រាជធានីភ្នំពេញ ៖ បច្ចុប្បន្នការផ្ដល់សេវាដឹកអ្នកដំណើរសាធារណៈរួមមាន តាក់ស៊ី ម៉ូតូឌុប ម៉ូតូកង់បី និងរ៉ឺម៉កម៉ូតូ ដែលរកស៊ីតាមបែបប្រពៃណី ដូចជា ជិះស្វែងរកម៉ូយ ឬឈប់នៅទីតាំងណាមួយសម្រាប់ដឹកភ្ញៀវនោះ គឺមិនអាច
រាជធានីភ្នំពេញ ៖ បច្ចុប្បន្នការផ្ដល់សេវាដឹកអ្នកដំណើរសាធារណៈរួមមាន តាក់ស៊ី ម៉ូតូឌុប ម៉ូតូកង់បី និងរ៉ឺម៉កម៉ូតូ ដែលរកស៊ីតាមបែបប្រពៃណី ដូចជា ជិះស្វែងរកម៉ូយ ឬឈប់នៅទីតាំងណាមួយសម្រាប់ដឹកភ្ញៀវនោះ គឺមិនអាចប្រកួតប្រជែងជាមួយរបរដូចគ្នានេះដែលបំពាក់នូវបច្ចេកវិទ្យាបានទេ ហើយសព្វថ្ងៃនេះ អ្នកដំណើរ ឬភ្ញៀវទេសចរ ក៏មាននិន្នាការងាកមកចាប់អារម្មណ៍ទៅលើសេវាដែលបំពាក់នូវបច្ចេកវិទ្យានេះដែរ ព្រោះវាផ្ដល់ទំនុកចិត្ត មិនបាច់តថ្លៃ និងសុវត្ថិភាពខ្ពស់ មិនខ្លាចគេដឹកពង្វាងផ្លូវជាដើម ពិសេសអ្នកដែលពុំសូវស្គាល់ភូមិសាស្ត្រ ។ ដូច្នេះប្រសិនបើសេវាដឹកអ្នកដំណើរដែលបំពាក់ប្រព័ន្ធទំនើបនេះកាន់តែផុលផុសនោះ អ្នករត់ម៉ូតូឌុប, ម៉ូតូកង់បី និងតាក់ស៊ីធម្មតា ប្រាកដជាប្រឈមនឹងបញ្ហាអត់ម៉ូយមិនខាន ។
ទោះបីយ៉ាងណា អ្នកដំណើរឬភ្ញៀវដែលចង់ជិះធម្យោបាយដែលបំពាក់បច្ចេកវិទ្យា(App)នេះ ក៏ត្រូវមានចំណេះដឹងខាងបច្ចេកវិទ្យា ឬចេះអង់គ្លេសខ្លះដែរ ដើម្បីងាយស្រួល ឬក៏ពឹងពាក់ឲ្យគេណែនាំពីរបៀបប្រើប្រាស់ក៏បាន ព្រោះពុំមានអ្វីស្មុគស្មាញច្រើនទេ ។
ដើម្បីជិះតាក់ស៊ីម៉ែត្រ ឬម៉ូតូកង់បីដែលបំពាក់បច្ចេកវិទ្យាដោយភ្ជាប់សេវាអីុធើរណេតនេះ អ្នកដំណើរចាំបាច់ត្រូវដំឡើង(Install)កម្មវិធីរបស់ក្រុមហ៊ុនណាមួយនៅក្នុងស្មាតហ្វូនជាមុនសិន ។ ក្រោយដំឡើងរួច នឹងមានការណែនាំឲ្យបញ្ចូលលេខកូដដើម្បីបញ្ជាក់ថាយើងចង់ប្រើប្រាស់សេវានេះ និងបំពេញបែបបទមួយចំនួនដូចជា រូបថត, ឈ្មោះ, លេខទូរស័ព្ទ និងអុីម៉ែលជាដើម ។ បន្ទាប់មក គឺត្រូវប្រាប់ទីតាំងដែលយើងកំពុងនៅ ពេលនោះកម្មវិធីនេះនឹងបង្ហាញអ្នកបើកបរដែលនៅជិតលោកអ្នកបំផុត ហើយទាក់ទងតាមទូរស័ព្ទមកយើងភ្លាមៗដើម្បីបញ្ជាក់ទីតាំងឲ្យច្បាស់ ។
សេវាតាក់ស៊ីឬម៉ូតូកង់បីដែលបំពាក់បច្ចេកវិទ្យានេះ គឺបង្ហាញពីតម្លៃច្បាស់លាស់ មិនបាច់តថ្លៃទេ ដោយគិតជាគីឡូម៉ែត្រទៅតាមតម្លៃដែលមានបង្ហាញជូន និងបិទលើរថយន្ដ ឬម៉ូតូនោះ ។ ដូច្នេះធ្វើឲ្យភ្ញៀវមានទំនុកចិត្តច្រើន បើធៀបនឹងម៉ូតូឌុប ឬម៉ូតូកង់បីដែលរកស៊ីរត់ឈ្នួលធម្មតា ។
លោក សាន ស៊ាន អ្នករត់តាក់ស៊ីម៉ែត្រដែលបំពាក់បច្ចេកវិទ្យា PassApp Taxi បានឲ្យដឹងថា ដើម្បីក្លាយជាអ្នករត់តាក់ស៊ីនេះបាន អ្នកបើកបរត្រូវមានប័ណ្ណបើកបរ មានបទពិសោធន៍ និងស្គាល់ភូមិសាស្ត្រច្រើន ។
លោកបន្ដថា ៖« ការជិះតាក់ស៊ីម៉ែត្រនេះ វាងាយស្រួល តម្លៃឃើញនឹងភ្នែក និងមិនបាច់តថ្លៃ ដែលធ្វើឲ្យអ្នកដំណើរមានទំនុកចិត្តខ្ពស់ »។
ទោះបីយ៉ាងណា លោកថា របរបែបថ្មីនេះ ពុំទាន់ជាផុសផុលនៅឡើយទេ ខណៈដែលអ្នកដំណើរពុំទាន់យល់ច្បាស់ពីរបៀបប្រើប្រាស់ និងមានទម្លាប់ចាស់នៅឡើយ ។
លោកថា ៖« ពេលខ្លះ ភ្ញៀវបានទាក់ទងទៅក្រុមហ៊ុនផ្ទាល់ ហើយក្រុមហ៊ុនបានផ្ដល់ព័ត៌ឲ្យទៅដឹក លុះដឹកដល់គោលដៅ គាត់[ភ្ញៀវ]ឲ្យតម្លៃទៅតាមទម្លាប់ដែលគាត់ធ្លាប់ជិះដូចសព្វមួយដង តែយ៉ាងណា ក្រុមហ៊ុនក៏គេពិនិត្យតាមGPS ដឹងដែរថា យើងដឹកត្រឹមណា ដល់ត្រឹមណា គឺគេដឹងច្បាស់ »។
លោកបញ្ជាក់ថា ៖« សេវាកម្មនេះ ពេលឡើងជិះភ្លាម ដឹងតែគិតលុយភ្លាម គឺគិតជាគីឡូម៉ែត្រ ហើយតម្លៃសេវាកម្មក្រុមហ៊ុនលោកគឺ៣ពាន់រៀលក្នុង១គីឡូម៉ែត្រ » ។
បើធៀបនឹងការរកស៊ីដឹកភ្ញៀវធម្មតាវិញ បុរសដែលមានបទពិសោធន៍រត់កង់បីរយៈពេល ៤ឆ្នាំរូបនេះ បានឲ្យដឹងថា វាងាយស្រួលច្រើន ដោយមិនចាំបាច់សម្លឹងមើលម៉ូយ ជិះដើររកម៉ូយ ឬឈប់រង់ចាំដឹកនៅកន្លែងណានោះទេ គឺក្រុមហ៊ុនផ្ដល់ព័ត៌មានឲ្យគ្រប់ពេល ហើយបើយើងចង់ដឹកឬមិនចង់ គឺស្រេចតែយើង ក្រុមហ៊ុនមិនបង្ខំទេ ។ ចំណែកក្រុមហ៊ុនវិញ គឺយកកម្រៃ១៥% មានន័យថា បើដឹកភ្ញៀវបាន១០ម៉ឺនរៀល គឺត្រូវបង់ឲ្យក្រុមហ៊ុន១៥.០០០រៀល និងតម្រូវឲ្យបង់ប្រចាំថ្ងៃ ។
ដោយឡែកអ្នករត់ម៉ូតូកង់បីដែលប្រចាំការនៅទល់មុខផ្សារទំនើបមួយបាននិយាយថា ការរត់កង់បីឥឡូវជួបបញ្ហាច្រើន មិនដូចពីមុនទេ ។
លោក សុខ លាងហ៊ួ អ្នករត់ម៉ូតូកង់បីរូបនេះនិយាយថា ៖« បច្ចុប្បន្ន ការរកស៊ីរបរនេះកំពុងប្រកួតប្រជែងគ្នាច្រើន ខ្ញុំរកស៊ីតែឯងអីុចឹងពិបាករកម៉ូយណាស់ ហើយបើទៅដឹកចំកន្លែងគេរកស៊ីដែរនោះ កាន់តែយ៉ាប់ទៀត ព្រោះគេថាយើងកាត់មុខមាត់ឬទៅដណ្ដើមម៉ូយគេ » ។
លោក ហុង សុវណ្ណតារា នាយកគ្រប់គ្រងក្រុមហ៊ុន GOX Press ដែលបានវិនិយោគលើការផ្តល់សេវាកម្មតាមបច្ចេកវិទ្យាទំនើបនេះ ថ្លែងថា លោកបានចាប់ផ្តើមដំណើរការសេវាកម្មនេះតាំងពីចុងឆ្នាំ២០១៦ ។ វាជាសេវាកម្មភ្ជាប់រវាងអ្នកប្រើប្រាស់ និងអ្នកផ្តល់សេវាកម្មតាមរយៈទូរស័ព្ទដៃ។ អតិថិជនអាចប្រើប្រាស់សេវាកម្មហៅម៉ូតូឌុប ម៉ូតូកង់បី និងតាក់ស៊ី តាមរយៈទូរស័ព្ទដៃ ដោយគ្រាន់តែទាញយកAPPមកដំឡើងក្នុងទូរស័ព្ទដៃស្មាតហ្វូនជាការស្រេច ។
លោកបន្តថា បច្ចុប្បន្ន ក្រុមហ៊ុនរបស់លោកបានធ្វើការងារជាមួយអ្នកផ្តល់សេវាកម្មនេះជាម៉ូតូឌុប ម៉ូតូកង់បី និងតាក់ស៊ីចំនួន២០០នាក់ហើយ និងមានមួយចំនួនទៀតបាននិងកំពុងចុះឈ្មោះដើម្បីដំណើរការប្រព័ន្ធនេះ ។ អតិថិជនក៏អាចកុុម្មង់ទិញទំនិញ បន្លែ ឬរបស់របរប្រើប្រាស់ផ្សេងៗតាមរយៈអ្នកផ្តល់សេវាកម្មជាអ្នករត់ម៉ូតូឌុប អ្នកបើកបរម៉ូតូកង់បី និងតាក់ស៊ី ដែលបានចុះឈ្មោះក្នុងបណ្តាញនេះផងដែរ។ លោកថា App នេះមានចំនួន៣ភាសា គឺភាសាខ្មែរ អង់គ្លេស និងចិន ៕
ចែករំលែកព័តមាននេះ