រាជធានីភ្នំពេញ ៖ បច្ចុប្បន្នប្រជាពលរដ្ឋចំណាកស្រុកពីជនបទទៅទីក្រុង ឬទៅបរទេសជាបញ្ហាចោទមួយចំពោះប្រទេសកម្ពុជា ដោយសារការធ្វើស្រែចម្ការមិនទទួលផល ឬបានផលហើយ តែគ្មានទីផ្សារសម្រាប់លក់ចេញ ។ យ៉ាងណាក៏ដោយ មានកសិករមួយចំនួននៅបណ្ដាខេត្តតាមដងទន្លេសាបបានបង្ហាញពីភាពជោគជ័យ របស់ខ្លួន ក្រោយពីបានអនុវត្តគម្រោងរបស់ធនាគារអភិវឌ្ឍន៍អាស៊ី និងអង្គការមួយចំនួនដែលពាក់ពន្ធ័នឹងការជំរុញជីវភាពប្រជាកសិករ ។
លោក ងិន ផុន និងភរិយាបានចាកចេញពីស្រុកកំណើតទៅធ្វើជាកម្មករក្នុងចម្ការកៅស៊ូមួយនៅក្នុងប្រទេស ហើយ៣ឆ្នាំក្រោយមកក៏បានត្រឡប់មកវិញជាមួយនឹងប្រាក់ចំនួន៣ពាន់ដុល្លារដែលអាចឱ្យពួកគាត់ប្រើប្រាស់ដើម្បីពង្រីកដីមានទំហំតូចល្មមនៅក្នុងឃុំស្វាយពក ខេត្តកំពង់ចាម បានកាន់តែធំជាងមុន ។
តាមរយៈការពង្រីកការដាំដុះដំណាំឱ្យបានច្រើនមុខ ពួកគាត់បានទទួលផលត្រឹមតែល្មមគ្រប់គ្រាន់សម្រាប់ចិញ្ចឹមជីវិតប៉ុណ្ណោះ ដែលធ្វើឱ្យពួកគាត់នៅតែងាយរងគ្រោះ ប្រសិនបើមានវិបត្តិសេដ្ឋកិច្ចអ្វីមួយកើតមានឡើង ដូចជានៅពេលដែលការប្រមូលផលមិនសូវបានល្អ និងនៅពេលដែលតម្លៃដំណាំធ្លាក់ចុះទាបជាដើម ។
លោកផុននិយាយថា ៖« ជម្រើសដែលយើងមានគឺអាចទៅរកការងារធ្វើនៅចម្ការកៅស៊ូ ឬត្រូវទៅទីក្រុងភ្នំពេញដើម្បីធ្វើការងារតាមការដ្ឋានសំណង់ តែដោយសារលោកទទួលបានការគាំទ្រនូវគម្រោងពីធនាគារអភិវឌ្ឍន៍ លោកក៏បានចាប់ផ្ដើមអាជីវកម្មជាកសិកម្ម ដូចជាពង្រីកដីចម្ការដាំដំណាំផ្សេងៗ និងការជីកស្រះចិញ្ចឹមត្រីជាដើម ក្រោយមកអាជីវកម្មនោះក៏ចេះតែលូតលាស់ជាបន្តបន្ទាប់ ។
អ្នកស្រីតុន គឹមហួយ កសិករនៅខេត្តកំពង់ចាមបានឱ្យដឹងផងដែរថា កាលពីមុនគ្រួសារអ្នកស្រីក្រីក្រណាស់ ដោយក្នុងមួយខែៗអាចទទួលទានម្ហូបឆ្ងាញ់តិចពេលខ្លាំងណាស់ តែក្រោយពីអ្នកស្រីទទួលបាន២០០ដុល្លារពីគម្រោងADB អ្នកស្រីបានចាប់ផ្ដើម យកលុយនោះទៅទិញមាន់មកចិញ្ចឹម ព្រមទាំងបានរៀនសូត្រពីមន្ត្រីជំនាញ ណែនាំពីការចិញ្ចឹមនិងថែទាំសត្វមាន់ ដើម្បីឱ្យទទួលបានផលលឿន ព្រមជាមួយការដាំដុះស្រូវដោយខ្លួនផ្ទាល់ ។ រយៈពេលតែប៉ុន្មានឆ្នាំ អាជីវកម្មរបស់អ្នកស្រី ចាប់ផ្ដើមរីកធំធាត់បន្តិចម្ដងៗ អ្នកស្រីអាចរកចំណូលបានច្រើនពីការលក់មាន់ និងធ្វើឱ្យគ្រួសារអ្នកស្រីមានម្ហូបឆ្ងាញ់ៗជាងកាលពីពេលមុនៗ ។
ចំណែកអ្នកស្រី យ៉ា សុត កសិករនៅខេត្តកំពង់ធំក៏បានឱ្យដឹងថា ដំបូងឡើយ អ្នកស្រីបានដាក់ស្នើកម្ចី២៥០ដុល្លារពីADBមកធ្វើជាទុន ដោយមានការណែនាំពីបច្ចេកទេសពីធនាគារផងដែរ ដោយក្នុងនោះអ្នកស្រីបានយកទុននោះមកធ្វើស្រែប្រាំង តែដោយសារតែការធ្វើស្រែ គឺពឹងលើទឹកភ្លៀង ខាងADBបានផ្ដល់គំនិត និងពូជស្រូវដែលមានរយៈពេលខ្លីដល់អ្នកស្រី ។ រហូតមកដល់ពេលនេះ អ្នកស្រី អាចរកចំណូលពីការធ្វើស្រែបានប្រមាណ៧លានរៀល ក្នុង១រដូវកាលដែលមានរយៈពេល៣ខែប៉ុណ្ណោះ ។ តាមរយៈប្រាក់ចំណូលនេះបានជំរុញឲ្យអ្នកស្រីចេះតែចង់បង្កបង្កើនផលនៅក្នុងស្រុកវិញ ដោយមិនចង់ធ្វើចំណាកស្រុកទៅបរទេស ឬទីក្រុងឡើយ ។
លោក សុខ នឿន ទីប្រឹក្សាគម្រោងរបស់អង្គការមួយដែលធ្វើការងារជាមួយនឹងមន្ទីរកសិកម្ម រុក្ខាប្រមាញ់ និងនេសាទ បានពន្យល់ថា ៖« យើងបានបង្រៀនកសិករឱ្យចេះបច្ចេកទេសថ្មីៗ ដូចជា ការដាំដំណាំឆ្លាស់ និងការបណ្ដុះផ្សិតចំបើងជាដើម។ បច្ចេកទេសទាំងនេះអាចឱ្យពួកគេរកចំណូលបានពេញមួយឆ្នាំ » ។
លោកបន្តថា គោលបំណងមួយរបស់គម្រោងនេះគឺបង្កើតភាពងាយស្រួលឱ្យកសិករអាចធ្វើការងារលើដីរបស់ខ្លួនជាជាងធ្វើចំណាកស្រុក ។ ដោយសារតែប្រទេសកម្ពុជាស្ថិតក្នុងចំណោមប្រទេសដែលមានទិន្នផលស្រូវក្នុង១ហិកតាទាបជាងគេនៅអាស៊ី កសិករអាចទិញស្រូវពូជដែលមានគុណភាពខ្ពស់ ដែលផលិតដោយគម្រោងនេះផ្ទាល់តែម្តង ដើម្បីបង្កើនទិន្នផលខ្លួន ។ ក្រុមកែលម្អជីវភាពរស់នៅ ដែលមានសមាជិកជាគ្រួសារក្រីក្រទទួលបានឥណទានខ្នាតតូចដែលអាចយកទៅវិនិយោគសម្រាប់អាជីវកម្មដែលផ្ដល់ប្រាក់ចំណេញបានច្រើន ដូចជា ការចិញ្ចឹមសត្វជាដើម៕
ចែករំលែកព័តមាននេះ