ខេត្តពោធិ៍សាត់ ៖ លោកតាម្នាក់អាយុ៨៧ឆ្នាំជិះកង់ដើរលក់ឱសថបូរាណតាំងពីស្រុកភ្នំក្រវាញដល់ក្រុងពោធិ៍សាត់ចៃដន្យជួបគ្រោះថ្នាក់ចរាចរណ៍ដួលខ្លួនឯងសន្លប់នៅពាក់កណ្ដាលផ្លូវ
ខេត្តពោធិ៍សាត់ ៖ លោកតាម្នាក់អាយុ៨៧ឆ្នាំជិះកង់ដើរលក់ឱសថបូរាណតាំងពីស្រុកភ្នំក្រវាញដល់ក្រុងពោធិ៍សាត់ចៃដន្យជួបគ្រោះថ្នាក់ចរាចរណ៍ដួលខ្លួនឯងសន្លប់នៅពាក់កណ្ដាលផ្លូវបានត្រូវកម្លាំងនគរបាលប៉ុស្ដិ៍រដ្ឋបាលផ្ទះព្រៃ និងប្រជាការពារជួយសង្គ្រោះបានទាន់ពេលវេលា ។ ហេតុការណ៍នេះបានកើតឡើងកាលពីវេលាម៉ោង១០ព្រឹកថ្ងៃទី១២ ខែកក្កដា ឆ្នាំ២០១៧ នៅភូមិត្នោតទ្រេត សង្កាត់ផ្ទះព្រៃ ក្រុងពោធិ៍សាត់ ។
លោកវរសេនីយ៍ឯក ប៉ិច ស៊ីផាន់ មេប៉ុស្តិ៍រដ្ឋបាលផ្ទះព្រៃបានឲ្យដឹងថា ជនរងគ្រោះឈ្មោះ អឿង រ៉ម ភេទប្រុស អាយុ៨៧ឆ្នាំ រស់នៅភូមិអូរឫស្សី ឃុំបាក់ចិញ្ចៀន ស្រុកភ្នំក្រវាញ មានមុខរបរជាគ្រូផ្សំថ្នាំបូរាណ ។ ក្រៅពីអតិថិជនទៅទិញដល់ផ្ទះគាត់តែងជិះកង់ដើរលក់ដោយខ្លួនឯងនៅគ្រប់ទីកន្លែងនានាក្នុងខេត្តពោធិ៍សាត់ដើម្បីបានលុយបន្តិចបន្តួចដោះស្រាយជីវភាពគ្រួសារ ។ ជាក់ស្ដែងនៅថ្ងៃនោះលោកតាបានជិះកង់ដើរលក់ដូចសពដង ប៉ុន្តែចៃដន្យពេលធ្វើដំណើរមកដល់ភូមិត្នោតទ្រេត សង្កាត់ផ្ទះព្រៃ ក្រុងពោធិ៍សាត់ គាត់បានវិលមុខដួលកង់សង្កត់លើបណ្ដាលឲ្យសន្លប់រងរបួសដៃជើង និងក្បាលបន្តិចបន្តួច ។ ឃើញដូច្នេះកម្លាំងប្រជាការពារ និងប៉ុស្ដិ៍រដ្ឋបាលផ្ទះព្រៃបានជួយសង្គ្រោះទៅតាមទម្លាប់ទាន់ពេលវេលាដោយមិនបានយកទៅមន្ទីរពេទ្យនោះទេ ។
ប្រភពព័ត៌មានពីប្រជាពលរដ្ឋនៅភូមិអូរឫស្សី ឃុំបាក់ចិញ្ចៀន ស្រុកភ្នំក្រវាញ បានឲ្យដឹងថា លោកតានៅពីរនាក់យាយតាលើដីអ្នកដទៃដែលគេឲ្យរស់នៅបណ្ដោះអាសន្នក្នុងផ្ទះស្លឹកលិចធ្លុះធ្លាយ ។ ដោយសារជីវភាពខ្វះខាតច្រើនហូបចុកមិនបានគ្រប់គ្រាន់ហើយគាត់ចាស់ជរា និងកម្លាំងចុះខ្សោយផងនោះទើបគាត់ជួបគ្រោះថ្នាក់ជិះកង់វិលមុខដួលបែបនេះ ។ មានការកោតសរសើពីប្រជាពលរដ្ឋថា ទោះបីលោកតាមានអាយុដល់ទៅ៨៧ឆ្នាំជាជនចាស់ជរាទៅហើយក៏ដោយ ក៏លោកតានៅអាចជិះកង់ដើរលក់ឱសថបូរាណបានទៀតដោយពឹងលើកម្លាំងញើសឈាមខ្លួនឯងគឺពិតជាអស្ចារ្យមែន ៕
ចែករំលែកព័តមាននេះ