ព្រះសង្ឃ៣០០អង្គ និមន្តគោចរបិណ្ឌបាតក្នុងពេលថ្ងៃចូលព្រះវស្សា
ខេត្តកំពង់ចាម ៖ បុណ្យអាសាទ្ប្ហបូជា និងបុណ្យចូលវស្សា នៅព្រឹកថ្ងៃទី០៩ កក្កដា ២០១៧ គេឃើញព្រះសង្ឃនិមន្តមកពីតាមបណ្តាវត្តនានាក្នុងនោះដូចជា
ខេត្តកំពង់ចាម ៖ បុណ្យអាសាទ្ប្ហបូជា និងបុណ្យចូលវស្សា នៅព្រឹកថ្ងៃទី០៩ កក្កដា ២០១៧ គេឃើញព្រះសង្ឃនិមន្តមកពីតាមបណ្តាវត្តនានាក្នុងនោះដូចជា វត្តបឹងកុក វត្តដីដុះ វត្តបឹងស្នាយ វត្តនគរបាជ័យក្រៅ-ក្នុង ចំនួន៣០០អង្គ។ បាននិមន្តគោចរបិណ្ឌបាតក្នុងក្រុងកំពង់ចាម ជាថ្ងៃបវារណាចូលព្រះវស្សា ជាមួយនោះមានពលរដ្ឋជាច្រើននាំគ្នាដាក់ចង្ហាន់ និងបួងសួងសុំសេចក្តីសុខ ក្នុងគ្រួសារក៏ដូចជាប្រទេសជាតិទាំងមូលបន្តមានសុខសន្តិភាព ព្រមទាំងមានការរីកចម្រើនផងដែរ។
អ្នកស្រី យក់ សុធា អាយុ៥១ឆ្នាំ នៅភូមិបឹងកុកទី២ សង្កាត់បឹងកុក ក្រុងកំពង់ចាម ប្រាប់ឲ្យដឹងថា ជីដូនជីតារបស់គាត់ដែលជាអ្នកកាន់នៅព្រះពុទ្ធសាសនា រហូតមកដល់រូបគាត់នូវតែជំនឿដដែលដោយមិនងាករេនោះទេ ហើយរាល់ថ្ងៃនេះ ថែមទាំងកាន់សិល្ប៍៨ផងដែរ។ សម្រាប់នៅព្រឹកថ្ងៃខាងលើក្រុមគ្រួសារកូនៗ និងប្តីបានដាំបាយព្រមទាំងនំនែក ទឹកបរិសុទ្ធ ដោយបច្ច័យមួយចំនួនប្រគេនដល់ព្រះសង្ឃដែលនិមន្តបិណ្ឌបាតតាមមុខផ្ទះនោះ។ អ្នកស្រី យក់ សុធា ប្រាប់បន្តឲ្យដឹងថា គាត់មានសេចក្តីរីករាយជ្រះថ្លានឹងព្រះពុទ្ធសាសនា ក្រោយពីដាក់បាតចប់នោះគាត់នឹងត្រូវយកចង្ហាន់១ស្រាក់ ទៅប្រគេនព្រះសង្ឃដែលគង់នៅវត្តបឹងកុកបន្តទៀតហើយក៏សូមបួងសួងសុំសេចក្តីសុខ ក្នុងគ្រួសាររបស់គាត់ធ្វើយ៉ាងណាក្នុងពេលខាងមុខសូមឲ្យបានជួបព្រះពិត។
ម្យ៉ាងទៀតក៏សូមប្រាថ្នាឲ្យថ្នាក់ដឹកនាំប្រទេសកម្ពុជា ត្រូវចេះសាមគ្គីគ្នាដើម្បីអភិវឌ្ឈប្រទេសជាតិឲ្យមានការរីកចម្រើនគ្រប់វិស័យ និងមានសន្តិភាពរៀងរហូតផងដែរ។ ព្រះចៅអធិការវត្តបឹងកុក ព្រះនាមភិក្ខុឋានវុឌ្ឈោ ខាន់ ខាត់ មានថេរដីកាឲ្យដឹងដែរថា ពិធីបុណ្យអាសាទ្ប្ហបូជា និងបុណ្យព្រះវស្សានេះធ្វើឡើង ដើម្បីរំលឹកដល់ថ្ងៃយាងចុះបដិសន្ធិ យាងចេញសាងព្រះផ្នួស សម្តែងធម្មចក្កប្បវត្តនសូត្រ កំណើតព្រះរតនត្រៃគ្រប់បរិបូរណ៍ សម្តែងយមកប្បាដិហារ្យ និងថ្ងៃបវារណាចូលព្រះវស្សា។ ព្រះភិក្ខុ ខាន់ ខាត់ ចៅអធិការវត្តបឹងកុក មានថេរដីកាបន្តថា បុណ្យនេះដើម្បីជាការឆ្លុះបញ្ចាំងដែលជាថ្ងៃបដិសន្ធិដូច្នេះមាតាបិតាត្រូវចេះថែរក្សាបុត្រក្នុងផ្ទៃ ដែលធ្វើយ៉ាងណាប្តីត្រូវចេះថែរក្សាប្រពន្ធឲ្យមានសុខភាពល្អទាំងម្តាយ និងកូនក្នុងផ្ទៃនោះ។
ហើយក៏សូមឲ្យញាតិញោមទាំងអស់ ត្រូវមានភក្តីភាពស្មោះត្រង់ប្តីប្រពន្ធផងដែរ ។ តាមរយៈការបិណ្ឌបាតដែលមានព្រះសង្ឃចំនួន៣០០អង្គ សម្រាប់បច្ច័យ និងរបស់របរដែលបានមកនេះ គឺទុកក្នុងឃ្លាំងសម្រាប់ផ្តត់ផ្គង់ដល់ព្រះសង្ឃ ដែលគង់តាមវត្ត ការរៀនព្រះធម៌ដើម្បីបន្តនៅថ្នាក់ឧត្តមសិក្សាវត្តជ្រោយថ្ម ស្ថិតនៅក្នុងក្រុងកំពង់ចាម សំដៅឲ្យព្រះពុទ្ធសាសនាមានការរីកចម្រើន៕
ចែករំលែកព័តមាននេះ