Facebook បានចេញកម្មវិធីថ្មីមួយដើម្បីស្វែងរកWiFi (Find Wi-Fi)សម្រាប់ទូរស័ព្ទiPhone និងAndroid ជុំវិញពិភពលោក។ លក្ខណៈពិសេសនេះ អនុញ្ញាតឲ្យអ្នកប្រើប្រាស់ស្វែងរកកន្លែងដែលផ្តល់សេវាកម្មអីុនធើរណេតដោយមិនគិតថ្លៃ ឬជាសាធារណៈតាមរយៈទីតាំងរបស់អ្នកប្រើប្រាស់ ។
Facebookបានឲ្យដឹងថា ៖« ពួកយើងបានចាប់ផ្តើមបញ្ចេញកម្មវិធី Find Wi-Fi ក្នុងប្រទេសមួយចំនួនកាលពីឆ្នាំមុន និងប្រទះឃើញថា វាមិនត្រឹមតែអាចជួយដល់មនុស្សដែលធ្វើដំណើរកម្សាន្តកំពុងតែប្រញាប់ទេ តែវាក៏អាចជួយក្នុងពេលដែលអ្នកប្រើប្រាស់ស្ថិតក្នុងតំបន់ដែលមិនអាចប្រើប្រាសអុីនធើរណេតតាមសេវាកម្មទូរស័ព្ទផងដែរ »។
ប៉ុន្តែដើម្បីប្រើប្រាស់លក្ខណៈពិសេសនេះបាន អ្នកត្រូវតែប្រើប្រាស់Data ពីទូរស័ព្ទរបស់អ្នកជាមុនសិន ដើម្បីមើលឃើញពីWi-Fi Hotspot ដែលមានក្នុងតំបន់របស់អ្នក សូមចុចលើពាក្យថា More ក្នុងកម្មវិធី Facebook របស់អ្នក និងស្វែងរកពាក្យថា Find Wi-Fi ។ ពេលនោះ Facebook នឹងទាញព័ត៌មានពី Page អាជីវកម្មផ្សេងៗ នេះមានន័យថា អ្នកអាចមើលឃើញតែកន្លែងអាជីវកម្មដែលបង្ហាញថាពួកគេមានWiFi ដោយឥតគិតថ្លៃលើទំព័រ Facebook របស់ពួកគេតែប៉ុណ្ណោះ ។
Find Wi-Fi តម្រូវឲ្យអ្នកបើកLocation History ផងដែរ ។ ពេលដែលអ្នកបើកវាហើយ Facebook នឹងបន្ថែមទីតាំងរបស់អ្នកទៅកាន់ Activity Log ជាប្រចាំ បើទោះជាអ្នកមិនបានបើកដំណើរការកម្មវិធីនេះក៏ដោយ ។
ប៉ុន្តែវាសំខាន់ណាស់ក្នុងការប្រុងប្រយ័ត្នពេលដែលអ្នកប្រើប្រាស់អុីនធើរណេតជាសាធារណៈ ព្រោះHacker អាចនឹងប្រើប្រាស់បណ្តាញដូចគ្នាជាមួយនឹងអ្នកក្នុងហាងកាហ្វេ ឬកន្លែងណាមួយបាន ។
អ្នកត្រូវតែប្រាកដថា អ្នកចែករំលែកទិន្នន័យរបស់អ្នក តាមរយៈតែបណ្តាញSSLតែប៉ុណ្ណោះ មានន័យថា គេហទំព័រដែលមានhttps។ អ្នកក៏អាចបើក HTTPS Everywhere ដើម្បីជួយបានផងដែរ ។ ជាងនេះទៅទៀត VPN អាចជួយបិទបាំងការប្រើប្រាស់របស់អ្នកមិនឲ្យអ្នកដទៃឃើញ សូមសាកល្បងទាំងអស់គ្នា ៕
ចែករំលែកព័តមាននេះ