រាជធានីភ្នំពេញ ៖ កម្លាំងនគរបាលបានឃាត់ខ្លួនលោក ថាច់ សេដ្ឋា អនុប្រធានគណបក្សភ្លើងទៀន នៅម្តុំវត្តសំរោងអណ្តែត ក្នុងសង្កាត់ភ្នំពេញថ្មី ខណ្ឌសែនសុខ នៅវេលាម៉ោងប្រហែល ៥និង៤០ល្ងាចថ្ងៃទី១៦ ខែមករា ឆ្នាំ២០២៣នេះ តាមដីកាតុលាការ ហើយបញ្ជូនខ្លួនទៅកាន់សាលាដំបូងរាជធានីភ្នំពេញ ភ្លាមៗ ។
ការចាប់ខ្លួនអនុប្រធានគណបក្សភ្លើងទៀនរូបនេះ ដោយអនុវត្តតាមដីកាបង្គាប់ឲ្យនាំខ្លួនរបស់លោក ទិត ដាលីន ចៅក្រមស៊ើបសួរសាលាដំបូងរាជធានីភ្នំពេញ ក្រោមបទចោទប្រកាន់មិនបំពេញកាតព្វកិច្ចចំពោះ ឧបករណ៍អាចជួញដូរបាន (ចេញសែកស្អុយ) ។
ប្រភពពីលោក ប្លង់ សុផល ព្រះរាជអាជ្ញារង និងជាអ្នកនាំពាក្យអយ្យការអមសាលាដំបូងរាជធានីភ្នំពេញ បានឲ្យដឹងថា នាយប់ថ្ងៃដដែលនេះ លោក ទិត ដាលីន ចៅក្រមស៊ើបសួរ សម្រេចឃុំខ្លួនលោក ថាច់ សេដ្ឋា ដាក់ពន្ធនាគារព្រៃស ជាបណ្តោះអាសន្ន ៕
ចែករំលែកព័តមាននេះ