រាជធានីភ្នំពេញ ៖ ការប្រកាសឲ្យអនុវត្តពន្ធអាករលើតម្លៃបន្ថែមទៅលើសេវាមូលដ្ឋានខាងហិរញ្ញវត្ថុកាលពីប៉ុន្មានខែថ្មីៗនេះបានក្លាយជាប្រធានបទក្ដៅមួយសម្រាប់សាធារណជនពិសេសគ្រឹះស្ថានហិរញ្ញវត្ថុនានាដែលកំពុង បម្រើសេវាហិរញ្ញវត្ថុរបស់ខ្លួនដល់ប្រជាពលរដ្ឋនៅទូទាំងប្រទេស ព្រោះថា ប្រសិនបើចាប់ផ្ដើមអនុវត្តមែននោះ ពួកគាត់យល់ថា កាន់តែបន្ថែមបន្ទុកដល់អ្នកប្រើប្រាស់ ពិសេសគឺប្រជាពលរដ្ឋ។ដោយសារតែមានការលើកឡើងបែបនេះ កាលពីថ្ងៃទី៦ កក្កដា ឆ្នាំ២០១៧ អគ្គនាយកដ្ឋានពន្ធដារក៏បានចេញសេចក្ដីជូនដំណឹងភ្លាមៗមួយ ដោយបានព្យួរការអនុវត្តសេវាជាមូលដ្ឋានខាងហិរញ្ញវត្ថុនេះជាបណ្ដោះអាសន្នសិន រង់ចាំរហូតដល់មានការជូនដំណឹងជាថ្មី ស្របពេលដែលសមាគមគ្រឹះស្ថានហិរញ្ញវត្ថុ គ្រោងជួបដើម្បីពិភាក្សាស្វែងរកដំណោះស្រាយសមស្របមួយ ។
ប្រធានក្រុមប្រឹក្សាភិបាលសមាគមគ្រឹះស្ថានមីក្រូហិរញ្ញវត្ថុ លោកឧកញ៉ា ហួត អេងតុង បានថ្លែងតាមទូរស័ព្ទនារសៀលថ្ងៃទី៧ កក្កដា ម្សិលមិញថា ការអនុវត្តពន្ធអាករលើតម្លៃបន្ថែម ជាកាតព្វកិច្ចរបស់ពលរដ្ឋត្រូវបង់ជូនរដ្ឋ ដែលបានអនុវត្តរួចមកហើយទៅលើពន្ធអាករផ្សេងៗ ប៉ុន្ដែពន្ធអាករលើតម្លៃបន្ថែមសម្រាប់សេវាជាមូលដ្ឋានខាងហិរញ្ញវត្ថុ គឺជារឿងថ្មី ដែលត្រូវជជែកគ្នា ។
លោកឧកញ៉ាថ្លែងថា ៖« ពន្ធអាករលើតម្លៃបន្ថែមនេះ មិនមែនជារឿងថ្មីរបស់គ្រឹះស្ថានមីក្រូហិរញ្ញវត្ថុ ឬធនាគារទេ គឺយើងបានអនុវត្ត និងបង់ពន្ធជូនរដ្ឋយូរមកហើយ ព្រោះវាជាកាតព្វកិច្ចដែលត្រូវបង់ពន្ធជូនរាជរដ្ឋាភិបាល ប៉ុន្ដែរឿងថ្មីៗនេះ គឺពន្ធអាករបន្ថែមទៅលើកម្រៃសេវាកម្មហិរញ្ញវត្ថុ ដែលបានប្រកាសឲ្យអនុវត្តកាលពីពេលថ្មីៗនេះ » ។ លោកឧកញ៉ាថា ៖«ប្រសិនបើចាប់ផ្ដើមអនុវត្ត វាអាចធ្វើឲ្យប៉ះពាល់ដល់ប្រជាពលរដ្ឋ ព្រោះពួកគាត់ត្រូវបង់កម្រៃបន្ថែមច្រើនទៅលើសេវាកម្មហិរញ្ញវត្ថុដំបូងនេះ » ។
យោងតាមប្រកាស ស្ដីពីការណែនាំឲ្យអនុវត្តអាករលើតម្លៃបន្ថែមចំពោះការផ្គត់ផ្គង់មិនជាប់អាកររបស់ក្រសួងសេដ្ឋកិច្ច និងហិរញ្ញវត្ថុ កាលពីថ្ងៃទី២៥ ឧសភា ឆ្នាំ២០១៧ បានសម្រេចឲ្យស្ថាប័ន អង្គភាពដែលពាក់ព័ន្ធក្រោមឱវាទក្រសួងសេដ្ឋកិច្ច និងហិរញ្ញវត្ថុ ត្រូវអនុវត្តឲ្យមានប្រសិទ្ធភាព ស្របតាមមាត្រា៥៧នៃច្បាប់ស្ដីពីសារពើពន្ធ ដែលត្រូវបានធ្វើវិសោធនកម្មដោយច្បាប់ស្ដីពីហិរញ្ញវត្ថុសម្រាប់គ្រប់គ្រងឆ្នាំ២០១៧ ។
ក្នុងប្រកាសនោះមានកំណត់និយមន័យនៃពាក្យមួយចំនួនរួមទាំងពាក្យ «សេវាជាមូលដ្ឋានខាងហិរញ្ញវត្ថុ» ហើយត្រូវបានអង្គភាពឯកជន និងសារព័ត៌មានមួយចំនួនយកទៅបកស្រាយពុំបានត្រឹមត្រូវ នាំឲ្យមានការភ័ន្ដច្រឡំពីសំណាក់សាធារណជនថា រាជរដ្ឋាភិបាលទើបនឹងអនុវត្តអាករលើតម្លៃបន្ថែមទៅលើសេវាហិរញ្ញវត្ថុ ។
អគ្គនាយកដ្ឋានពន្ធដារបញ្ជាក់ថា អាករលើតម្លៃបន្ថែម ត្រូវបានដាក់ឲ្យអនុវត្តតាំងពីឆ្នាំ១៩៩៩មកម្ល៉េះ ។ តាមមាត្រា៥៧នៃច្បាប់ស្ដីពីសារពើពន្ធ បានចែងអំពីការផ្គត់ផ្គង់មិនជាប់អាករ ដែលក្នុងនោះមានសេវាមួយចំនួន រួមទាំងសេវាជាមូលដ្ឋានខាងហិរញ្ញវត្ថុផងដែរ ។ ដូចនេះការចេញប្រកាសលេខ៥៥៩ សហវ.ប្រក គឺគ្រាន់តែកំណត់ឲ្យបានច្បាស់លាស់នូវនិយមន័យនៃសេវាជាមូលដ្ឋានខាងហិរញ្ញវត្ថុ ដើម្បីពង្រឹងសង្គតិភាពក្នុងការអនុវត្តអាករលើតម្លៃបន្ថែមតែប៉ុណ្ណោះ មិនមែនជាការបង្កើត ឬដាក់ឲ្យអនុវត្តពន្ធថ្មីនោះទេ ។
« បើទោះបីជាក្រសួងសេដ្ឋកិច្ចបានប្រកាសឲ្យអនុវត្តការយកពន្ធអាករលើតម្លៃបន្ថែមទៅលើសេវាកម្មហិរញ្ញវត្ថុក៏ដោយ ក៏កន្លងមក ពុំទាន់មានស្ថាប័នហិរញ្ញវត្ថុណាមួយអនុវត្តនៅឡើយ ហើយគម្រោងជួបជាមួយអគ្គនាយកដ្ឋានពន្ធដារនាពេលខាងមុខ ក្នុងគោលបំណងពិភាក្សារឿងនេះ និងបញ្ហាមួយចំនួនទៀតដែលសមាជិកសមាគមបានជួបប្រទះ គឺធ្វើយ៉ាងណាឲ្យការងារពន្ធអាករនេះកាន់តែប្រសើរឡើង »។ នេះបើតាមលោកឧកញ៉ា ហួត អេងតុង បានបញ្ជាក់ ។
ដោយឡែក ក្នុងកិច្ចពិភាក្សាមួយរវាងតំណាងគ្រឹះស្ថានហិរញ្ញវត្ថុ ជាមួយសភាពាណិជ្ជកម្មកាលពីពេលថ្មីៗនេះ លោកឧកញ៉ា លី ហួរ បានលើកឡើងថា ការប្រកាសឲ្យអនុវត្តនេះ វាហាក់ដូចជាលឿនពេក ដូច្នេះខាងធនាគារ និងមីក្រូហិរញ្ញវត្ថុ មិនអាចធ្វើបានភ្លាមៗទេ ហើយការអនុវត្តសេចក្តីប្រកាសនេះ ក៏ធ្វើឲ្យប៉ះពាល់ដល់អតិថិជនធនាគារ និងមីក្រូហិរញ្ញវត្ថុកម្ពុជាផងដែរ ។
លោកឧកញ៉ាសង្កត់ធ្ងន់ថា ៖« អ្វីដែលខាងសមាគមធនាគារ និងសមាគមមីក្រូហិរញ្ញវត្ថុចង់បាននោះ គឺចង់ឲ្យលុបសេចក្តីប្រកាសនោះចោល ដើម្បីកុំឲ្យប៉ះពាល់ដល់បន្ទុករបស់ប្រជាពលដ្ឋដែលជាអតិថិជនរបស់ធនាគារ និងមីក្រូហិរញ្ញវត្ថុថែមទៀត » ។
ពាក់ព័ន្ធនឹងការលើកឡើងនេះ ប្រធានក្រុមប្រឹក្សាភិបាលសមាគមគ្រឹះស្ថានមីក្រូហិរញ្ញវត្ថុ លោកឧកញ៉ា ហួត អេងតុង បានលើកឡើងថា ប្រសិនបើអាចលុបបាន ក៏ជាដំណោះស្រាយល្អមួយដែរ ប៉ុន្ដែលោកមិនហ៊ានអះអាងយ៉ាងណានោះទេ គឺអាស្រ័យលើការពិភាក្សាគ្នាប៉ុណ្ណោះ ។
អនុប្រធានសភាពាណិជ្ជកម្មកម្ពុជា លោកឧកញ៉ា លឹម ហេង ក៏បានអំពាវនាវឲ្យរាជរដ្ឋាភិបាល គួរពិភាក្សាឬជួបជាមួយវិស័យឯកជនជាមុនសិន ដើម្បីរកផលប្រយោជន៍រួមចំពោះជាតិទាំងមូល ជៀសវាងការដាក់បន្ទុកបន្ថែមដល់ពលរដ្ឋ ។ ជាក់ស្ដែង ការឲ្យអនុវត្តពន្ធលើតម្លៃនៃសេវាកម្មហិរញ្ញវត្ថុ(VAT)១០%នេះ មិនមែនជាបន្ទុករបស់ធនាគារ ឬមីក្រូហិរញ្ញវត្ថុទេ គឺជាបន្ទុករបស់អ្នកប្រើទៅវិញ ។
គួរបញ្ជាក់ថា សេវាជាមូលដ្ឋានខាងហិរញ្ញវត្ថុ សំដៅដល់សេវាខាងហិរញ្ញវត្ថុដែលទាញយកកម្រិតប្រាក់លម្អៀងជាប្រាក់ចំណេញរួមមាន ៖
១-ប្រតិបត្តិការទទួលប្រាក់បញ្ញើ ផ្ដល់ឥណទានឬឲ្យខ្ចីបុល ប៉ុន្ដែមិនរួមបញ្ចូលកម្រៃសេវាដែលទាក់ទិននឹងការផ្ដល់ឥណទាន ឬខ្ចីបុលទេ ។
២-ការបោះផ្សាយលក់ទីផ្សារមូលបត្រក្នុងទីផ្សារដំបូង ការជួញដូរមូលបត្រ ឬឧបករណ៍ហិរញ្ញវត្ថុដទៃទៀត, សេវាផាត់ទាត់ និងទូទាត់ក្នុងទីផ្សារមូលបត្រកម្ពុជា ។
៣-សេវាប្ដូរប្រាក់
៤-សេវាប្រាតិភោគ
៥-ការជួញដូរមាសដែលមិនទាន់កែច្នៃជាគ្រឿងអលង្ការ ៕
ចែករំលែកព័តមាននេះ