រាជធានីភ្នំពេញ៖ ក្រោយកិច្ចប្រជុំទ្វេរភាគីរវាងរដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈកម្ពុជា និងរដ្ឋមន្ត្រីក្រសួងការងារថៃ កាលពីពេលថ្មីៗនេះ ភាគីទាំងពីរបានឯកភាពគ្នា៤ចំណុចលើបញ្ហាគ្រប់គ្រងពលករខ្មែរ ដែលធ្វើការនៅក្នុងប្រទេសថៃ។
យោងតាមសេចក្តីប្រកាសរបស់ក្រសួងការងារ និងបណ្តុះបណ្តាលវិជ្ជាជីវៈ ចុះផ្សាយនៅថ្ងៃទី៧ កក្កដាបានឲ្យដឹងថា កាលពីថ្ងៃទី៦ កក្កដា លោក អ៊ិត សំហេង រដ្ឋមន្ត្រីក្រសួងការងារកម្ពុជា និងរដ្ឋមន្ត្រីក្រសួងការងារថៃ លោក ស៊ីរីឆៃ ឌីស្តាគុល បានពិភាក្សាលើកិច្ចសហប្រតិបត្តិការក្នុងការគ្រប់គ្រងកម្លាំងពលកម្ម ជាពិសេសការស្វែងរកដំណោះស្រាយក្នុងការផ្តល់ភាពស្រប់ច្បាប់ជូនពលករកម្ពុជាដែលកំពុងស្នាក់នៅ និងធ្វើការនៅប្រទេសថៃ។
ប្រភពបានឲ្យដឹងទៀតថា កិច្ចប្រជុំបានឯកភាពយោគយល់៤ចំណុច ៖
ទី១-រាជរដ្ឋាភិបាលថៃ មិនបានអនុវត្តទោសពិន័យចំពោះកនិយោជកថៃដែលបានកំពុងប្រើប្រាស់កម្លាំងពលរកកម្ពុជា ដែលគ្មានឯកសារនោះទេ «ហើយរាជរដ្ឋាភិបាលថៃក៏មិនបានបណ្តេញពលករកម្ពុជាដែលបានចូលដល់ក្នុងទឹកដីថៃ ហើយកំពុងធ្វើការជាមួយក្រុមហ៊ុន ឬរោងចក្រណាមួយនៅក្នុងប្រទេសថៃនោះដែរ»។ ក្រសួងការងារថៃនឹងផ្តល់ឱកាសចំនួន១៥ថ្ងៃ (ចាប់ពីថ្ងៃទី២៤ ខែកក្កដាដល់ថ្ងៃទី៧ ខែសីហា ឆ្នាំ២០១៧) ដល់កម្ពុជានិងនិយោជកថៃ ដែលមិនទាន់មានឯកសារអ្វីទាំងអស់ឲ្យទៅចុះឈ្មោះនៅតាមការិយាយល័យចុះបញ្ជើពលករបរទេស។ ក្រសួងការងារថៃនឹងបើកការរិយាល័យចុះឈ្មោះពលករបរទេសចំនួន១០កន្លែង១០កន្លែងនៅក្នុងទីក្រុងបាំងកកនិងចំនួន១កន្លែងនៅក្នុងខេត្តនីមួយៗនៃប្រទេសថៃ។
ទី២-ក្រសួងការងារថៃបានឯកភាពតាមការស្នើសុំរបស់ភាគីកម្ពុជា ដោយអនុញ្ញាតដល់ពលករកម្ពុជា ដែលមានលិខិតឆ្លងដែន/ លិខិតធ្វើដំណើរឬប័ណ្ណដំណើរ ឬប័ណ្ណពណ៌ស៊ីជម្ពូស្របច្បាប់ពេលដំបូង ប៉ុន្តែក្រោយមកបានផ្លាស់ប្តូរនិយោជកដោយខុសនីតីវិធី ហើយក្លាយទៅជាពលករខុសច្បាប់ អាចមកចុះបញ្ជីជាមួយមន្ទីរការងារថៃ ដើម្បីបំពេញឯកសារដើម្បីក្លាយទៅជាពលករស្របច្បាប់វិញ។
ទី៣-ភាគីថៃបានឯកភាពតាមសំណើររបស់កម្ពុជាក្នុងការរៀបចំយុទ្ធនាការ១០០ថ្ងៃ បើកផ្តល់លិខិតឆ្លងដែន/លិខិតធ្វើដំណើរ និងប័ណ្ណ OCWC ដល់ពលករកម្ពុជាឲ្យបានចំនួន១៦ម៉ឺននាក់ ដែលបានធ្វើការបញ្ជាក់អត្តសញ្ញាណជាមួយគណៈកម្មការផ្តល់ភាពស្របច្បាប់រួចហើយនាពេលកន្លងមក ទោះបីជាពលករបានធ្វើការផ្លាស់ប្តូរនិងយោជក ឬក្រុមហ៊ុនខុសពីក្នុងឯកសារដើមក៏ដោយ។
យុទ្ធនាកានេះនឹងចាប់ផ្តើមពីថ្ងៃទី០១ សីហា ឆ្នាំ២០១៧នេះ ដោយគណៈកម្មការនឹងបញ្ជូនក្រុមចល័តចំនួន៤ក្រុមបន្ថែមទៀត ដើម្បីចុះបើកផ្លូវតាមរោងចក្រធំៗទាំង២០០រោងចក្រ ដែលមានប្រើប្រាស់ពលករកម្ពុជា លើសពី៧០នាក់។ កម្រៃសេវាផ្លូវការក្នុងការបើកផ្តល់សំណុំឯកសារដែលភាគីថៃ និងកម្ពុជាបានឯកភាពគ្នាគឺ៩៥០បាត។
ទី៤-ភាគីថៃក៏បានឯកភាពតាមសំណើររបស់កម្ពុជាក្នុងការរៀបចំ យុទ្ធនាការ១ទៀត គឺ យុទ្ធនាការបញ្ជាក់អត្តសញ្ញាណពលករកម្ពុជា ដែលមិនទាន់មាន លិខិតធ្វើដំណើរនិងប័ណ្ណ OCWC ដើម្បីយកទៅសុខភាពស្របច្បាប់ពីអាជ្ញាធរថៃ ដោយកំណត់យកការបញ្ជាក់អត្តសញ្ញាណពលករ និងផ្តល់ឯកសារ ជូនពលករនៅក្នុងថ្ងៃតែមួយ ហើយពលករអាចទៅសុំទិដ្ឋការស្នាក់នៅ (Stay Permit) និងទិដ្ឋាការការងារ (Work Permit) ពីភាគីថៃនៅកន្លែងតែមួយតែម្តង។ យុទ្ធនាការនេះ នឹងចាប់ផ្តើមក្នុងសប្តាហ៍ទី១នៃខែសីហា ឆ្នាំ២០១៧ ដោយមានក្រុមការងារចំនួន២០ក្រុមបន្ថែមទៀត ហើយផ្តើមចេញពីពលករផ្នែកនេសាទក្នុងខេត្តរាក់យ៉ង និងផ្នែកឬខេត្តផ្សេងទៀតជាបន្តបន្ទាប់។ កម្រៃសេវាផ្លូវការក្នុងការធ្វើ និងបើកផ្តល់សំណុំឯកសារក្នុងថៃតែមួយដែលភាគីថៃនិងកម្ពុជាបានឯកភាពគ្នា គឺ២៣៥០បាត៕
ចែករំលែកព័តមាននេះ