រាជធានីភ្នំពេញ ៖ បច្ចុប្បន្ន ការផ្គត់ផ្គង់លំនៅឋាន មិនត្រឹមតែក្រុមហ៊ុនធំៗដែលមានឈ្មោះល្បីប៉ុណ្ណោះទេ ក្នុងនោះក៏មានក្រុមហ៊ុនតូចៗ និងមិនសូវមានកេរ្តិ៍ឈ្មោះ ក៏បានសម្រុកវាយលុកទីផ្សារមួយនេះផងដែរ ដោយបានប្រកាសលក់គម្រោងរបស់ខ្លួនក្នុងតម្លៃទាបសមរម្យ ខណៈដែលតម្រូវកំពុងមានសន្ទុះខ្លាំង ។ បើទោះបីជាការផ្គត់ផ្គង់លំនៅឋានពីក្រុមហ៊ុនមួយចំនួននៅតាមជាយក្រុងមានច្រើនក៏ពិតមែន តែសម្រាប់បុរីធំៗដែលមានកេរ្តិ៍ឈ្មោះបោះសំឡេង ក៏នៅតែបន្តការអភិវឌ្ឍលំនៅឋានផ្គត់ផ្គង់ជូនប្រជាពលរដ្ឋ និងមានកំណើនពីមួយឆ្នាំទៅមួយឆ្នាំ ។
លោក ទ្រី ម៉េងអាន ប្រធានគ្រប់គ្រងក្រុមហ៊ុនបុរីវិមានភ្នំពេញ បានឱ្យដឹងថា បើទោះបីជាមានការប្រកាសលក់ និងផ្គត់ផ្គង់លំនៅឋានក្នុងតម្លៃទាបជាច្រើនក្តី ក៏ប៉ុន្តែបច្ចុប្បន្ននេះ ការលក់លំនៅឋានរបស់ក្រុមហ៊ុនលោកនៅតែមានកំណើន ។ ជាក់ស្ដែងគម្រោងថ្មីៗតែងតែមានការគាំទ្រ និងលក់អស់ក្នុងរយៈពេលខ្លី បើទោះបីជាតម្លៃខ្ពស់ជាងការប្រកាសលក់របស់ក្រុមហ៊ុនតូចៗមួយចំនួនក៏ដោយ ។
លោកនិយាយថា ៖« យើងនឹងបន្តចេញគម្រោងថ្មីៗទៀត ដើម្បីផ្គត់ផ្គត់លំនៅឋានទៅតាមតម្រូវការរបស់ប្រជាពលរដ្ឋ ហើយគម្រោងក្រោយៗដែលត្រៀមនឹងចេញនេះ ក៏មិនមានតម្លៃទាបដែរ ហើយពេលនេះក្រុមហ៊ុនកំពុងសម្រុកផ្គត់ផ្គង់គម្រោងផ្ទះវីឡា ដែលមានតម្លៃខ្ពស់ៗសម្រាប់ផ្ដល់ជូនអតិថិជន » ។
លោកបន្តថា ក្រុមហ៊ុនលោកមិនមានការព្រួយបារម្ភពីការធ្លាក់ចុះ ឬមានបញ្ហាដោយសារតែមានក្រុមហ៊ុនតូចៗមួយចំនួនបំប៉ោងទីផ្សារនោះទេ ។ ជាក់ស្ដែង ក្រុមហ៊ុនខ្លះប្រកាសលក់ផ្ទះក្នុងតម្លៃតែជាង២ម៉ឺនដុល្លារ ខណៈខ្លួនមានផ្ទះតែពីរបីល្វែងសម្រាប់លក់ប៉ុណ្ណោះ ហើយក៏មិនដឹងថា គុណភាពផ្ទះនោះយ៉ាងណា ឬទីតាំងយ៉ាងម៉េចដែរ ។ ដូចនេះប្រជាពលរដ្ឋគួរតែស្រាវជ្រាវឱ្យបានច្បាស់លាស់ពីម្ចាស់អភិវឌ្ឍន៍គម្រោង និងឯកសារមួយចំនួនដែលពាក់ព័ន្ធ មុននឹងសម្រេចចិត្តទិញគម្រោងលំនៅឋានពីក្រុមហ៊ុនណាមួយសម្រាប់ស្នាក់នៅ ។
លោកក៏បានសម្ដែងនូវក្ដីបារម្ភថា នៅពេលអនាគត បើសិនជាសកម្មភាពបែបឃោសនា លើសពីការពិតនោះនៅតែម្ដង នឹងធ្វើឲ្យប៉ះពាល់មកលើបុរីមិនខាន ហើយអ្នករងគ្រោះគឺប្រជាពលរដ្ឋជាអ្នកទិញពីក្រុមហ៊ុនដែលមិនមានប្រវត្តិច្បាស់លាស់នេះឯង ។
លោក ប៉ែន សុខគា នាយកផ្នែកវាយតម្លៃនៃក្រុមហ៊ុនប៊ុណ្ណារៀលធីគ្រុប បានថ្លែងកាលពីពេលថ្មីៗនេះថា ទីផ្សារបុរីពិតជាងើបឡើង ដោយសារនៅតែមានតម្រូវការពីប្រជាពលរដ្ឋ និងការផ្តល់ឥណទានពីធនាគារ និងមីក្រូហិរញ្ញវត្ថុ ធ្វើឲ្យប្រជាពលរដ្ឋទទួលបានឥណទានកាន់តែងាយ ស្រួលជាងមុន ។
លោកបន្តថា ៖ « ការទទួលបានឥណទាន ងាយស្រួល ធ្វើឲ្យប្រជាពលរដ្ឋកាន់តែមានភាពងាយស្រួលក្នុងការទិញលំនៅឋាន ប៉ុន្តែបើឲ្យប្រជាពលរដ្ឋមានលុយទាំងកញ្ចប់ទៅទិញ ពួកគេមិនមាននោះទេ » ។ លោកបន្តថា ៖ « ជាមួយគ្នានេះ ខ្ញុំសង្កេតឃើញថា អ្នកអភិវឌ្ឍន៍នានាបានដាក់ចេញយុទ្ធសាស្ត្រទីផ្សារថ្មីដើម្បីលក់បុរីរបស់ខ្លួន ដូចជា ការទិញមិនមានប្រាក់កក់ជាដើម » ។
អគ្គនាយកក្រុមហ៊ុន Century21 Mekong លោក ច្រឹក សុខនីម ជាក្រុមហ៊ុនមានឯកទេសលើការទិញលក់លំនៅឋាននៅតាមបុរីនានា ថ្លែងថា ទីផ្សារបុរីបានកើនឡើងគួរឲ្យកត់សម្គាល់ទាំងលំនៅឋានថ្មី ការទិញផ្ទះបន្តនៅតាមបុរីនានាដើម្បីស្នាក់នៅ និងវិនិយោគយកប្រាក់ចំណេញ ។
លោកបន្តថា ៖ « អ្នកទិញលំនៅឋានប្រមាណ៤០% បានទិញយកប្រាក់ចំណេញ តែ៦០%ទិញស្នាក់នៅ ដោយសារប្រាក់ចំណូលប្រជាពលរដ្ឋកើនឡើង និងការភ័យខ្លាចពីការបោះឆ្នោតបានរសាយបន្តិចម្តងៗ » ។
អ្នកនាង សួ ស៊ូហ្វាង នាយកគ្រប់គ្រងទូទៅនៃបុរីរិទ្ឋ បានថ្លែងស្រដៀងគ្នាថា ការលក់បុរីនៅត្រីមាសទី២នេះ ពិតជាមានកំណើនក្នុងរង្វង់១០ទៅ២០% ដោយសារមិនសូវបារម្ភទាក់ទងនឹងការបោះឆ្នោតពីប្រជាពលរដ្ឋ ។ អ្នកទិញបុរីមានភាពចម្រុះ ដែល៥០%បង់រំលស់ និង៥០%ទៀតបង់ប្រាក់ដាច់ អាស្រ័យលើស្ថានភាពអតិថិជននីមួយៗ ។
តាមការបូកសរុបទិន្នន័យសំណង់ទូទាំងប្រទេសក្នុងរយៈពេល៦ខែដើមឆ្នាំ២០១៧ នេះក្រសួងរៀបចំដែនដីនគរូបនីយកម្ម និងសំណង់ បានផ្ដល់លិខិតអនុញ្ញាតសាងសង់ចំនួន១.៥២៣គម្រោង មានផ្ទៃក្រឡាសំណង់សរុបជាង៧,២លានម៉ែត្រការ៉េ និងមានតម្លៃប៉ាន់ស្មានជិត៥ពាន់លានដុល្លារអាមេរិក កើនឡើងជាង២៧% បើធៀបនឹងរយៈពេលដូចគ្នាកាលពីឆ្នាំមុន។ ដោយឡែកទិន្នន័យបុរីលំនៅឋាន និងអគារខ្ពស់ៗក្នុងរយៈពេល៦ខឆ្នាំនេះ មានទីក្រុងរណបបុរីលំនៅឋានលក្ខណៈជាបុរីសរុបចំនួន១៤ទីតាំង និងមានអគារខ្ពស់ចាប់ពី៥ជាន់ឡើងទៅ សរុបចំនួន៤៣អគារ ៕
ចែករំលែកព័តមាននេះ