តឹងចិត្តណាស់មែនទេ ? ឆាប់អស់ថ្មតែបញ្ចូលយូរមិនងាយពេញ មែនទេ? បើមែន នេះគឺជាដំណោះស្រាយ សម្រាប់បង្កើនល្បឿនក្នុងការសាកថ្មទូរស័ព្ទiPhoneរបស់លោកអ្នក ដែលសារព័ត៌មានកោះសន្ដិភាព ផ្នែក «រថយន្ដ និងបច្ចេកវិទ្យា » បានដកស្រង់តាមប្រភពពីគេហទំព័រ Metro។
-វិធីទី១ ៖ ប្រើប្រាស់ឆ្នាំងសាក និងខ្សែសាកដែលមានគុណភាពល្អ (ហ្ស៊ីន ឬប្រេនៗ)
វិធីនេះលោកអ្នកត្រូវចំណាយលុយច្រើនបន្ដិចហើយ ព្រោះថា បើប្រើឆ្នាំងសាក២.៥០០រៀល ពិតណាស់មិនល្អដូចរបស់ថ្លៃៗនោះទេ ។ ចំណែកការប្រើឆ្នាំងសាករបស់iPad មកជំនួស ក៏អាចឆាប់ពេញលឿនដែរ តែវាអាចធ្វើឲ្យខូចគុណភាពថ្មនៅពេលប្រើប្រាស់យូរអង្វែង ។
ជាមួយគ្នានេះ លោកអ្នកគួរដឹងដែរថា ការសាកថ្មតាមរន្ធUSBកុំព្យូទ័រ ឬPowerbank មិនអាចចូលលឿនដូចការសាកថ្មធម្មតាជាមួយនឹងរន្ធឌុយទេ ព្រោះកម្លាំងចរន្តអគ្គិសនីរបស់រន្ធ USB មានត្រឹមតែ២,៥វ៉ាត់ប៉ុណ្ណោះ ខណៈដែលកម្លាំងចេញពីរន្ធឌុយមានដល់ទៅ៥វ៉ាត់ ។
-វិធីទី២ ៖ ដាក់ទូរស័ព្ទនៅកន្លែងត្រជាក់
ថ្មទូរស័ព្ទiPhoneរបស់លោកអ្នកឆាប់អស់នៅពេលឡើងកំដៅ ។ ដូច្នេះហើយ នៅពេលសាកវា លោកអ្នកគួរទុកឲ្យឆ្ងាយពីកំដៅព្រះអាទិត្យ ឬក៏អាចដោះស្រោមទូរស័ព្ទចេញនៅពេលសាកថ្ម ។ ពាក្យថា ត្រជាក់នេះ មិនមែនមានន័យថា យកទៅដាក់ក្នុងទូរទឹកកកទុកឲ្យកកទៅជាការ៉េមiPhone នោះទេ ពោលគឺរក្សាទុកនៅសីតុណ្ហភាពបន្ទប់ធម្មតា ។
-វិធីទី៣ ៖ ប្រើប្រាស់ Low-Power Mode ឬក៏ដាក់ Flight Mode
ការដាក់ Low-Power Mode អាចជួយកាត់បន្ថយថាមពលដែលត្រូវចាយទៅលើទូរស័ព្ទ iPhone របស់លោកអ្នក ។ ជាមួយគ្នានេះ ការបើកមុខងារFlight Mode (រូបយន្តហោះ) អាចជួយកាត់បន្ថយថាមពលផងដែរ ។
-វិធីទី៤៖ បិទ Notification
ការបិទការលោតនូវNotification ក៏អាចជួយធ្វើឲ្យការបញ្ចូលថ្មiPhone ឆាប់ពេញដែរដោយគ្រាន់តែចូលក្នុងSetting ហើយចូលទៅកំណត់ក្នុងNotification ជាការស្រេច ។
-វិធីទី៥៖ បិទទូរស័ព្ទចោលសិនទៅ ជាការប្រសើរ
ប្រាកដណាស់ ! ការបិទទូរស័ព្ទពេលកំពុងបញ្ចូលថ្ម ពិតជាវិធីមួយដ៏ល្អ ដែលអាចឲ្យថ្មឆាប់ពេញបានយ៉ាងឆាប់រហ័ស។ នេះមកពីពេលយើងបិទ វាមិនត្រូវការថាមពលមកចាយវាយអ្វីទេ ។
យោងតាម Mac World បានឲ្យដឹងថា ការបិទទូរស័ព្ទពេលបញ្ចូលថ្មបែបនេះ ជួយធ្វើឲ្យយើងបញ្ចូលថ្មពេញក្នុងរយៈពេល២ម៉ោង ។
សូមចាប់ផ្ដើមសាកល្បងធ្វើតាមវិធីងាយៗនេះទាំងអស់គ្នា ដើម្បីចំណេញពេលវេលាក្នុងការសាកថ្ម ៕
ចែករំលែកព័តមាននេះ