រាជធានីភ្នំពេញ ៖ ក្រសួងការងារនឹងចាប់ផ្តើមសិក្សាអំពី«ស្ថានភាពជីវភាពរស់នៅរបស់កម្មករនិយោជិត »ក្នុងវិស័យវាយនភ័ណ្ឌកាត់ដេរ និងផលិតស្បែកជើងនៅកម្ពុជា ។ ការអង្កេតនេះ នឹងចាប់អនុវត្តពីថ្ងៃទី៣១ កក្កដា ដល់ថ្ងៃទី២៨ ខែសីហា ឆ្នាំ២០១៧ ទៅលើគំរូកម្មករនិយោជិតចំនួន១.៥០០នាក់ និងរោងចក្រចំនួន៧៥នៅរាជធានីភ្នំពេញ និងខេត្តកណ្តាល មុនពេលបើកការចរចាទ្វេភាគី និងត្រីភាគីទៅលើប្រាក់ឈ្នួលអប្បបរមា ដែលនឹងចាប់ផ្តើមនៅខែសីហា និងខែកញ្ញាខាងមុខ ។ នេះបើយោងតាមប្រកាសរបស់ក្រសួងការងារ និងបណ្ដុះបណ្ដាលវិជ្ជាជីវៈ កាលពីថ្ងៃទី៧ កក្កដា កន្លងមក ។
ពាក់ព័ន្ធនឹងប្រាក់ឈ្នួលអប្បរមាសម្រាប់កម្មករនិយោជិតនេះ លោក អាត់ ធន់ បាននិយាយថា វាហាក់ដូចជាមានអំណោយផលច្រើនសម្រាប់កម្មករក្នុងការចរចាប្រាក់ឈ្នួលឆ្នាំ២០១៨ ដោយសារវាជាឆ្នាំបោះឆ្នោតជ្រើសតាំងសមាជិករដ្ឋសភា ។
លោកបាននិយាយថា ៖« ឆ្នាំ២០១៨ ខ្ញុំយល់ឃើញថា មានឱកាសល្អមួយសម្រាប់គណបក្សនយោបាយ ដោយសារជាឆ្នាំបោះឆ្នោត ។ អីចឹង គណបក្សនយោបាយគួរតែគិតគូរឲ្យបានល្អិតល្អន់ក្នុងការជួយកម្មករ ដើម្បីទទួលបានភាពទាក់ទាញការគាំទ្រសន្លឹកឆ្នោត »។
លោកបានបន្ថែមថា ៖« អីចឹង វាជាឱកាសមួយសម្រាប់កម្មករទទួលបានប្រាក់ឈ្នួលច្រើនជាងឆ្នាំមុន ។ បច្ចុប្បន្នស្ថានភាពរបស់កម្មករនៅតែមានបញ្ហាខ្ពស់ ដែលជាចំណុចមួយរបស់គណបក្សនយោបាយ មិនចាំបាច់សិក្សាស្រាវជ្រាវនោះ ទេ គឺអាចដំឡើងបានតែម្តង ។ យើងគិតមើលថា កម្មកររាប់លាននាក់ បើអ្នកនយោបាយភ្លេចគិតពីកម្មករ អាចធ្លាក់សន្លឹកឆ្នោត អីចឹងខ្ញុំគិតថា អ្នកនយោបាយគិតច្រើនជាងកម្មករទៅទៀត»។
ចំណែកលោក សោម អូន បាននិយាយថា សម្រាប់ការដំឡើងប្រាក់ឈ្នួលចំពោះកម្មករម្តងៗគឺត្រូវធ្វើតាមសេដ្ឋកិច្ចជាតិ មិនមែនតាមបរិយាកាសនយោបាយទេ ។
លោកបានបញ្ជាក់ថា ៖«ជាធម្មតា យើងដឹង ហើយថា ប្រាក់ឈ្នួលកម្មករឡើងខ្ទង់១០ទៅ១៥%គឺឡើងរាល់ឆ្នាំ វាអស់ហើយ ។ ការឡើងនេះ វាអាស្រ័យលើស្ថានភាពសេដ្ឋកិច្ចជាក់ស្តែងរបស់យើង ស្ថិតនៅក្នុងរង្វង់ប៉ុណ្ណឹង នេះបើតាមបទពិសោធន៍ និងវិភាគរបស់ខ្ញុំ » ។
លោក ប៉ាវ ស៊ីណា ក៏យល់ស្របដែរថា មុននឹងសម្រេចដាក់ចេញថា ប្រាក់ឈ្នួលអប្បបរមាប៉ុន្មាន នឹងត្រូវលើកឡើងសម្រាប់ការចរចាខាងមុខគឺទាមទារឲ្យមានការស្រាវជ្រាវឯករាជ្យមួយ ដោយសហជីព និងអង្គការដែលធ្វើការលើវិស័យកាត់ដេរ ទៅលើជីវភាពរស់នៅរបស់កម្មករ និងការចំណាយប្រចាំថ្ងៃរបស់កម្មករ ។ ដូច្នេះការស្រាវជ្រាវឯករាជ្យមួយ នឹងត្រូវធ្វើនៅដើមខែសីហា ខាងមុខនេះ ។
ក្រសួងការងារ កាលពីថ្ងៃទី១៩ មិថុនា ឆ្នាំ២០១៧ បានកំណត់ពីការពិភាក្សាប្រាក់ឈ្នួលអប្បបរមាសម្រាប់ឆ្នាំ២០១៨ ត្រូវអនុវត្តតាមប្រតិទិនដូចតទៅ ៖
-កំណត់យកខែសីហា និងកញ្ញា ឆ្នាំ២០១៧ សម្រាប់ពិភាក្សាប្រាក់ឈ្នួលអប្បបរមាជាលក្ខណៈទ្វេភាគី និងជាលក្ខណៈត្រីភាគី ។
-កំណត់យកដើមខែតុលា ឆ្នាំ២០១៧ ជាការបើកកិច្ចប្រជុំគណៈកម្មការប្រឹក្សាការងារដើម្បី សម្រេចប្រាក់ឈ្នួលអប្បបរមាផ្នែកវាយនភ័ណ្ឌកាត់ដេរ និងផលិតស្បែកជើង សម្រាប់ឆ្នាំ២០១៨ ។
-ក្រសួងការងារបានស្នើគ្រប់ភាគីទាំងអស់ត្រូវប្រើលក្ខណៈវិនិច្ឆ័យបែបសង្គម(ស្ថានភាពគ្រួសារ អាត្រាអតិផរណា និងការចំណេញក្នុងការរស់នៅ) និងលក្ខណៈវិនិច្ឆ័យបែបសេដ្ឋកិច្ច(ផលិតភាពភាពប្រកួតប្រជែងរបស់ប្រទេសស្ថាន ពីទីផ្សារការងារ និងកម្រិតចំណេញរបស់វិស័យ) ក៏ដូចជាបន្ទាត់ភាពក្រីក្រ សម្រាប់ធ្វើការជាមូលដ្ឋានក្នុងការពិភាក្សាប្រាក់ឈ្នួលអប្បបរមានៅកម្ពុជា ។
-ថ្ងៃទី១ ខែមករា ឆ្នាំ២០១៨ ជាកាលបរិច្ឆេទចូលជាធរមានប្រាក់ឈ្នួលអប្បបរមា ឆ្នាំ២០១៨ ។ ប្រាក់ឈ្នួលអប្បបមាបច្ចុប្បន្ននេះ គឺ១៥៣ដុល្លារ ដោយមិនរាប់បញ្ចូលនូវអត្ថប្រយោជន៍ផ្សេងៗទៀតឡើយ ៕
ចែករំលែកព័តមាននេះ