ខេត្តបាត់ដំបង ៖ បន្ទាប់ពីអ្នកបច្ចេកទេសបានចំណាយពេលសិក្សាស្រាវជ្រាវអស់រយៈពេល៤ឆ្នាំ អំពីដីកសិកម្មនៅខេត្តបាត់ដំបង រួចមក ក្រុមហ៊ុនវិនិយោគថៃមួយបានសម្រេចចិត្តបោះវិនិយោគលើដំណាំសណ្ដែកផ្កាយ ដោយសង្ឃឹមថា
ខេត្តបាត់ដំបង ៖ បន្ទាប់ពីអ្នកបច្ចេកទេសបានចំណាយពេលសិក្សាស្រាវជ្រាវអស់រយៈពេល៤ឆ្នាំ អំពីដីកសិកម្មនៅខេត្តបាត់ដំបង រួចមក ក្រុមហ៊ុនវិនិយោគថៃមួយបានសម្រេចចិត្តបោះវិនិយោគលើដំណាំសណ្ដែកផ្កាយ ដោយសង្ឃឹមថា នឹងជួយបង្កើនការងារ និងប្រាក់ចំណូលដល់ប្រជាកសិករក្នុងខេត្ត ។
លោក ឌីណា ដាណាយ ខមខាយ ឃឿន នាយកក្រុមហ៊ុន ដាណាយ ខមខាយ ខេមបូឌា ឯ.ក បានឲ្យដឹងកាលពីពេលថ្ងៃទី៧ កក្កដា ថា ការសម្រេចបោះទុនវិយោគលើទឹកដីខេត្តបាត់ដំបងទាំងការដាំដុះ និងការកែច្នៃផលិតផលសណ្ដែកផ្កាយ ដោយសារតែទឹកដីនៃខេត្តប្រវត្តិសាស្ត្រមួយនេះមានអំណោយផលខ្លាំងដល់ដំណាំកសិកម្មគ្រប់ប្រភេទ ហើយថែមទាំងមានបរិយាកាសល្អប្រសើរទៀតផង ។
លោកគិតថា ដីកសិកម្មនៅខេត្តនេះសកិ្តសមនឹងដំណាំសណ្ដែកផ្កាយ និងសមស្របបំផុតជាមួយពលរដ្ឋក្នុងខេត្តនេះ ។ ដូច្នេះការសម្រេចចិត្តដាក់ទុនវិនិយោគនាពេលនេះ គឺជារឿងល្អបំផុត ថែមទាំងជួយបង្កើនការងារ និងបង្កើនចំណូលដល់ពលរដ្ឋទៀតផង ។
លោក មិន លីហួរ អគ្គនាយកក្រុមហ៊ុន អិម អិល អេច ត្រេឌីង ដែលបានសហការជាមួយក្រុមហ៊ុនខាងលើ បានពន្យល់ថា សណ្ដែកផ្កាយ ឬផលិតផលដែលផលិតចេញពីសណ្ដែកផ្កាយ គឺវាមានអត្ថប្រយោជន៍ជាច្រើន សម្រាប់ជួយដល់សុខភាពមនុស្ស ។ លោកបញ្ជាក់ថា ៖«ប្រេងសណ្ដែកផ្កាយប្រៀបដូចជាឱសថធម្មជាតិ ដែលអាចព្យាបាលជំងឺបានច្រើនយ៉ាង និងជួយព្យាបាលមុខរបួសយ៉ាងមានប្រសិទ្ធភាពបំផុត » ។
ដោយបានគិតគូរបំផុតពីសុខភាពរបស់មនុស្សជាតិ ជួយបង្កើនការងារដល់ពលរដ្ឋ និងជួយកាត់បន្ថយលំហូរប្រាក់ចេញទៅក្រៅប្រទេស តាមរយៈការជ្រើសរើសយកសេវាថែទាំសុខភាពនៅក្រៅប្រទេសរបស់ពលរដ្ឋកម្ពុជា ទើបក្រុមហ៊ុនលោកបានសហការដើម្បីអភិវឌ្ឍន៍ និងកែច្នៃផលិតនេះសម្រាប់បម្រើឲ្យសុខភាពពលរដ្ឋ ។
លោក ច័ន្ទ សុផល អភិបាលខេត្តបាត់ដំបង បានចាប់អារម្មណ៍យ៉ាងខ្លាំងនូវគម្រោងដែលបានដាក់វិនិយោគលើដំណាំនេះនៅក្នុងកម្ពុជា ពិសេសការជ្រើសរើសយកទឹកដីខេត្តបាត់ដំបង ជាទីតាំងប្រមូលផ្ដុំទាំងការដាំដុះនិងផលិត ។
លោកថ្លែងថា ៖« នេះជាការសម្រេចចិត្តដ៏ត្រឹមត្រូវរបស់ក្រុមហ៊ុន ដោយហេតុថាទី១ដីមានជីវជាតិសម្រាប់ដំណាំកសិកម្ម និងទី២ ខេត្តបាត់ដំបងបច្ចុប្បន្ន ជាខេត្តដែលសម្បូរប្រភពទឹកសម្រាប់ស្រោចស្រប ដែលរាជរដ្ឋាភិបាលបានប្រឹងប្រែងបង្កើតឡើង និងប្រព័ន្ធស្រោចស្រពស្ទើរគ្រប់ទីកន្លែង »។
លោកអភិបាលខេត្តបញ្ជាក់ថា បើតាមគម្រោងរបស់ក្រុមហ៊ុនដែលបានលើកឡើង គឺក្រៅពីកែច្នៃផលិតសណ្ដែកផ្កាយឱ្យទៅជាឱសថសម្រាប់ថែទាំសុខភាព ឬផលិតផលផ្សេងៗ ហើយ ក្រុមហ៊ុននេះក៏អាចជួយបង្កើនការងារដល់ពលរដ្ឋបានមួយផ្នែកធំដែរ តាមរយៈការជំរុញឱ្យកសិករដាំដំណាំសណ្ដែកផ្កាយនេះ ដើម្បីលក់ឱ្យក្រុមហ៊ុនវិញ ។
បើតាមលោក ឌីណា ដាណាយ ខមខាយ ឃឿន បានបញ្ជាក់ថា បន្ទាប់ពីដំណើរការ ក្រុមហ៊ុននឹងជំរុញឱ្យកសិករដាំដំណាំសណ្ដែកផ្កាយនេះ ដោយក្រុមហ៊ុននឹងមានអ្នកបច្ចេកទេសចុះជួយណែនាំដោយផ្ទាល់ ទាំងបច្ចេកទេសដាំដុះ និងការថែទាំ ។
លោកអះអាងថា ៖« ក្រោយពីដាំបានផលហើយ ក្រុមហ៊ុនធានាទទួលទិញពីកសិករទៅតាមតម្លៃទីផ្សារយ៉ាងសមរម្យ ហើយខ្ញុំសង្ឃឹមថា តាមរយៈការវិនិយោគនេះ អាចជួយឱ្យជីវភាពរបស់ពលរដ្ឋមួយចំនួនក្នុងខេត្តបាត់ដំបងកាន់តែប្រសើរឡើង ដែលជាផ្នែកមួយជួយកាត់បន្ថយភាពក្រីក្រ ស្របទៅតាមគោលនយោបាលរបស់រាជរដ្ឋាភិបាលកម្ពុជា » ៕
ចែករំលែកព័តមាននេះ