រាជធានីភ្នំពេញ ៖ ការផ្គត់ផ្គង់ខុនដូបាននិងកំពុងបន្តកើនឡើងនៅក្នុងទីផ្សារកំពុងតែងើបឡើងនេះ ស្របពេលខុនដូចំនួន៧ពាន់យូនីតទៀត ត្រូវបានព្យាករណ៍ថា នឹងដាក់ចូលទីផ្សារនៅដំណាច់ឆ្នាំនេះ ។
នាយិកាក្រុមហ៊ុន CBRE Cambodia អ្នកនាងអាន សុធីតា បានថ្លែងឲ្យដឹងតាមទូរស័ព្ទនាព្រឹកថ្ងៃទី១៣ កក្កដា ថា តាមការព្យាករចំនួនខុនដូផ្គត់ផ្គង់ចូលទីផ្សារនឹងកើនដល់៧ពាន់យូនីតបន្ថែមទៀត ដែលធ្វើឲ្យការផ្គត់ផ្គង់សរុបកើនដល់ប្រមាណ១,២ម៉ឺនយូនីត គិតត្រឹមដំណាច់ឆ្នាំ២០១៧នេះ ។ អ្នកនាងបន្តថា ការលក់ខុនដូនៅតែដំណើរការសម្រាប់ខុនដូដែលផ្តោតលើប្រជាជនមានជីវភាពមធ្យម ប៉ុន្តែខុនដូដែលមានតម្លៃថ្លៃដែលផ្តោតលើប្រជាជនមានជីវភាពធូរធារខ្លាំងមានការលក់យឺតបន្តិច ។
អ្នកនាងបន្តថា ៖« វាមិនមានអ្វីគួរឲ្យបារម្ភនោះទេ បើទោះជាមានការបារម្ភពីការផ្គត់ផ្គង់លើសតម្រូវការក្តី ប៉ុន្តែទីផ្សារជាក់ស្តែងមិនមានបញ្ហានោះទេ» ។ យ៉ាងណាក៏ដោយ អ្នកនាងថា ៖« យើងពិតជាមានការលំបាកក្នុងការប្រមូលទិន្នន័យពីការលក់ ដោយសារគម្រោងខុនដូនីមួយៗ មិនបង្ហាញពីតម្លាភាពនៃការលក់របស់ពួកគេនោះទេ » ។
នៅពេលនិយាយពីទីផ្សារខុនដូ និងតម្រូវការ លោកឧកញ៉ាសៀ រិទ្ធី អគ្គនាយកក្រុមហ៊ុនWorld Bridge Land Group បានថ្លែងថា ករណីលើកឡើងថាទីផ្សារខុនដូមានបញ្ហានោះ សម្រាប់លោកមើលមិនឃើញថាមានបញ្ហានោះទេ ប៉ុន្តែវានឹងជាបញ្ហា ប្រសិនជាម្ចាស់ខុនដូសាងសង់មិនផ្តោតសំខាន់លើទីតាំង មិនមានផែនការ និងជំនាញច្បាស់លាស់ ។ ម្យ៉ាងទៀត ខុនដូដែលប្រឈមនឹងបញ្ហាដោយសារតែស្ថិតនៅទីតាំងមិនសមស្រប ឬមិនមានមូលដ្ឋានទុនវិនិយោគគ្រប់គ្រាន់ ។
លោកបន្តថា ៖« ខុនដូរបស់ខ្ញុំផ្តោតសំខាន់លើទីតាំង គុណភាពសំណង់ និងមានមូលដ្ឋានទុនវិនិយោគរឹងមាំ »។ លោកបន្តថា ៖«ខុនដូរបស់ខ្ញុំមិនមែនលក់ផ្ទះតែមួយមុខទេ តែខ្ញុំលក់Lifestyle សំដៅដល់គម្រោងដែលមានភាពចម្រុះ ផ្តល់ឲ្យអ្នកស្នាក់នៅអាចកម្សាន្ដ មានផាសុកភាព និងមានមូលដ្ឋាននៃតម្រូវការប្រចាំថ្ងៃ »។
ប្រធានសមាគមអ្នកវាយតម្លៃ និងភ្នាក់ ងារអចលនវត្ថុកម្ពុជា លោក គីម ហ៊ាង បានថ្លែងថា ការទិញខុនដូសម្រាប់វិនិយោគមិនសូវមានច្រើននោះទេ ដោយសារមិនសូវមានភាពចំណេញ និងពិបាកលក់ចេញ ប៉ុន្តែតម្លៃដីធ្លី និងផ្ទះ នៅតាមបុរីនានាបានបន្តកើនឡើង និងមានតម្រូវការច្រើន ។ លោកបន្តថា ការវិនិយោគខុនដូច្រើន មិនមានបញ្ហាក្នុងទីផ្សារនោះទេ វាអាស្រ័យលើពេលវេលាប៉ុណ្ណោះ ។
លោកបន្តថា៖ «បច្ចុប្បន្នម្ចាស់គម្រោងដែលរង់ចាំយកថវិកាពីអ្នកទិញមកសាងសង់ នឹងប្រឈមបញ្ហា ប៉ុន្តែប្រសិនជាម្ចាស់គម្រោងដែលមានលុយសាងសង់ពិតប្រាកដ នឹងទទួលបានជោគជ័យ»។
មន្ត្រីជាន់ខ្ពស់ក្រសួងដែនដី នគរូប-នីយកម្ម និងសំណង់ លោក ឡាវ ទិព្វសីហា បានឲ្យដឹងថា ក្នុងរយៈពេល៦ខែឆ្នាំនេះ ទីក្រុងរណបបុរីលំនៅឋានដែលមានលក្ខណៈជាបុរីសរុបចំនួន១៤ទីតាំង និងអគារខ្ពស់ចាប់ពី៥ជាន់ឡើងទៅសរុបចំនួន៤៣អគារ ។
គិតពីឆ្នាំ២០០០ដល់៦ខែឆ្នាំ២០១៧នេះ ទុនវិនិយោគវិស័យឯកជនមកពីបរទេសចំនួន១៨ប្រទេស មានចំនួន៣០៩គម្រោង ដែលមានផ្ទៃក្រឡាសំណង់សរុបជាង១៣លានម៉ែត្រការ៉េ និងតម្លៃប៉ាន់ស្មានទុនវិនិយោគសាងសង់ជាង៤.៦៨៦លានដុល្លារអាមេរិក ៕
ចែករំលែកព័តមាននេះ