ខេត្តពោធិ៍សាត់ ៖ ក្រុមអ្នកសារព័ត៌មានមួយក្រុមនៅខេត្តពោធិ៍សាត់រួមមាន ភ្នាក់ងារទូរទស្សន៍ជាតិកម្ពុជា ទូរទស្សន៍CNC ទូរទស្សន៍បាយ័ន ទូរទស្សន៍ហង្សមាស កាសែតកោះសន្ដិភាព កាសែតកម្ពុជាថ្មី និងកាសែតនគរវត្ត នាថ្ងៃទី១៦ ខែកក្កដា ឆ្នាំ២០១៧ បាននាំគ្នាស្ម័គ្រចិត្តទៅបរិច្ចាកឈាមផ្ដល់ជូនមន្ទីរពេទ្យបង្អែកខេត្តពោធិ៍សាត់សម្រាប់ទុកជួយសង្គ្រោះដល់អ្នកជំងឺ និងជនរងគ្រោះគ្រប់ប្រភេទដែលត្រូវការឈាមជាចាំបាច់ដើម្បីរស់។ នេះគឺជាលើកទីមួយហើយសម្រាប់ក្រុមអ្នកសារព័ត៌មានខេត្តពោធិ៍សាត់ដែលធ្វើមនុស្សធម៌ផ្ដល់ឈាមជូនមន្ទីរពេទ្យបង្អែកខេត្ត។
លោកឱសថការី អាំង គឹមហ៊ួរ ប្រធានមន្ទីរពិសោធន៍នៃមន្ទីរពេទ្យបង្អែកខេត្តពោធិ៍សាត់ បានជម្រាបជូនអំពីអត្ថប្រយោជន៍នៃឈាម និងការបរិច្ចាកឈាម។ លោកបានលើកឡើងថា ឈាមមានសារៈសំខាន់ណាស់សម្រាប់ជួយសង្គ្រោះជីវិតអ្នកជំងឺ និងជនរងគ្រោះគ្រប់ប្រភេទដូចជាស្ត្រីឆ្លងទន្លេ និងគ្រោះថ្នាក់ផ្សេងៗ ដែលហូរឈាមស្ទើរតែអស់ពីខ្លួនហើយត្រូវការបញ្ចូលឈាមវិញជាចាំបាច់។ លោកឲ្យដឹងថា គោលិកាឈាមក្រហមកកើតនៅក្នុងខួរឆ្អឹងខ្នងមនុស្សរស់នៅបានត្រឹមតែ១២០ថ្ងៃប៉ុណ្ណោះ។នៅខាងក្រៅខ្លួនមនុស្សឈាមអាចថែរក្សាទុកបានតែ៣៥ថ្ងៃទេ ហើយឈាមក៏មិនទាន់អាចផលិតបាននៅក្នុងរោងចក្រនៅឡើយដែរ។ អំណោយឈាមមនុស្សអាចចែកទៅជាសមាសធាតុផ្សេងៗគ្នាហើយអាចជួយជីវិតអ្នកជំងឺបានរហូតដល់ទៅ០៣នាក់។
ចាប់ពីអាយុ១៨ឆ្នាំ ដល់៦០ឆ្នាំ និងមានទម្ងន់ចាប់ពី៤៥គីឡូក្រាមឡើងទៅអាចបរិច្ចាគឈាមបានពី០៣ទៅ០៤ដងក្នុងមួយឆ្នាំ។ លោកឱសថការីឲ្យដឹងទៀតថា ការបរិច្ចាគឈាមមិនត្រឹមតែជួយសង្គ្រោះអ្នកជំងឺ និងជនរងគ្រោះគ្រប់ប្រភេទដែលត្រូវការឈាមប៉ុណ្ណោះទេ គឺថែមទាំងកាត់បន្ថយហានិភ័យនៃជំងឺមហារីកនានា កាត់បន្ថយកំណកឈាម ការលើសជាតិដែកដែលធ្វើឲ្យប៉ះពាល់ដល់ថ្លើម និងលំពែង។ ម្យ៉ាងវិញទៀតជួយឲ្យប្រសើរឡើងនូវសុខភាពបេះដូង និងបន្ថយការឡើងទម្ងន់ទៀតផង។
លោកឱសថការី អាំង គឹមហ៊ួរ បានថ្លែងអំណរគុណចំពោះក្រុមអ្នកសារព័ត៌មានខេត្តពោធិ៍សាត់ទាំងអស់ដែលមានស្មារតីខ្ពស់នាំគ្នាស្ម័គ្រចិត្តមកបរិច្ចាគឈាមជូនដល់មន្ទីរពេទ្យបង្អែកខេត្តពោធិ៍សាត់នាពេលនេះដែលជាគំរូមួយដ៏ល្អសម្រាប់អ្នកសារព័ត៌មានដទៃទៀត។ ឈាមទាំងនេះមន្ទីរពេទ្យនឹងរក្សាទុកសម្រាប់ចាត់ចែងប្រើប្រាស់សង្គ្រោះជីវិតអ្នកជំងឺ និងជនរងគ្រោះគ្រប់ប្រភេទឲ្យបានចំទិសដៅ។ ជាមួយគ្នានេះលោកក៏បានអំពាវនាវដល់មន្ត្រីរាជការ កងកម្លាំងប្រដាប់អាវុធ លោកគ្រូអ្នកគ្រូ សិស្សានុសិស្ស ព្រះសង្ឃ និងបងប្អូនប្រជាពលរដ្ឋក្នុងខេត្តពោធិ៍សាត់ទាំងអស់នាំគ្នាមកបរិច្ចាគឈាមនៅមន្ទីរពេទ្យបង្អែកដើម្បីទុកជួយសង្គ្រោះដល់អ្នកជំងឺ និងជនរងគ្រោះគ្រប់ប្រភេទដែលត្រូវការឈាមជាចាំបាច់៕
Like our Page
