តើហាត់ប្រាណពេលពោះទទេល្អសម្រាប់សុខភាពឬ?

ថ្ងៃទី ១៥ ខែ កក្កដា ឆ្នាំ ២០១៧

ម៉ោង ០៧:០០

ប្រសិនបើធ្លាប់ឆ្ងល់ថាតើការទទួលទានអាហារមុនពេលហាត់ប្រាណ ឬហាត់ប្រាណពេលពោះទទេ មួយណាមានអត្ថប្រយោជន៍ច្រើនជាង ឥឡូវនេះអ្នកស្រាវជ្រាវមានចម្លើយសម្រាប់សំនួររបស់អ្នកហើយ ។ ការសិក្សាថ្មីមួយបានរកឃើញថា ការហាត់ប្រាណនៅពេលពោះទទេល្អសម្រាប់សុខភាពនៅក្នុងរយៈពេលវែង ។

ការសិក្សានេះបានវិភាគលើឥទ្ធិពលនៃការបរិភោគធៀបនឹងការតមអាហារចំពោះដំណើរការនៃហ្សែនក្នុងជាលិកាខ្លាញ់ក្នុងការឆ្លើយតបទៅនឹងការធ្វើលំហាត់ប្រាណ ។

បន្ទាប់ពីបរិភោគអាហារ ជាលិកាខ្លាញ់រវល់ឆ្លើយតបទៅនឹងដំណើរការនៃអាហារនៅក្នុងរាងកាយរបស់យើង ហើយការធ្វើលំហាត់ប្រាណនៅពេលនេះនឹងមិនមានអត្ថប្រយោជន៍ចំពោះជាលិកាខ្លាញ់នោះទេ ។ នេះបើតាមការពន្យល់របស់អ្នកនិពន្ធនៃការសិក្សានេះលោក Dylan Thompson មកពីសាកលវិទ្យាល័យ Bath នៅប្រទេសអង់គ្លេស ។

លោកThompson បន្ថែមថា«ការរធ្វើលំហាត់ប្រាណនៅពេលពោះទទេនឹងធ្វើឲ្យមានបម្រែបម្រួលដ៏ល្អនៅក្នុងជាលិកាខ្លាញ់ ហើយវាអាចមានប្រយោជន៍ចំពោះសុខភាពក្នុងរយៈពេលវែង » ។

អ្នកចូលរួមក្នុងការស្រាវជ្រាវនេះជាបុរសធាត់មួយក្រុមដែលបានដើររយៈពេល៦០នាទី ប្រើប្រាស់អុកស៊ីសែនអតិបរិមា៦០% នៅពេលពោះទទេ ហើយមួយក្រុមផ្សេងទៀតធ្វើលំហាត់ប្រាណពីរម៉ោងក្រោយពេលទទួលទានអាហារពេលព្រឹកដែលសម្បូរជាតិកាបូអ៊ីដ្រាតដែលមានកាឡូរីខ្ពស់ ។

ការបង្ហាញនៃហ្សែនទាំងពីរគឺ PDK4 និង HSL កើនឡើងនៅពេលដែលបុរសទាំងនេះមិនបរិភោគអាហារ ហើយហាត់ប្រាណ និងថយចុះនៅពេលដែលពួកគេបរិភោគមុនពេលធ្វើលំហាត់ប្រាណ ។ ការកើនឡើងហ្សែន PDK4 ទំនងជាបង្ហាញថា ជាតិខ្លាញ់ដែលត្រូវបានរក្សាទុកក្នុងខ្លួនត្រូវបានរាងកាយប្រើប្រាស់ដើម្បីជំរុញការធ្វើមេតាបូលីសក្នុងអំឡុងពេលធ្វើលំហាត់ប្រាណជំនួសឱ្យសារជាតិកាបូអ៊ីដ្រាតដែលបានមកពីអាហារ ។

ការសិក្សានេះឲ្យដឹងថា «នេះគឺជាការស្រាវជ្រាវដំបូងដើម្បីបង្ហាញថាការបរិភោគមុនពេលធ្វើលំហាត់ប្រាណផ្តល់ផលប៉ះពាល់ដល់ដំណើរការនៃហ្សែនជាលិកាខ្លាញ់ក្រោយពេលធ្វើលំហាត់ប្រាណ » ៕