ក្រុមហ៊ុន Microsoft គ្រោងកាត់បន្ថយបុគ្គលិករាប់ពាន់នាក់ នៅក្នុងផ្នែកជាច្រើន
សហរដ្ឋអាមេរិក ៖ ក្រុមហ៊ុនសាជីវកម្មបច្ចេកវិទ្យាអាមេរិក Microsoft គ្រោងនឹងកាត់បន្ថយបុគ្គលិក
សហរដ្ឋអាមេរិក ៖ ក្រុមហ៊ុនសាជីវកម្មបច្ចេកវិទ្យាអាមេរិក Microsoft គ្រោងនឹងកាត់បន្ថយបុគ្គលិក
សហរដ្ឋអាមេរិក ៖ ក្រុមហ៊ុនសាជីវកម្មបច្ចេកវិទ្យាអាមេរិក Microsoft គ្រោងនឹងកាត់បន្ថយបុគ្គលិករាប់ពាន់នាក់ នៅក្នុងផ្នែកជាច្រើន ជាមួយនឹងតួនាទីមួយចំនួន ដែលរំពឹងថា នឹងត្រូវលុបចោល នៅក្នុងផ្នែកធនធានមនុស្ស និងផ្នែកវិស្វកម្ម។ នេះបើយោងតាមរបាយការណ៍ពីទីភ្នាក់ងារសារព័ត៌មាន Reuters ចេញផ្សាយនៅថ្ងៃទី១៨ ខែមករា ឆ្នាំ២០២៣។
ការបញ្ឈប់បុគ្គលិក ដែលរំពឹងទុកនឹងក្លាយជាសកម្មភាពចុងក្រោយបំផុតមួយ នៅក្នុងវិស័យបច្ចេកវិទ្យារបស់សហរដ្ឋអាមេរិក ដែលក្រុមហ៊ុននានារួមទាំង Amazon និង Meta Platforms បានប្រកាសអំពីការកាត់បន្ថយបុគ្គលិករបស់ខ្លួន ដើម្បីឆ្លើយតបទៅនឹងតម្រូវការធ្លាក់ចុះ និងទស្សនវិស័យសេដ្ឋកិច្ចរបស់ពិភពលោកកាន់តែអាក្រក់។ ខណៈដែលការផ្លាស់ប្តូររបស់ក្រុមហ៊ុន Microsoft អាចបង្ហាញថា វិស័យបច្ចេកវិទ្យាអាចបន្តកាត់បន្ថយការងារជាច្រើនបន្ថែមទៀត។
ទូរទស្សន៍ Sky News របស់ចក្រភពអង់គ្លេសបានរាយការណ៍ ដោយដកស្រង់ប្រភពថា ក្រុមហ៊ុន Microsoft គ្រោងនឹងកាត់បន្ថយបុគ្គលិកប្រហែល ៥% នៃកម្លាំងការងាររបស់ខ្លួន ឬប្រហែល ១១,០០០តួនាទី។ បើតាម Bloomberg News បានរាយការណ៍ថា ក្រុមហ៊ុននេះ នឹងកាត់បន្ថយការងារ នៅក្នុងផ្នែកវិស្វកម្មមួយចំនួន នៅថ្ងៃទី១៨ ខែមករា ដែលការកាត់បន្ថយនេះ នឹងមានទំហំធំជាងជុំផ្សេងទៀត កាលពីឆ្នាំមុន ខណៈដែលប្រភពពី Business Insider ក៏បានរាយការណ៍ថា ក្រុមហ៊ុន Microsoft អាចកាត់បន្ថយបុគ្គលិកចំនួនមួយភាគបី។
ក្នុងការឆ្លើយតបទៅនឹងសំណួររបស់សារព័ត៌មានសិង្ហបុរី CNA ក្រុមហ៊ុន Microsoft បាននិយាយថា ខ្លួនសុំមិនធ្វើការអត្ថាធិប្បាយលើពាក្យចចាមអារ៉ាម ឬការរំពឹងទុកនោះទេ។
សូមជម្រាបថា ក្រុមហ៊ុន Microsoft មានបុគ្គលិកបម្រើការពេញម៉ោងចំនួន ២២១,០០០នាក់ រួមទាំង ១២២,០០០នាក់ នៅសហរដ្ឋអាមេរិក និង ៩០,០០០នាក់ នៅក្រៅប្រទេស គិតត្រឹមថ្ងៃទី៣០ ខែមិថុនា ឆ្នាំ២០២២។
ក្រុមហ៊ុន Microsoft ស្ថិតនៅក្រោមសម្ពាធ ដើម្បីរក្សាអត្រាកំណើននៃ Microsoft Azure ដែលជាវេទិកាកុំព្យូទ័រអ៊ីនធឺណេតរបស់ខ្លួន (Cloud Computing) បន្ទាប់ពីការធ្លាក់ចុះជាច្រើនត្រីមាស នៅក្នុងទីផ្សារកុំព្យូទ័រផ្ទាល់ខ្លួន ដែលធ្វើឱ្យប៉ះពាល់ដល់ការលក់ Windows និងឧបករណ៍ដទៃផ្សេងទៀត ហើយក៏ជាហេតុនាំឱ្យមានការលុបចោលតួនាទីការងារមួយចំនួនតូច កាលពីខែកក្កដា ឆ្នាំ២០២២ កន្លងទៅ៕
ចែករំលែកព័តមាននេះ