ប្រធានាធិបតីវៀតណាម លាលែងពីតំណែង មុនអាណត្តិ
វៀតណាម ៖ គណៈកម្មាធិការមជ្ឈិមបក្សកុម្មុយនិស្តវៀតណាម នៅថ្ងៃអង្គារ ទី១៧ ខែមករា ឆ្នាំ២០២៣នេះ បានយល់ព្រមនិងអនុញ្ញាតឲ្យលោក ង្វៀន ស៊ួនហ្វុក…
វៀតណាម ៖ គណៈកម្មាធិការមជ្ឈិមបក្សកុម្មុយនិស្តវៀតណាម នៅថ្ងៃអង្គារ ទី១៧ ខែមករា ឆ្នាំ២០២៣នេះ បានយល់ព្រមនិងអនុញ្ញាតឲ្យលោក ង្វៀន ស៊ួនហ្វុក…
វៀតណាម ៖ គណៈកម្មាធិការមជ្ឈិមបក្សកុម្មុយនិស្តវៀតណាម នៅថ្ងៃអង្គារ ទី១៧ ខែមករា ឆ្នាំ២០២៣នេះ បានយល់ព្រមនិងអនុញ្ញាតឲ្យលោក ង្វៀន ស៊ួនហ្វុក Nguyen Xuan Phuc ឈប់ធ្វើជាសមាជិកការិយាល័យនយោបាយ និងលាលែងពីតំណែងជាប្រធានាធិបតីវៀតណាម នៃអាណត្តិ ២០២១-២០២៦ តាមសំណើផ្ទាល់ខ្លួនរបស់លោក ។
យោងតាមសេចក្តីថ្លែងការណ៍ ដែលបានចេញផ្សាយពីកិច្ចប្រជុំវិសាមញ្ញរបស់គណៈកម្មាធិការខាងលើនេះ លោក ង្វៀន ស៊ួនហ្វុក គឺជាមេដឹកនាំដ៏សំខាន់ នៃបក្សកុម្មុយនិស្ត និងរដ្ឋវៀតណាម ។ លោកត្រូវបានគេទុកចិត្ត និងចាត់តាំងឲ្យកាន់តំណែងសំខាន់ៗជាច្រើន ដោយគណៈកម្មាធិការ និងការិយាល័យនយោបាយ ។
ទោះយ៉ាងណាក៏ដោយក្នុងតំណែងជាមេដឹកនាំ លោក ង្វៀន ស៊ួនហ្វុក ត្រូវទទួលខុសត្រូវចំពោះការអនុញ្ញាតឲ្យមន្ត្រីមួយចំនួន រួមទាំងឧបនាយករដ្ឋមន្ត្រីចំនួន០២រូប និងរដ្ឋមន្ត្រីចំនួន០៣រូប ប្រព្រឹត្តល្មើស ដែលបណ្តាលឲ្យមានផលវិបាកធ្ងន់ធ្ងរ ។ ឧបនាយករដ្ឋមន្ត្រីទាំង២រូប បានលាលែងពីតំណែង ខណៈរដ្ឋមន្ត្រី០២រូប និងមន្ត្រីមួយចំនួនទៀត កំពុងប្រឈមនឹងការចោទប្រកាន់ពីបទព្រហ្មទណ្ឌ ។
សេចក្តីថ្លែងការណ៍បានចេញផ្សាយអោយដឹងថា “ដោយសារ លោកដឹងយ៉ាងច្បាស់ អំពីទំនួលខុសត្រូវ ចំពោះបក្ស និងប្រជាជនវៀតណាមនោះ ទើបលោកបានដាក់សំណើ សុំលាលែងពីតំណែង ហើយចូលនិវត្តន៍” ។
លោក ង្វៀន ស៊ួនហ្វុក ដែលមានអាយុ ៦៩ឆ្នាំ គឺជាសមាជិក នៃគណៈកម្មាធិការមជ្ឈិមបក្ស ការិយាល័យនយោបាយ និងរដ្ឋសភា អស់រយៈពេលជាច្រើនអាណត្តិ ។ ចាប់ពីឆ្នាំ១៩៩៧ ដល់២០០៦ លោកជាប្រធានគណៈកម្មាធិការប្រជាជនខេត្ត Quang Nam ។ លោកត្រូវបានតែងតាំងជាប្រធានការិយាល័យរដ្ឋាភិបាល ក្នុងឆ្នាំ២០០៦ និងជាឧបនាយករដ្ឋមន្ត្រី ក្នុងឆ្នាំ២០១១ មុនពេលក្លាយជានាយករដ្ឋមន្ត្រី ៥ឆ្នាំក្រោយមក ។ លោកត្រូវបានបោះឆ្នោតជ្រើសរើសជាប្រធានាធិបតី នៅខែមេសា ឆ្នាំ ២០២១ ៕
ចែករំលែកព័តមាននេះ