ខេត្តស្វាយរៀង៖ មានរថយន្តយីឌុប ប្រភេទវ៉េអង ដឹកទំនិញហៀរទ្រុង ប្រមាណពី ៣០តោនទៅ ៤៥តោន ជាច្រើនគ្រឿង បានលួចបើករបារ ដាក់រាំងកាត់ផ្លូវ ដើម្បីការពាររថយន្តដឹកទំនិញលើសទម្ងន់ ដោយធ្វើចរាចរណ៍លើកំណាត់ផ្លូវក្រាលកៅស៊ូ ក្នុងជនបទ ដែលទើបតែសាងសង់ មិនទាន់រួចរាល់ និងសម្ពោធដាក់ឲ្យប្រើប្រាស់ផង។ ករណីនេះ បង្កឲ្យមហាជនព្រួយបារម្ភ ខ្លាចបាក់ស្រុតខូចផ្លូវ ដែលរាជរដ្ឋាភិបាល សាងសង់ជូនប្រជាពលរដ្ឋ នៅជនបទ បានប្រើប្រាស់ និងធ្វើដំណើរងាយស្រួល។
ប្រជាពលរដ្ឋ បានសំណូមពរឲ្យអាជ្ញាធរ ចាត់វិធានការទប់ស្កាត់ក្រុមឈ្មួញ ដែលបើកបររថយន្តដឹកទំនិញធុនយក្សទាំងនេះផង។ ការអំពាវនាវនេះ កើតឡើងនៅព្រឹកថ្ងៃទី១០មករា ឆ្នាំ២០២៣ នៅភូមិអូរដូនអាម ឃុំព្រះពន្លាស្រុកកំពង់រោទិ៍។
មហាជនបានលើកឡើងថា ទោះបីមានការដាក់របា កម្រិតខ្ពស់កាត់ទទឹងផ្លូវ ដើម្បីទប់ស្តាត់រថយន្តដឹកលើសទម្ងន់ និងកម្ពស់ ព្រមទាំងទប់ស្កាត់រថយន្ត និងយានយន្តកែច្នៃខុសទំហំកំណត់យ៉ាងណាក៏ដោយ ក៏នៅតែគ្មានប្រសិទ្ធភាព ក្នុងការទប់ស្កាត់នោះទេ ព្រោះអីនៅពេលមានរថយន្តធុនយក្សដឹកទំនិញពេញៗ និងហៀរទ្រុងរថយន្ត ព្រមទាំងដឹកខ្ពស់ៗ ស្ទើរដល់ចុងឈើបើកបរលើកំណាត់ផ្លូវក្រាលកៅស៊ូ និងឆ្លងកាត់របាទាំងនោះ គឺតែងតែមានអ្នកមកបើករបារដាក់ទទឹងផ្លូវ អោយរថយន្តគ្រប់ប្រភេទអស់ទាំងនោះ ដឹកតាមចិត្ត ឆ្លងកាត់ផ្លូវនោះ ដោយគ្មានខ្វល់អ្វីដដែល។
ពោលគឺមានអ្នកមកលួចបើករបាកម្រិតខ្ពស់ទប់ស្កាត់រថយន្តដឹកលើសទម្ងន់ ទោះបីមានរបារ ក៏ដូចគ្មានរបារដែរ ហើយត្រូវបានមហាជននិយាយថា ប្រហែលជាពួក alien មកពីភពផ្សេងហើយ បានជាហ៊ានធ្វើដូច្នេះ។
មហាជនបានឲ្យដឹងទៀតថា រថយន្តដែលធ្វើចរាចរណ៍នេះ កើតឡើងនៅវេលាម៉ោង ៨ និង ១០នាទីយប់ថ្ងៃទី៩ ខែមករា ឆ្នាំ២០២៣ នៅលើកំណាត់ផ្លូវក្រាលកៅស៊ូ មួយខ្សែ ដែលតភ្ជាប់ពីផ្លូវជាតិលេខ៣១៤ ត្រង់ចំណុចព្រំប្រទល់ភូមិត្របែក ឃុំប្រសូត្រ ស្រុកស្វាយទាប ឆ្ពោះមកភូមិអូរដូនអាម ឃុំព្រះពន្លា ស្រុកកំពង់រោទិ៍ ខេត្តស្វាយរៀង។
លោក សុច ពិសី អភិបាលស្រុកកំពង់រោទិ៍ បានថ្លែងអំណរគុណ ចំពោះការផ្តល់ព័ត៌មាននេះ ហើយលោកសន្យាថា នឹងប្រាប់ទៅក្រុមអ្នកធ្វើផ្លូវ ឲ្យទប់ស្កាត់។
ទាក់ទិនករណីនេះដែរ លោក នួន លីហួន ប្រធានមន្ទីរសាធារណ:ការ និងដឹកជញ្ជូន ខេត្តស្វាយរៀង ក៏បានឲ្យដឹងថា ចំពោះផ្លូវក្រាលកៅស៊ូមួយខ្សែ ដែលទើបក្រាលកៅស៊ូមិនទាន់រួចរាល់នេះ គឺជារបស់ខាងមន្ទីរអភិវឌ្ឍន៍ជនបទខេត្ត ជាអ្នកគ្រប់គ្រង មិនពាក់ព័ន្ធនឹងមន្ទីរសាធារណ:ការទេ។
បើតាមប្រជាពលរដ្ឋ រស់នៅជិតតំបន់នោះ បានលើកឡើងថា តើគេដាក់របានេះធ្វើអី? បើដាក់របាហើយ នៅពេលដែលមានរថយន្តដឹកទំនិញធំៗខ្ពស់ៗមកដល់ទីនេះ តែងតែមានអ្នកមកចាំបើករបាអោយដូច្នេះ មិនបាច់ដាក់វា ប្រសើរជាង។
ប្រភពដដែលបានបន្តទៀតថា ជារៀងរាល់យប់ មានរថយន្តដឹកទំនិញធុនយក្សធំៗ ដឹកទំនិញខ្ពស់ៗ ធ្វើចរាចរណ៍ឆ្ពោះទៅកាន់ច្រករបៀងសំយ៉ោងនៃប៉ុស្តិ៍វរៈការពារព្រំដែនសំយ៉ោង ឆ្លងកាត់ផ្លូវក្រាលកៅស៊ូមួយខ្សែនេះ គឺតែងតែមានអ្នកមកបើករបាការពាររថយន្តដឹកលើសទម្ងន់នេះ អោយរថយន្តទាំងនោះ បើកទៅយ៉ាងរលូន ដោយគ្មានគិតពីផលប៉ះពាល់ដល់ការបាក់ស្រុតខូចផ្លូវថ្នល់ ដែលកំពុងធ្វើ មិនទាន់ហើយនេះទេ។
សូមរម្លឹកថា លិខិតរបស់រដ្ឋបាលខេត្តស្វាយរៀង លេខ៥៧៨/២២លស ចុះថ្ងៃ៨ ខែធ្នូ ឆ្នាំ២០២២ បានជម្រាបជូនលោកអភិបាលស្រុកស្វាយជ្រំ – លោកអភិបាលស្រុករំដួល – លោកអភិបាលស្រុកកំពង់រោទិ៍ ក្នុងកម្មវត្ថុ ស្ដីពី ការសម្របសម្រួលកិច្ចសហការគ្រប់គ្រងរបារកម្រិតកម្ពស់កាត់ទទឹងផ្លូវ ដើម្បីទប់ស្កាត់រថយន្ត ដឹកលើសទម្ងន់ និងយានយន្តកែច្នៃខុសទំហំកំណត់បើកបរនៅលើផ្លូវជនបទ។ លិខិតរបស់រដ្ឋបាលខេត្តនេះ បានធ្វើឡើងដោយយោងតាមលិខិតលេខ ០១១៩/២២ ក.អ.ជ ចុះថ្ងៃទី២៥ ខែមករា ឆ្នាំ២០២២ របស់ក្រសួងអភិវឌ្ឍន៍ជនបទ។
រដ្ឋបាលខេត្តស្វាយរៀង បានជម្រាបជូនអភិបាលស្រុកថា ក្រសួងអភិវឌ្ឍន៍ជនបទ បាន និងកំពុងធ្វើការកែសម្ពផ្លូវជនបទ ពីផ្លូវក្រាលក្រួសក្រហម ទៅជាផ្លូវក្រាលកៅស៊ូ (DBST) និងបេតុង ក្រោមការគាំទ្រថវិការបស់រាជរដ្ឋាភិបាល និងធនាគារអភិវឌ្ឍន៍អាស៊ី (ADB)។ ដើម្បីធ្វើឱ្យផ្លូវប្រើប្រាស់បានយូរអង្វែង ក្រសួងអភិវឌ្ឍន៍ជនបទ នឹងសាងសង់របារកម្រិតកម្ពស់ កាត់ទទឹងផ្លូវរបស់គម្រោងកែលម្អផ្លូវជនបទ ជំហានទី៣ ក្នុងគោលបំណងទប់ស្កាត់រថយន្តធុនធ្ងន់ដឹកជញ្ជូនលើសទម្ងន់ និងយានយន្តកែច្នៃខុសទំហំកំណត់។ របារកាត់ទទឹងផ្លូវនីមួយៗ នឹងត្រូវស្ថាបនាចំនួនពីរទីតាំង គឺនៅទីតាំងដើមខ្សែផ្លូវមួយកន្លែង និងនៅចុងខ្សែផ្លូវមួយកន្លែង។
រដ្ឋបាលខេត្តស្វាយរៀង បានជម្រាបជូនអភិបាលស្រុក ត្រូវចូលរួមកិច្ចសហការ លើការងារដាក់របារកាត់ទទឹងផ្លូវ ដើម្បីទប់ស្កាត់រថយន្តធុនធ្ងន់ដឹកជញ្ជូនលើសទម្ងន់ និងយានយន្តកែច្នៃខុសទំហំកំណត់ ឆ្លងកាត់ផ្លូវលំជនបទទាំងនោះ។
ក៏ប៉ុន្តែជាក់ស្តែង បទល្មើសនៅតែកើតមាន ដោយក្រុមឈ្មួញ ប្រើមនុស្សឲ្យមកបើករបារ ដើម្បីឱ្យឡានធំៗ ដឹកទំនិញពេញហៀរ ធ្វើចរាចរណ៍យ៉ាងរំភើយ។ មហាជនឆ្ងល់ថា តើអ្នកបើកបរបារទាំងនោះ ជានរណា បានជាមានកូនសោរ អាចចាក់បើករបារបាន ដូចមន្ត្រីមន្ទីរអភិវឌ្ឍន៍ ដែលជាអ្នកថែរក្សាផ្លូវលំជនបទបែបនេះ?៕ វ៉ាន់ ប៊ុនធឿន
ចែករំលែកព័តមាននេះ