ខេត្តកំពត ៖ ជនសង្ស័យដែលជាមុខសញ្ញាចែកចាយគ្រឿងញៀនដ៏សកម្មម្នាក់ ត្រូវសមត្ថកិច្ចអន្តរាគមន៍ឈុតខ្មៅ នៃស្នងការដ្ឋាននគរបាលខេត្តកំពត ធ្វើការចុះបង្ក្រាបកាលពីវេលាម៉ោង១០និង៣៥នាទីព្រឹក ថ្ងៃទី១៥ ខែកក្កដា ឆ្នាំ២០១៧ ស្ថិតចំណុចភូមិត្រពាំងវែង ឃុំត្រពាំងរាំង ស្រុកជុំគិរី ខេត្តកំពត ។ ជាមួយនឹងការឃាត់ខ្លួននេះ សមត្ថកិច្ចក៏បានដកហូតនូវត្ថុតាងថ្នាំញៀនប្រភេទម៉ាទឺកកកចំនួន១៧កញ្ចប់ ក្នុងនោះធំ២កញ្ចប់ រួមជាមួយសម្ភារពាក់ព័ន្ធមួយចំនួនផងដែរ ។
តាមប្រភពពីសមត្ថកិច្ចបានឲ្យដឹងថា ៖ ជនសង្ស័យឈ្មោះ ញ៉ែម សារ៉ាត់ ភេទប្រុស អាយុ៥១ឆ្នាំ ស្នាក់នៅក្នុងភូមិឃុំខាងលើ ហើយការឃាត់ខ្លួននេះ ក្រោយពីសមត្ថកិច្ចដាក់កម្លាំងតាមស៊ើបអង្កេតយ៉ាងហ្មត់ចត់ ទើបដៅសញ្ញារួចឈានទៅបង្ក្រាបតែម្តង ។ សមត្ថកិច្ចបានបញ្ជាក់ថា ការបង្ក្រាបបទល្មើសគ្រឿងញៀនទទួលបានជោគជ័យខាងលើនេះ គឺអនុវត្តន៍តាមការបញ្ជាផ្ទាល់ពីលោកឧត្តមសេនីយទោ ម៉ៅ ច័ន្ទមធុរិទ្ធ ស្នងការនគរបាលខេត្តកំពត និងដោយមានការសម្របសម្រួលនីតិវិធីពី លោក ខាន់ សុផល តំណាងអយ្យការអមសាលាដំបូងខេត្តកំពត ដើម្បីចេញប្រតិបតិ្តការបង្ក្រាបបទល្មើសគ្រឿងញៀនដូចភ្លៀងរលឹម ។
បច្ចុប្បន្នជនសង្ស័យរួមនឹងវត្ថុតាង ត្រូវបានសមត្ថកិច្ចការិយាល័យប្រឆាំងបទល្មើសគ្រឿងញៀនខេត្តកំពត កំពុងសាកសួរ និងរៀបចំកសាងសំណុំរឿងបញ្ជូនទៅសាលាដំបូងខេត្ត ចាត់ការតាមនីតិវិធី ៕
ចែករំលែកព័តមាននេះ