រាជធានីភ្នំពេញ ៖ ស្របពេលទីផ្សារម៉ូតូថ្មីកាន់តែច្រើន និងម៉ូតូច្នៃដឹកទិញ និងអ្នកដំណើរកាន់តែសម្បូរបែបនោះ កំពុងតែធ្វើឲ្យអ្នកលក់ម៉ូតូជជុះបាត់បង់ចំណែកទីផ្សារជាបន្ដបន្ទាប់ ហើយការបាត់បង់នេះ
រាជធានីភ្នំពេញ ៖ ស្របពេលទីផ្សារម៉ូតូថ្មីកាន់តែច្រើន និងម៉ូតូច្នៃដឹកទិញ និងអ្នកដំណើរកាន់តែសម្បូរបែបនោះ កំពុងតែធ្វើឲ្យអ្នកលក់ម៉ូតូជជុះបាត់បង់ចំណែកទីផ្សារជាបន្ដបន្ទាប់ ហើយការបាត់បង់នេះ ច្បាស់ណាស់ទីផ្សារមួយនេះ អាចនឹងបាត់ឈ្មោះនាពេលថ្ងៃខាមុខ ស្របពេលសេដ្ឋកិច្ចកម្ពុជាកំពុងរីកចម្រើនពីមួយឆ្នាំទៅមួយឆ្នាំ ធ្វើឲ្យការរស់នៅរបស់ពលរដ្ឋមានការប្រែប្រួល ពិសេសទៅលើបែបផែននេះជីវិត។
លោក យឹម ហ៊ាប អ្នកលក់ម៉ូតូជជុះនៅឃ្លាំងលេខ7A ម្ដុំផ្សារឃ្លាំងរំសេវ បានឱ្យដឹងថា មួយរយៈចុងក្រោយនេះការលក់ម៉ូតូជជុះមានភាពស្ងាត់ ដោយសារអ្នកប្រើប្រាស់ប្តូរទៅប្រើម៉ូតូកែច្នៃ ឬមូតូកង់បីដែលនាំចូលពីបរទេស សម្រាប់ប្រកបមុខរបរផ្សេងៗ ព្រោះពួកគេគិតថា ម៉ូតូកែច្នៃនិងម៉ូតូកង់បីដែលនាំចូលនោះ មានតម្លៃប្រហាក់ប្រហែលនឹងម៉ូតូជជុះដែលទិញយកទៅកែដាក់រ៉ឺម៉កដែរ ហើយមើលទៅថ្មី និងមានគុណភាពទៀត ។
លោកលើកឡើងថា ៖« ឃ្លាំងរបស់ខ្ញុំកាលពីមិនទាន់មានម៉ូតូកែច្នៃ អាចលក់បានប្រហែល១០០គ្រឿងក្នុង១ខែ តែសព្វថ្ងៃនេះគិតជាមធ្យម ប្រហែល៥០គ្រឿងប៉ុណ្ណោះ។ ថ្ងៃខាងមុខ បើនៅតែធ្លាក់ចុះបែបនេះ ម្ចាស់អាជីវកម្មអាចនឹងប្តូរមុខរបរមិនខាន ឬប្ដូរពីលក់ម៉ូតូសង់កូរ៉េ មកលក់ម៉ូតូដែលពេញនិយមនៅលើទីផ្សារជាក់ស្តែងវិញ » ។
អ្នកលក់ម៉ូតូនៅឃ្លាំងលេខ៣១ស្ថិតក្នុងតំបន់នោះដែរ បានលើកឡើងស្រដៀងគ្នាថា ទីផ្សារនិងតម្រូវការម៉ូតូជជុះសព្វថ្ងៃនេះខុសគ្នាច្រើនណាស់ បើធៀបនឹងពី២ឬ៣ឆ្នាំមុន ។
លោក គី ស៊ុនហេង អ្នកលក់ម៉ូតូរូបនេះបានបន្ដថា ៖« រយៈពេល២ឬ៣ឆ្នាំចុងក្រោយនេះ ការលក់ធ្លាក់ចុះជាបន្តបន្ទាប់ ។ ការធ្លាក់ចុះនេះអាចមកពីទីផ្សារម៉ូតូថ្មីៗវាយលុកខ្លាំង ព្រោះតម្លៃម៉ូតូថ្មី និងម៉ូតូជជុះ មិនខុសត្រូវគ្នាច្រើនប៉ុន្មានដែរ ។ ណាមួយ ការទិញលក់ក៏មានភាពងាយស្រួលដែរ ដូចជា តាមវិធីបង់រំលស់ជាដើម » ។
បើតាមលោកស៊ុនហេង សង្កេតឃើញថា ប៉ុន្មានឆ្នាំចុងក្រោយនេះ អ្នកជួលឃ្លាំងលក់ម៉ូតូបានថយចុះប្រហែល៧០% ដោយសារពិបាក រកប្រាក់បង់ថ្លៃឃ្លាំង និងបើកប្រាក់ខែកម្មករ ។
ការធ្លាក់ចុះនេះ ជាការបម្រែបម្រួលមួយដែរ ដោយបង្ហាញពីការរស់នៅបែបទាន់សម័យរបស់ពលរដ្ឋខ្មែរដែលមានជីវភាពធូរធារជាងមុន ហើយក៏គ្មានវិធីណាមកទប់ទល់បានដែរ មានតែផ្លាស់ប្ដូរមុខរបរ ឬលក់ម៉ូតូដែលកំពុងមានតម្រូវការលើទីផ្សារប៉ុណ្ណោះ ។
ដោយឡែកបើតាមអ្នកលក់ម៉ូតូថ្មីក្នុងក្រុមហ៊ុនវិញបានឲ្យដឹងថា ទោះបីជាការនាំចូលម៉ូតូថ្មីមានច្រើនប្រភេទនិងច្រើនម៉ាកក៏ដោយ ក៏តម្រូវការម៉ូតូលើទីផ្សារហាក់ដូចមិនធ្លាក់ចុះនោះទេ ។
កញ្ញា ហាំ រ៉ាវី ដែលលក់ម៉ូតូនៅក្រុមហ៊ុនហុងដា សាខាផ្សារសាមគ្គី បានឱ្យដឹងថា ៖« ម៉ូតូសេរីថ្មីៗកំពុងតែពេញនិយមពីយុវវ័យកម្ពុជា ពិសេសទៅលើប្រភេទម៉ូតូប្រើលេខអូតូ ងាយស្រួលជិះនៅតាមទីប្រជុំជន ។ កញ្ញាបន្ដថា ក្នុង១ខែក្រុមហ៊ុន អាចលក់ម៉ូតូប្រើលេខអូតូបានប្រហែល៣០% និងក្រៅពីនេះ ជាម៉ូតូប្រើចង្កឹះលេខ » ។
យុវនារីម្នាក់ដែលជាអ្នកជិះម៉ូតូប្រើលេខអូតូ បានឱ្យដឹងថា ការប្រើប្រាស់ម៉ូតូថ្មី វាផ្តល់ភាពងាយស្រួលជាច្រើន ដូចជា មិនបារម្ភអំពីការខូច នាំឲ្យចំណាយប្រាក់ម៉ាក់ប៉ាច្រើន មានទំនុកចិត្តពេលបើកបរ និងមើលទៅសមរម្យ ។
កញ្ញា វិញ លីកា បន្ដថា ៖« ការប្រើប្រាស់ម៉ូតូថ្មីនេះ មិនថាតែរូបនាងខ្ញុំនោះទេ សូម្បីតែអ្នកប្រើប្រាស់ផ្សេងទៀត ក៏យល់វាផ្តល់ទំនុកចិត្តខ្ពស់សម្រាប់អ្នកប្រើប្រាស់ដែរ។ លើសពីនេះ ការប្រើប្រាស់ម៉ូតូថ្មី ទទួលបានការធានាពីក្រុមហ៊ុននៅក្នុងរយៈពេលណាមួយសមស្រប ខុសពីម៉ូតូជជុះ បើអ្នកទិញមិនចេះមើលទេ វាអាចខូចញឹកញាប់ ចំណាយអស់ច្រើន ហើយបើគិតទៅតម្លៃអាចស្មើនឹងម៉ូតូថ្មីក៏មាន ។ ម្យ៉ាងទៀត ពេលធ្វើដំណើរផ្លូវឆ្ងាយក៏បារម្ភផងដែរ » ។
យោងតាមរបាយការណ៍អគ្គនាយកដ្ឋានដឹកជញ្ជូនផ្លូវគោកនៃក្រសួងសាធារណការ និងដឹកជញ្ជូន បានឲ្យដឹងថា គិតពីឆ្នាំ១៩៩០ដល់ខែមេសា ឆ្នាំ២០១៧ មានម៉ូតូប្រមាណជាង៣,២៩លានគ្រឿងដែលកំពុងចរាចរនៅទូទាំងប្រទេស ។ នេះមិនទាន់គិតដល់ម៉ូតូដែលមិនបានចុះបញ្ជី និងខុសច្បាប់នៅឡើយ ។
ដោយឡែកនៅក្នុងរាជធានីភ្នំពេញ បើតាម លោក ជា ប៊ុនធឿន ប្រធានអង្គភាពចុះបញ្ជីទោចក្រយាននៃមន្ទីរសាធារណការ និងដឹកជញ្ជូនរាជធានីភ្នំពេញបានឲ្យដឹងថា គិតចាប់ពីឆ្នាំ២០០០ដល់ឆ្នាំ២០១៧នេះ អង្គភាពរបស់លោកបានទទួលចុះបញ្ជីមធ្យោបាយយានជំនិះមានម៉ូតូ ម៉ូតូកង់បី និងម៉ូតូសណ្តោងរ៉ឺម៉ក ចំនួន១លាន៣សែន ហើយសម្រាប់មួយឆ្នាំ២០១៦កន្លងមកនេះ មានចំនួន១៥ម៉ឺន៨ពាន់៧១០គ្រឿង ។
លោកបានបញ្ជាក់ថា នៅរាជធានីភ្នំពេញ ម៉ូតូដែលបានចុះបញ្ជីផ្លូវការមានការកើនឡើង ជាង១០ម៉ឺនគ្រឿងជារៀងរាល់១ឆ្នាំតែម្តង ៕
ចែករំលែកព័តមាននេះ