កត្តាគ្រោះថ្នាក់នៅពេលបើកបររថយន្ត ឬម៉ូតូបានកើនឡើងខ្លាំងក្នុងរដូវវស្សា ។ ពួកយើងមិនអាចគ្រប់គ្រងភ្លៀងបានទេ ប៉ុន្តែយើងអាចថែទាំរថយន្តរបស់យើងបាន ។
នេះជាគន្លឹះខ្លះៗក្នុងការថែរក្សារថយន្តនៅរដូវវស្សា ដែលមិនត្រឹមតែជួយឲ្យអ្នកបើកបរមានសុវត្ថិភាពប៉ុណ្ណោះទេ ថែមទាំងជួយថែរក្សាស្ថានភាពរថយន្តរបស់អ្នកបានពេញមួយរដូវកាលនេះផងដែរ ។
១-ថែទាំកង់រថយន្ត ៖
ក្នុងអំឡុងរដូវវស្សា វាមានសារសំខាន់ខ្លាំងណាស់ដើម្បីថែទាំសម្បកកង់រថយន្តឲ្យនៅក្នុងសភាពល្អបំផុត ។ នៅលើផ្លូវសើម រថយន្តប្រឈមមុខនឹងភាពរអិលខ្លាំងណាស់ ។ វាអាចបណ្តាលមកពីជម្រៅក្រឡាកង់ ល្បឿនរថយន្ត និងសណ្ឋានផ្លូវខុសៗគ្នា ។
ដើម្បីកាត់បន្ថយហានិភ័យនេះ សូមត្រួតពិនិត្យមើលសម្បកកង់របស់អ្នកឲ្យបានទៀងទាត់ដើម្បីធានាថា ជម្រៅក្រឡាកង់មានសុវត្ថិភាពចំពោះការបើកបរ ។ ប្រសិនបើក្រឡាទាំងនោះសឹក សូមប្តូរសម្បកឲ្យបានឆាប់តាមដែលអាចធ្វើទៅបាន ។
២-ឧបករណ៍ជូតកញ្ចក់ខាងមុខ ៖
ឧបករណ៍ជូតកញ្ចក់ខាងមុខងាយនឹងសឹក។ អ្នកគួរតែត្រួតពិនិត្យ ឬផ្លាស់ប្តូរវាមុនពេលរដូវវស្សាមកដល់ ។ ស្របគ្នានេះដែរ សូមពិនិត្យមើលថា ឧបករណ៍នេះមានដំណើរការត្រឹមត្រូវនៅគ្រប់ល្បឿនទាំងអស់ ។ អ្នកគួរតែបំពេញទឹកក្នុងដបទឹកជូតកញ្ចក់នេះឲ្យបានពេញ ហើយអាចបន្ថែមសាប៊ូបន្តិចដើម្បីរក្សាកញ្ចក់របស់អ្នកឲ្យភ្លឺស្អាត ។
៣-ហ្វ្រាំង ៖
ហ្វ្រាំងគឺជាផ្នែកមួយដ៏សំខាន់បំផុតនៃរថយន្ត។ អ្នកគួរតែសម្អាតវាជាប្រចាំ និងផ្លាស់ប្តូរប្រសិនបើចាំបាច់ ។ គួរតែត្រួតពិនិត្យប្រេងហ្វ្រាំង និងខ្សែហ្វ្រាំងដើម្បីធានាថា គ្មានខ្យល់ ឬទឹកចូលទៅក្នុងនោះ ។ ម្យ៉ាងទៀត ត្រូវធានាថា រថយន្តមានឈ្នាន់ហ្វ្រាំងគ្រប់គ្រាន់ដើម្បីទទួលបានប្រតិបត្តិការហ្វ្រាំងដ៏ល្អបំផុត ។
៤-តួរថយន្ត ៖
សូមកុំឱ្យទឹក ឬទឹកភ្លៀងជាប់នៅលើរថយន្តរបស់អ្នកយូរ ។ វាអាចប៉ះពាល់យ៉ាងធ្ងន់ធ្ងរទៅលើថ្នាំរថយន្ត និងលំបាកថែរក្សាថ្នាំរថយន្តនៅពេលបើកបរកាត់ភ្លៀង ។ អ្នកអាចប្រើថ្នាំប៉ូលាដើម្បីបង្កើតជាស្រទាប់ស្តើងការពារថ្នាំរថយន្ត។ ថ្នាំប៉ូលាមិនត្រឹមតែអាចការពារថ្នាំរថយន្តប៉ុណ្ណោះទេ ប៉ុន្តែវាក៏នឹងធ្វើឲ្យទឹកភ្លៀងរអិលចេញពីតួរថយន្តបានយ៉ាងងាយស្រួលផងដែរ ។
៥-ពិនិត្យចង្កៀងមុខ-ក្រោយ ៖
ចង្កៀងមុខ និងចង្កៀងក្រោយរបស់រថយន្តមានសារសំខាន់ជាងពេលណាទាំងអស់ក្នុងរដូវវស្សា ។ វាមិនគ្រាន់តែសម្រាប់បំភ្លឺនៅពេលងងឹត និងមានព្យុះភ្លៀងប៉ុណ្ណោះទេ ប៉ុន្តែវាក៏បង្ហាញពីទីតាំងរបស់យើងបានច្បាស់ដល់អ្នកបើកបរផ្សេងទៀតផងដែរ ៕
ចែករំលែកព័តមាននេះ