ខេត្តពោធិ៍សាត់ ៖ កម្មករសំណង់មួយក្រុមក្រោយពីបញ្ចប់ការងារបានផឹកស៊ីជួបជុំគ្នាយ៉ាងសប្បាយរីករាយ លុះពេលស្រវឹងមានទំនាស់ពាក្យសម្ដីគ្នាឈានដល់កាប់គ្នារងរបួសយ៉ាងធ្ងន់ធ្ងរ។ ករណីអំពើហិង្សានេះបានកើតឡើងកាលពីថ្ងៃទី១២ ខែកក្កដា ឆ្នាំ២០១៧ វេលាម៉ោង១០ និង៥២នាទីយប់ នៅភូមិឯកភាព ឃុំថ្មដាស្រុកវាលវែង។ សមត្ថកិច្ចបានធ្វើការឃាត់ខ្លួនជនដៃដល់ភ្លាមៗក្រោយពេលកើតហេតុ។ លោក ពេជ សោភ័ណ មេប៉ុស្ដិ៍រដ្ឋបាលថ្មដាឲ្យដឹងថា ជនដៃដល់ឈ្មោះ អ៊ុន រ័ត្ន ភេទប្រុស អាយុ៣២ឆ្នាំ និងជនរងគ្រោះឈ្មោះ សោម រ៉ាឌី ភេទប្រុស អាយុ៣០ឆ្នាំ។
ទាំងពីរនាក់ជាកម្មករសំណង់រស់នៅភូមិឃុំកើតហេតុជាមួយគ្នា។ នៅយប់កើតហេតុនោះជនដៃដល់ និងជនរងគ្រោះរួមជាមួយកម្មករសំណង់ដូចគ្នាពីរបីនាក់ទៀត បានផឹកស៊ីជាមួយគ្នានៅកន្លែងផ្សេង។ ពួកគេផឹកស៊ីតាំងពីព្រលប់រហូតដល់ពេលយប់ ដែលម្នាក់ៗមានអាការៈស្រវឹងនិយាយគ្នាលែងស្ដាប់ទៅហើយ។ ខណៈនោះក៏កើតមានទំនាស់ពាក្យសម្ដីគ្នារហូតប្រកែកគ្នាយ៉ាងតឹងមាត់តឹងក ហើយក៏បញ្ចប់កម្មវិធីទៅកន្លែងសម្រាករៀងៗខ្លួន។
លុះនៅវេលាម៉ោង១០ និង៥២នាទីយប់ ឈ្មោះ អ៊ុន រ័ត្ន ដែលជាជនដៃដល់បានលីកកាំបិតទៅកាប់ឈ្មោះ សោម រ៉ាឌី ដែលកំពុងដេកលក់ក្នុងអង្រឹងចំមុខមួយកាំបិតរយះពីមាត់ដល់ថ្ពាល់បណ្ដាលឲ្យរងរបួសយ៉ាងធ្ងន់ធ្ងរ។ ភ្លាមៗនោះកម្លាំងនគរបាលប៉ុស្ដិ៍រដ្ឋបាលថ្មដា ដែលនៅមិនឆ្ងាយប៉ុន្មានពីទីនោះចាប់ឃាត់ខ្លួនបានភ្លាមៗតែម្ដង។ ជនសង្ស័យត្រូវសមត្ថកិច្ចបានកសាងសំណុំរឿងបញ្ជូនទៅសាលាដំបូងខេត្តដើម្បីចាត់ការតាមផ្លូវច្បាប់។ ចំណែកជនរងគ្រោះកំពុងសម្រាកព្យាបាលនៅមណ្ឌលសុខភាពថ្មដា៕
ចែករំលែកព័តមាននេះ