ខេត្តកោះកុង ៖ អ្នកបើកបរទូកនេសាទម្នាក់ និងកម្មករ4នាក់ ត្រូវបានកម្លាំងកងទ័ពជើងទឹកនៃកងការពារកោះកុង ចេញអូប័រ3គ្រឿងទៅជួយសង្គ្រោះបានទាន់ពេល ខណៈពេលដែលទូកនេសាទបានព្យុះរលក និងខ្យល់កន្ត្រាក់នៅលើផ្ទៃសមុទ្រ កាលពីវេលាម៉ោង8និង20នាទីព្រឹក ថ្ងៃទី១៥ ខែកក្កដា ឆ្នាំ២០១៧ នៅត្រង់ចំណុចក្បែរភ្នំកោះកុងក្រៅ ស្ថិតក្នុងភូមិឡាំដាំ ឃុំកោះកាពិ ស្រុកកោះកុង ។
លោកវរនាវីឯក ជា ស៊ីធុនឡាយ មេបញ្ជាការកងការពារកោះកុងក្រៅលេខ2 បានប្រាប់កោះសន្តិភាពតាមទូរស័ព្ទថា បន្ទាប់ពីកម្លាំងរបស់លោកល្បាតឃើញទូកនេសាទខាងលើ កំពុងជួបគ្រោះឧបទ្ទវហេតុខ្យល់ព្យុះកន្ត្រាក់ លោកក៏បញ្ជាកម្លាំងឱ្យចេញអូប័រ3គ្រឿង ដើម្បីទៅជួយសង្គ្រោះ ។ ក្នុងពេលកម្លាំងសង្គ្រោះរបស់លោកទៅដល់ទាំងអ្នកបើកបរទូកត្រូវរលកព្យុះបក់បោកធ្លាក់ចូលសមុទ្រអស់ទៅហើយ តែពួកគាត់ប្រឹងហែលទាំងត្រដរ ដើម្បីរង់ចាំការជួយសង្គ្រោះ ។ ការសង្គ្រោះនេះប្រើរយៈពេលតែកន្លះម៉ោងប៉ុណ្ណោះ កម្លាំងរបស់លោកក៏បានស្រង់មនុស្សឡើងលើអូប័បានទាំងអស់ចំនួន5នាក់ គឺ១-ឈ្មោះ ឌី អឿន ភេទប្រុស អាយុ42ឆ្នាំ ជាម្ចាស់ទូក និងកម្មករ4នាក់ទៀត មានទីលំនៅភូមិចាំយាម ឃុំប៉ាក់ខ្លងស្រុកមណ្ឌលសីមា ។
លោកវរនាវីឯកបន្តថា លោកក៏មានការសោកស្តាយដែលកម្លាំងរបស់លោកជួយសង្គ្រោះបានតែមនុស្សប៉ុណ្ណោះ ក្រោយមកមិនបានប៉ុន្មាននាទីផង ទូកនេសាទខាងលើក៏ត្រូវខ្យល់ព្យុះកន្ត្រាក់វាយលិចចូលក្នុងសមុទ្របាត់ទៅ ៕
ចែករំលែកព័តមាននេះ