ក្រូអាត ៖ តាមប្រភពព័ត៌មាន Oddity Central បានឲ្យដឹងថា បុរសអាយុ២៣ឆ្នាំម្នាក់ មានជំងឺកម្រម្យ៉ាង ដែលធ្វើឲ្យគាត់មានរាងកាយហាក់បីដូចជាក្មេងអាយុ១៣ឆ្នាំ។ វាជាជំងឺដែលកើតឡើងដោយសារតែភាពមិនប្រក្រតីរបស់ក្រពេញអ៊ីប៉ូភីស (នៅក្នុងខួរក្បាល)។ ក្រពេញនេះជាអ្នកគ្រប់គ្រងទៅលើការលូតលាស់ និងការផ្លាស់ប្តូររូបរាងទៅតាមអាយុមនុស្ស។
ដោយសារតែរូបរាង និងមុខដ៏ក្មេងរបស់ Tomislav ធ្វើឲ្យរូបគេមិនអាចទិញបារី ឬស្រាផឹកបានទេ ប្រសិនបើគ្មានអត្តសញ្ញាណប័ណ្ណបញ្ជាក់ពីអាយុពិត។ មានគុណវិបត្តិជាច្រើនដែលលោកជួបប្រទះ ដោយសារតែមុខដ៏ក្មេងរបស់លោក។
ទោះបីជាអញ្ចឹងក៏ដោយ ក៏ Tomislav នៅតែព្យាយាមគិតពីគុណសម្បតិ្តនៃការមានរូបរាងដ៏ក្មេងបែបនេះ។ លោកប្រាប់ថា លោកមិនចាំបាច់ខ្វល់ខ្វាយរឿងរៀបការយកប្រពន្ធអីទេ ព្រោះថាលោកមើលទៅនៅក្មេងនៅឡើយ។ លោកអាចរស់នៅយ៉ាងមានក្តីសុខ ក្នុងភាពជាកម្លោះវ័យក្មេង។
មិត្តភក្តិជិតដិតជាមួយនឹង Tomislav បានប្រាប់ថា ពួកគេស្ទើរតែមិនជឿពីអាយុពិតរបស់ Tomislav នៅពេលស្គាល់គ្នាដំបូង។ ប្រសិនបើឃើញ Tomislav ជក់បារី និងផឹកស្រាទៀត គឺប្រាកដណាស់ អ្នកគ្រប់គ្នានឹងស្មានតែក្មេងមិនទាន់គ្រប់អាយុប្រព្រឹត្តខុសនឹងច្បាប់៕
ចែករំលែកព័តមាននេះ