រាជធានីភ្នំពេញ៖ ខណៈកំពុងធ្វើដំណើរទស្សនកិច្ចនៅប្រទេសជប៉ុន រដ្ឋមន្ត្រីក្រសួងការងារ និងបណ្ដុះបណ្ដាល វិជ្ជាជីវៈលោក អ៉ិត សំហេង បានស្នើជប៉ុន សូមបន្តជ្រើសរើស សិក្ខាកាមខ្មែរទៅធ្វើការនៅទីនោះបន្ថែមទៀតផង ព្រោះ
រាជធានីភ្នំពេញ៖ ខណៈកំពុងធ្វើដំណើរទស្សនកិច្ចនៅប្រទេសជប៉ុន រដ្ឋមន្ត្រីក្រសួងការងារ និងបណ្ដុះបណ្ដាល វិជ្ជាជីវៈលោក អ៉ិត សំហេង បានស្នើជប៉ុន សូមបន្តជ្រើសរើស សិក្ខាកាមខ្មែរទៅធ្វើការនៅទីនោះបន្ថែមទៀតផង ព្រោះអាចជួយពួកគេ មានជំនាញច្បាស់លាស់ ដើម្បីប្រកបការងាររកស៊ីបានទៀតនៅថ្ងៃក្រោយពេលត្រឡប់មកកម្ពុជាវិញ។
យោងតាមបណ្ដាញពត៌មានលើវេបសាយក្រសួងការងារ លោករដ្ឋមន្ត្រីនៅព្រឹកថ្ងៃទី ១១ ខែកក្កដា បានអញ្ជើញទស្សនកិច្ចនៅអង្គការសម្រាប់កម្មវិធីបណ្តុះបណ្តាលបច្ចេកទេស ហៅកាត់ថា (OTIT) នៅទីក្រុងតូក្យូ ប្រទេសជប៉ុន ទីដែលលោក អ៉ិត សំហេង បានឲ្យដឹងផងដែរថាកម្មសិក្សាការីខ្មែរនៅជប៉ុនមានចំនួនជិត ៥០០០ នាក់ នៅតាមរោងចក្រ សហគ្រាស និងក្រុមហ៊ុនមួយចំនួននៅប្រទេសជប៉ុន និងបានកោតសរសើរដល់និយោជកជប៉ុន ដែលបានទទួលកម្មសិក្សាការីខ្មែរមកធ្វើការ «និងយកចិត្តទុកដាក់ដល់សិក្ខាកាម ដោយផ្តល់នូវការបណ្តុះបណ្តាលបច្ចេកទេសខ្ពស់ដល់កម្មសិក្សាការីខ្មែរអាចសិក្សាពីមិត្តជប៉ុនព្រមទាំងរបៀបរបបរស់នៅ និងវិន័យការងារ ហើយពេលត្រឡប់វិញពួកគេនឹងក្លាយជាមនុស្សល្អ»។
ឯកឧត្តមរដ្ឋមន្ត្រី បានស្នើសុំឱ្យមានការពង្រឹងកិច្ចសហការល្អរវាងប្រទេសទាំងពីរ និងគាំទ្រដល់ការបណ្តុះបណ្តាល និងជ្រើសរើសកម្មសិក្សាការីខ្មែរមកជប៉ុនបានកាន់តែច្រើនថែមទៀត ព្រមទាំងជួយក្រសួងក្នុងការរៀបចំបែបបទផ្សេងៗស្របតាមនីតិវិធីនៃច្បាប់ថ្មី និងផ្តល់ជំនួយបច្ចកទេសលើការបណ្តុះបណ្តាលជំនាញបច្ចេកទេសដល់កម្មសិក្សាការីខ្មែរឱ្យស្របតាមតម្រូវការទីផ្សារការងារនៅប្រទេសជប៉ុន។
លោករដ្ឋមន្ត្រីក៏បានចុះទៅបំពេញទស្សនកិច្ចតាមក្រុមហ៊ុនមួយចំនួន ដែលមានសិក្ខាកាមខ្មែរធ្វើការហើយជម្រុញពួកគេ «ឲ្យខិតខំធ្វើការងារ ដោយគោរពច្បាប់របស់ប្រទេសជប៉ុន រក្សាសាមគ្គីភាព ទំនាក់ទំនងល្អជាមួយជប៉ុន និងខិតខំរៀនបច្ចេកទេសវិជ្ជាជីវៈ សម្រាប់ពេលចប់កិច្ចសន្យាវិលទៅប្រទេសវិញ ក្មួយៗនឹងមានជំនាញ និងលទ្ធភាពប្រកបរបរដោយខ្លួនឯង ឬស្វែងរកការងារធ្វើ ដែលប្រកបដោយភាពថ្លៃថ្នូរ និងប្រាក់កម្រៃខ្ពស់»។
សូមបញ្ជាក់ថា លោក អ៊ិត សំហេង បានដឹកនាំគណៈប្រតិភូកម្ពុជា ទៅធ្វើការទស្សនកិច្ចនៅ ប្រទេសជប៉ុន រយៈពេល៥ថ្ងៃ ចាប់ពីថ្ងៃទី៨ ដល់ថ្ងៃទី១២ ខែកក្កដា ឆ្នាំ២០១៧ ដើម្បីស្វែងយល់អំពីស្ថានភាពការងារ និងជួបសំណេះសំណាលជាមួយ កម្មសិក្សាការីខ្មែរ ព្រមទាំងចុះហត្ថលេខាលើអនុស្សរណៈ នៃការយោគយល់គ្នាស្តីពី កិច្ចសហប្រតិបត្តិការ លើការបណ្តុះបណ្តាល កម្មសិក្សាបច្ចេកទេស ជាមួយភាគីជប៉ុន ៕
ចែករំលែកព័តមាននេះ