រាជធានីភ្នំពេញ ៖ ខណៈដែលការប្រមូលផលស្រូវរដូវប្រាំងលើកទី២ឈានមកដល់ តម្លៃស្រូវហាក់ដូចប្រសើរជាងឆ្នាំមុនៗបន្ដិច ធ្វើឲ្យកសិករមានទឹកចិត្តធ្វើស្រែខ្លះ ហើយសង្ឃឹមថា នៅពេលប្រមូលផលពេញលេញ តម្លៃនឹងកាន់តែប្រសើរថែមទៀត ។ ការលើកឡើងបែបនេះ ដោយសារឆ្នាំកន្លងមក មានការលើកឡើងថា កសិករប្រមូលផលស្រុះគ្នាពេក នាំឲ្យតម្លៃធ្លាក់ចុះ ដែលនោះមិនមែនជាហេតុផលសមស្រប ។
កសិករនៅស្រុកពាមជ័រ ខេត្តព្រៃវែង បានលើកឡើងដូចៗគ្នាថា ការប្រមូលផលស្រូវប្រាំងលើកទី២បានចាប់ផ្ដើមបណ្ដើរៗហើយ ក្នុងនោះឃើញថា តម្លៃខ្ពស់ជាងឆ្នាំមុន ។ យ៉ាងណាក៏ដោយ បើទោះបីជាតម្លៃលើទីផ្សារប្រសើរជាងក្ដី ប៉ុន្ដែទិន្នផលស្រូវបែរជាធ្លាក់ចុះ ធ្វើឲ្យពួកគាត់នៅតែជួបបញ្ហាដដែល ។
លោក ខៀវ សារឿន កសិករម្នាក់នៅភូមិស្ពាន ឃុំកោះចេក ស្រុកពាមជ័រ បានអះអាងថា ៖« តម្លៃស្រូវសព្វថ្ងៃខ្ពស់ជាងឆ្នាំមុន គឺក្នុង១គីឡូក្រាមតម្លៃ៨៥០រៀលសម្រាប់ស្រូវសើម និង៩៥០រៀលសម្រាប់ស្រូវស្ងួត បើធៀបនឹងឆ្នាំមុនមានតម្លៃត្រឹមតែ៦៥០ទៅ៧០០រៀលប៉ុណ្ណោះសម្រាប់ស្រូវសើម និង៨០០រៀលសម្រាប់ស្រូវស្ងួត » ។
បើទោះបីជាតម្លៃលើទីផ្សារប្រសើរជាងឆ្នាំមុនក៏ដោយ ក៏ការប្រមូលផលរបស់ពួកគាត់ក្នុងរដូវទីពីរនេះហាក់ដូចជាធ្លាក់ចុះគួរឲ្យកត់សម្គាល់ ហើយកសិករខ្លះលើកឡើងថា ដោយសារតែឆ្នាំនេះភ្លៀងធ្លាក់ច្រើនចំពេលស្រូវកំពុងចេញដង្ហើម ធ្វើឲ្យគ្រាប់ស្រូវប្រែពណ៌ជាខ្មៅ និងសម្បូរសម្ដីច្រើន ។
លោកសារឿនបន្ដថា ជារៀងរាល់ឆ្នាំ ទិន្នផលស្រូវប្រាំងនៅរដូវទី១ គឺទទួលបានចន្លោះពី៦ទៅ៨តោនក្នុង១ហិកតា ខណៈរដូវទី២ ក្នុង១ហិកតា ប្រមូលផលបានចន្លោះពី៤ទៅ៦ហិកតា ប៉ុន្ដែក្នុងរដូវទី២ឆ្នាំនេះវិញ គឺទទួលបានត្រឹមតែ២តោនកន្លះទៅ៣តោនកន្លះប៉ុណ្ណោះ ខុសគ្នាជាងពាក់កណ្ដាល ។
ការថយចុះនូវទិន្នផលនេះ បើតាមលោក ម៉ិល គីរី មេឃុំកោះចេក បានឲ្យដឹងថា តម្លៃស្រូវឆ្នាំនេះថ្លៃគួរសម តែទិន្នផលស្រូវរដូវទីពីរនេះបានថយចុះច្រើន បើធៀបនឹងរដូវទី១ ឬឆ្នាំមុនៗ ដោយសារតែឆ្នាំនេះ ភ្លៀងធ្លាក់ច្រើនពេកធ្វើឲ្យប៉ះពាល់ដល់ការលូតលាស់ដំណាំស្រូវ ។
អ្នករកស៊ីក្នុងវិស័យស្រូវអង្ករលោកឧកញ៉ា ភួ ពុយ បានឲ្យដឹងថា ឆ្នាំ២០១៧នេះ ការប្រមូលទិញស្រូវពីប្រជាកសិករអាចមានតម្លៃប្រសើរជាងឆ្នាំមុន ។ លោកឧកញ៉ាបានលើកឡើងបែបនេះនៅក្នុងកិច្ចប្រជុំពិភក្សាមួយកាលពីរសៀលថ្ងៃទី១១ កក្ដដា នៅសាលាខេត្តបន្ទាយមានជ័យ គ្រាដែលលោកបានទិញស្រូវចំនួន៥៥ម៉ឺនតោនរួចហើយ ។
លោកឧកញ៉ាថ្លែងថា៖« ឆ្នាំ២០១៧នេះ រាជរដ្ឋាភិបាលបានផ្តល់ឥណទានតាមរយៈធនាគារអភិវឌ្ឍន៍ជនបទ នូវថវិកាចំនួន២៧លានដុល្លារសម្រាប់ប្រមូលទិញស្រូវប្រជាកសិករសំដៅរក្សាស្ថិរភាពតម្លៃស្រូវក្នុងប្រទេស » ។
លោកឧកញ៉ាបន្ដថា រាជរដ្ឋាភិបាលកម្ពុជាក៏បានផ្តល់ឥណទានចំនួន១៥លានដុល្លារសម្រាប់កសាងឡសម្ងួតនៅខេត្តបាត់ដំបង ដែលតម្រូវការសម្ងួតក្នុង១ថ្ងៃបាន៧ពាន់ទៅ៨ពាន់តោន និងធ្វើឃ្លាំងដែលអាចស្ដុកស្រូវបាន២០ម៉ឺនតោនផងដែរ ដូច្នេះអាចថា តម្លៃស្រូវឆ្នាំនេះ និង២០១៨ នឹងប្រសើរជាងឆ្នាំ២០១៦ ។
លោក ប៉ុក ឡាយជី អនុប្រធានមន្ទីរពាណិជ្ជកម្មខេត្តបន្ទាយមានជ័យបានមានប្រសាសន៍ដែរថា ឆ្នាំ២០១៦កន្លងមក ការប្រមូលទិញស្រូវពីប្រជាកសិករនៅមានកម្រិតនៅឡើយ ហើយឈ្មួញ កណ្តាលផ្ដល់តម្លៃទាប ធ្វើឲ្យទីផ្សារស្រូវជួបមានបញ្ហា ទើបឆ្នាំនេះរាជរដ្ឋាភិបាលកម្ពុជាបានយកចិត្តទុកដាក់ ធ្វើយ៉ាងណាឲ្យវិស័យនេះកាន់តែប្រសើរឡើង ៕
ចែករំលែកព័តមាននេះ