រាជធានីភ្នំពេញ ៖ ស្របពេលដែលប្រាសាទសំបូរព្រៃគុកត្រូវបានដាក់បញ្ចូលក្នុងសម្បត្តិ បេតិកភណ្ឌពិភពលោក ក្រសួងទេសចរណ៍បានបង្កើនការផ្សព្វផ្សាយពីរមណីយដ្ឋាននេះទៅកាន់ពិភពលោកកាន់តែ
រាជធានីភ្នំពេញ ៖ ស្របពេលដែលប្រាសាទសំបូរព្រៃគុកត្រូវបានដាក់បញ្ចូលក្នុងសម្បត្តិ បេតិកភណ្ឌពិភពលោក ក្រសួងទេសចរណ៍បានបង្កើនការផ្សព្វផ្សាយពីរមណីយដ្ឋាននេះទៅកាន់ពិភពលោកកាន់តែច្រើនជាងមុន និងជំរុញឲ្យក្រុមហ៊ុនភ្នាក់ងារទេសចរណ៍ទាំងអស់ ដាក់ប្រាសាទនេះចូលក្នុងកញ្ចប់ទេសចរណ៍របស់ខ្លួន។
លោក ថោង ខុន រដ្ឋមន្ត្រីក្រសួងទេសចរណ៍បានថ្លែងនៅការិយាល័យរបស់លោកនាព្រឹកថ្ងៃទី១១ កក្កដា ថា ក្រសួងបាននិងកំពុងរៀបចំ និងបានផ្សព្វផ្សាយរួចមកហើយ នូវរមណីយដ្ឋានសំបូរព្រៃគុក ប៉ុន្តែពេលប្រាសាទនេះត្រូវបានដាក់បញ្ចូលក្នុងសម្បត្តិបេតិកភណ្ឌពិភពលោក ក្រសួងនឹងបង្កើនការផ្សព្វផ្សាយបន្ថែមទៀតពីរមណីយដ្ឋាននេះ ។ លោកបន្តថា ការដាក់បញ្ចូលរមណីយដ្ឋាននេះជាសម្បត្តិបេតិកភណ្ឌពិភពលោក នឹងបង្កើតឲ្យមានខ្សែទស្សនកិច្ចបេ តិកភណ្ឌថ្មីមួយទៀតរវាងប្រាសាទសំបូរព្រៃគុក ទៅកាន់ប្រាសាទអង្គរ ខេត្តសៀមរាប និងឆ្ពោះទៅកាន់ប្រាសាទព្រះវិហារ ព្រមទាំងភ្ជាប់ខ្សែទស្សនកិច្ចទៅកាន់ប្រាសាទវត្តភូ ប្រទេសឡាវ ផងដែរ ។
លោកបន្តថា ៖« ចំនួនភ្ញៀវទេសចរជាតិ និងអន្តរជាតិ នឹងចាប់អារម្មណ៍ និងមកទស្សនាប្រាសាទនេះច្រើន ព្រោះកន្លងមកក្រសួងក៏បានសហការជាមួយសហគមន៍នៅជុំវិញប្រាសាទ រៀបចំបង្កើតជាផលិតផលទេសចរណ៍ផងដែរ តាមរយៈការសហការជាមួយអង្គការADB ដែលបានជួយមូលនិធិអភិវឌ្ឍន៍សហគមន៍នៅតំបន់នេះ » ។
លោកបន្ថែមថា លើសពីនេះ ក្រសួងនឹងសហការជាមួយអាជ្ញាធរខេត្ត និងគណៈកម្មការគ្រប់គ្រងប្រាសាទសំបូរព្រៃគុក ដើម្បីរៀបចំជាផ្ទះស្នាក់ (Home Stay) ភោជនីយដ្ឋាន ដើម្បីទទួលភ្ញៀវទេសចរជាតិ អន្តរជាតិផងដែរដោយ ធ្វើយ៉ាងណាផ្តោតលើទិសស្លោក «ទីក្រុងស្អាត រមណីយដ្ឋានស្អាត សេវាល្អ »។
លោករដ្ឋមន្ត្រីរូបនេះបានបន្តថា ជាមួយនឹងផែនការអភិវឌ្ឍន៍តំបន់នេះ ខេត្តកំពង់ធំក៏មានសណ្ឋាគារលំដាប់ផ្កាយ៤ និងផ្ទះសំណាក់ជាច្រើនទៀត ព្រមទាំងមានភោជនីយដ្ឋាន ដែលអាចទទួលភ្ញៀវទេសចរបាន ព្រោះក្រុងស្ទឹងសែន ខេត្តកំពង់ធំ មានចម្ងាយត្រឹមតែ២៥គីឡូម៉ែត្រ ពីប្រាសាទនេះប៉ុណ្ណោះ ។
លោកស្រីឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជាបានថ្លែងថា ពិតណាស់ការដាក់បញ្ចូលប្រាសាទសំបូរព្រៃគុក ជាសម្បត្តិបេតិកភណ្ឌពិភពលោក នឹងទាក់ទាញភ្ញៀវទេសចរទៅទស្សនាកាន់តែច្រើន ពិសេសភ្ញៀវអឺរ៉ុប ដែលចូលចិត្តតំបន់រមណីយដ្ឋានបែបនេះ ។ លោកស្រីបន្តថា កន្លងមកប្រាសាទនេះ មិនសូវទាក់ទាញភ្ញៀវទេសចរអន្តរជាតិទេ តែពេលដាក់បញ្ចូលក្នុងបញ្ជីសម្បត្តិបេតិកភណ្ឌពិភពលោក ភ្ញៀវទេសចរជាតិ អន្តរជាតិ នឹងមានការចាប់អារម្មណ៍ច្រើន ។
ប្រធានសហព័ន្ធទេសចរណ៍កម្ពុជា លោកធួន ស៊ីណាន បានថ្លែងថា កន្លងមក ប្រសិនជាមានការធ្វើដំណើរតាមផ្លូវគោក យើងតែងតែដាក់បញ្ចូលប្រាសាទនេះចូលក្នុងកញ្ចប់ទេសចរណ៍របស់ខ្លួន និងជំរុញឲ្យភ្ញៀវស្នាក់នៅខេត្តកំពង់ធំមួយយប់ ហើយពួកគេទស្សនាប្រាសាទ និងសហគមន៍ប្រជាពលរដ្ឋរស់នៅជុំវិញប្រាសាទនេះ ប៉ុន្តែភ្ញៀវភាគច្រើនពួកគេគ្រាន់តែឆ្លងកាត់ប៉ុណ្ណោះ ហេតុនេះគួរតែមានការវិនិយោគទៅលើហេដ្ឋារចនាសម្ព័ន្ធ រមនីយដ្ឋានកែច្នៃនៅជុំវិញតំបន់នេះមួយចំនួនទៀត ដើម្បីបង្កើនការទាក់ទាញភ្ញៀវទេសចរ ។
លោកធួន ស៊ីណាន ថ្លែងថា ៖« ខ្ញុំជឿថា ការដាក់ប្រាសាទនេះចូលក្នុងបញ្ជីបេតិកភណ្ឌពិភពលោក នឹងជួយជំរុញវិស័យនេះឲ្យមានភាពផុសផុលបន្ថែមទៀត ហើយភ្ញៀវទេសចរ នឹងកើនឡើង »។ លោកបន្តថា ៖« យើងនឹងបង្កើនការផ្សព្វផ្សាយពីប្រាសាទនេះ និងដាក់បញ្ចូលប្រាសាទនេះចូលក្នុងកញ្ចប់ទេសចរណ៍របស់ខ្លួន» ៕
ចែករំលែកព័តមាននេះ