុប្បន្នរស់នៅភូមិឃុំកើតហេតុខាងលើ ។ ទី២.ឈ្មោះ រិទ្ធ ភេទប្រុស អាយុ១៧ឆ្នាំ ជនជាតិខ្មែរ មុខរបរកសិករ បច្ចុប្បន្នរស់នៅភូមិឃុំកើតហេតុខាងលើ ។ ចំណែករថយន្តបានបើករត់គេចខ្លួនបាត់ស្រមោល ។ កម្លាំងសមត្ថកិច្ចកំពុងតាមចាប់យកមកដោះស្រាយតាមនីតិវិធី ។
នាយការិយាល័យចរាចណ៏ នៃស្នងការដ្ឋាននគរបាលខេត្តបានបញ្ជាក់ថា ៖ ជនរងគ្រោះទាំងបីនាក់ ត្រូវបានខាងមន្ទីរពេទ្យសម្រេចបញ្ជូនព្យាបាលបន្តនៅពេទ្យរុស្ស៊ី ព្រោះតែមានអាការធ្ងន់ធ្ងរពេក ៕
ចែករំលែកព័តមាននេះ