ប្រេស៊ីល ៖ លោកល្វីស អីុណាស៊ីយ៉ូលូឡា ស្ថាបនិកគណបក្សពលករ PT ប្រេស៊ីល និងជាប្រធានាធិបតីពីឆ្នាំ២០០៣ ដល់២០១០ កាលពីថ្ងៃទី១២ កក្កដា ទទួលការកាត់ទោសដាក់គុក៩ឆ្នាំ និង៦ខែ ពីបទ
ប្រេស៊ីល ៖ លោកល្វីស អីុណាស៊ីយ៉ូលូឡា ស្ថាបនិកគណបក្សពលករ PT ប្រេស៊ីល និងជាប្រធានាធិបតីពីឆ្នាំ២០០៣ ដល់២០១០ កាលពីថ្ងៃទី១២ កក្កដា ទទួលការកាត់ទោសដាក់គុក៩ឆ្នាំ និង៦ខែ ពីបទពុករលួយ និងលាងលុយកខ្វក់ និងពីបទទទួលសំណូក ក្រោមរូបភាពជាផ្ទះមួយ ។ លោកសម្រេចធ្វើការតវ៉ានៅសាលាឧទ្ធរណ៍ប្រេស៊ីល និងនៅ អ.ស.ប ។
លោកល្វីស អីុណាស៊ីយ៉ូលូឡាដា ស៊ីលវ៉ាជាតំណាងឱ្យក្រុមឆ្វេងនិយមប្រេស៊ីលនឹងនៅមានសេរីភាពរង់ចាំការវិនិច្ឆ័យនៅសាលាឧទ្ធរណ៍ ។ សាលក្រមកាត់ទោសនេះចេញមកពីការិយាល័យរបស់លោក SERGIO MORO ចៅក្រមពិសេសនៃប្រតិបត្តិការមានឈ្មោះថា «LAVAGE EXPRESS» ដែលកាត់ក្តីរួចហើយអ្នកនយោបាយជាច្រើនសិបនាក់ទាក់ទិននឹងរឿងអាស្រូវពុករលួយជាមួយក្រុមហ៊ុនប្រេងយក្សប្រទេស PETROBRA ។
ក្នុងសេចក្តីសម្រេចមួយចៅក្រមរូបនេះនិយាយថា ដោយសារនេះជាការកាត់ទោសដាក់គុកអតីតប្រធានាធិបតីមួយរូបនោះគេត្រូវប្រុងប្រយ័ត្នរង់ចាំការវិនិច្ឆ័យរបស់សាលាឧទ្ធរណ៍សិន ។
បណ្តាមេធាវីរបស់លោកលូឡា បានបញ្ចេញប្រតិកម្មភ្លាមៗចំពោះការកាត់ទោសនេះ ដោយមេធាវីម្នាក់អះអាងប្រាប់ AFP ថា យើងតវ៉ាទៅសាលាឧទ្ធរណ៍ ហើយធ្វើការតវ៉ាបង្ហាញពីភាពស្លូតត្រង់នៅមុខរាល់តុលាការដែលគ្មានការលម្អៀង ក្នុងនោះមានទាំងនៅ អ.ស.ប ផង ។
លោកលូឡា អាយុ៧១ឆ្នាំ នឹងពុំត្រូវបង្ខំចាប់ដាក់ពន្ធនាគារឡើយក្នុងពេលភ្លាមៗ ក៏ប៉ុន្តែប្រសិនបើការកាត់ទោសនេះត្រូវតុលាការសាលាឧទ្ធរណ៍គាំទ្រនោះ អតីតប្រមុខរដ្ឋរូបនេះនឹងត្រូវជាប់គុក ហើយនឹងពុំអាចឈរឈ្មោះជាបេក្ខជនសម្រាប់ការបោះឆ្នោតប្រធានាធិបតីឆ្នាំ២០១៨ឡើយ ។ លោកលូឡា ដែលទទួលការចោទប្រកាន់៤ករណីផ្សេងទៀត បដិសេធការចោទប្រកាន់ទាំងនេះប្រឆាំងរូបលោក ដោយលោកគូសបញ្ជាក់ថា ពុំមានភស្តុតាងជាក់ស្តែងនានាឡើយ ។
អតីតកម្មកររោងចក្រស្លដែកម្នាក់ លោកលូឡា ជាប្រធានាធិបតីប្រេស៊ីលពីឆ្នាំ២០០៣ ដល់២០១០ ហើយជាអ្នកមានប្រជាប្រិយភាពខ្ពស់បំផុតរហូតពេលចាកចេញពីអំណាច ៕
ចែករំលែកព័តមាននេះ