មនុស្សភាគច្រើនអាចឆ្ងល់ពីប្រព័ន្ធបច្ចេកវិទ្យានៃរថយន្ដ ដូចជា ធ្វើយ៉ាងណាទើបរថយន្ដអាចបើកបរដោយខ្លួនឯង ឬចតដោយខ្លួនឯងបាន ជាដើម។ ដោយឡែកថ្ងៃនេះ សារព័ត៌មានកោះសន្ដិភាព ផ្នែក «យានយន្ដ និងបច្ចេកវិទ្យា» សូមនាំលោកអ្នកមកចាប់អារម្មណ៍សំណួរងាយមួយ ដែលអ្នកខ្លះគិតថា ពិបាកឆ្លើយ នោះគឺ ហេតុអ្វីបានជារថយន្ដមានកង់៤ ?
សំណួរនេះត្រូវបានក្មេងប្រុសអាយុ៧ឆ្នាំម្នាក់ សួរទៅអ្នកជំនាញ ដែលធ្វើឲ្យរូបគាត់ភ្ញាក់ព្រើតតែម្ដង ។ ទោះបីយ៉ាណា អ្នកជំនាញរូបនោះមិនបានឆ្លើយតបភ្លាមៗទេ ក្រោយមកទើបគាត់ដឹង ចម្លើយនោះគឺ ៖
មូលហេតុដែលគេផលិតរថយន្តមកមានកង់យ៉ាងតិចបួន (ភាគតិចបំផុតដែលមានបី) គឺដើម្បីធ្វើឲ្យការចែករំលែកទម្ងន់មានភាពស្មើគ្នាល្អ ពោលគឺដើម្បីរក្សាការចែកទម្ងន់ឲ្យបានល្អ គឺ យើងត្រូវដាក់កង់នៅចុងជ្រុងនីមួយៗ ។
រថយន្តជាទូទៅមានរាងចតុកោណកែង ដែលតម្រូវឲ្យយើងធ្វើវាឡើងដោយដាក់កង់បួននៅជ្រុងទាំងបួន ។ ចំពោះយន្តហោះវិញ គឺមានរាងត្រីកោណ ដែលត្រូវការកង់យ៉ាងតិចបី ។
ម្យ៉ាងវិញទៀត យើងក៏ធ្លាប់ឃើញមានរថយន្តកង់៣ផងដែរ (ក្នុងខ្សែភាពយន្ដ Mr. Bean) តែមានភាគតិចបំផុត ហើយឥឡូវនេះរកស្ទើរតែគ្មាន ។ នេះមកពីការដាក់កង់បី អាចធ្វើឲ្យរថយន្តងាយនឹងក្រឡាប់ ជាពិសេស គឺនៅផ្លូវកោង ។
ក្រៅពីការចែកទម្ងន់ឲ្យស្មើគ្នាល្អហើយ ក៏មានកត្តាសំខាន់មួយទៀតដែរ គឺទំនាញ និងការទប់លំនឹង ។ គេផលិតរថយន្តមកមានកង់យ៉ាងតិចបួន គឺដើម្បីរក្សាលំនឹងឲ្យបានល្អ និងងាយស្រួលក្នុងការបញ្ជានៅលើដងផ្លូវ ។
ដូចនេះហើយ ទើបសព្វថ្ងៃយើងឃើញស្ទើរតែគ្រប់រថយន្ត គឺមានកង់បួន (លើកលែងតែរថយន្ដដឹកទំនិញធំៗ) ៕
ចែករំលែកព័តមាននេះ