ខេត្តកំពង់ស្ពឺ ៖ បុរសម្នាក់បានរងរបួសជាទម្ងន់ ដោយសារតែជជែកគ្នានពីរឿងបែរមុខទៅទិសខាងណាយកឈ្មះចាញ់រៀងៗខ្លួន ជាមួយជនដៃដល់ ។ ក្រោយរងនូវការវាយនឹងខ្នងពូថៅរបស់គូបដិបក្ខរួចមក ជនរងគ្រោះត្រូវបានសាច់ញាតិបញ្ជូនទៅសង្គ្រោះភ្លាមផងដែរ ចំណែកជនដៃដល់ក្រោយបង្កបានដាក់មេប្រូចបាត់ ។
មន្ត្រីនគរបាលស្រុកភ្នំស្រួច បានប្រាប់នៅព្រឹកថ្ងៃទី០៧ ខែកក្កដា ឆ្នាំ២០១៦៧ ថាករណីហិង្សានេះ កើតឡើងកាលវេលាម៉ោង១១និង៣៩នាទី ថ្ងៃទី០៦ ខែកក្កដា ឆ្នាំ២០១៧ នៅចំណុចភូមិក្រាំងចចាត ឃុំមហាសាំង ស្រុកភ្នំស្រួច ខេត្តកំពង់ស្ពឺ ។ ជនរងគ្រោះឈ្មោះ ចាន់ ឆាំ ភេទប្រុស អាយុ៤៨ឆ្នាំ នៅភូមិត្រពាំងក្រឡាញ់ ឃុំមហាសាំង ស្រុកភ្នំស្រួច ។ ឬឯជនដៃដល់ឈ្មោះ ស៊ុន ចាន់ដា ភេទប្រុស អាយុ៣៦ឆ្នាំ រស់នៅកន្លែងកើតហេតុខាងលើ ។
មន្ត្រីដដែលបន្តថា តាមការសាកសួរ និងឆ្លើយបំភ្លឺរបស់ម្ចាស់ផ្ទះ (បងជនរងគ្រោះ) បានឲ្យដឹងថា មុនពេលកើតហេតុ ជនរងគ្រោះឈ្មោះ ចាន់ ឆាំ បានមកលេងផ្ទះរបស់ខ្លួនជាបង (ឈ្មោះ ចាន់ ឃន អាយុ៥១ឆ្នាំ) ពេលនោះក៏មានឈ្មោះ ស៊ុន ចាន់ដា ជនដៃដល់នៅអង្គុយទីនោះដែរ ។ ពេលអង្គុយលេងអ្នកទាំង២ (ជនដៃដល់ និងជនរងគ្រោះ) ក៏បានជជែកគ្នាពីរឿងព្រះបែរមុខទៅទិសខាងណា ដោយប្អូនរបស់ខ្លួនថាបែរទៅលិច ហើយជនដៃដល់ថាបែរទៅកើត ។ ការជជែកគ្នាកាន់តែតឹងសរសៃ ហើយដំឡើងសំឡេងដាក់គ្នាកាន់តែលឺឡើងៗ ពេលជជែកគ្នាបានមួយសន្ទុះ ស្រាប់តែឈ្មោះ ស៊ុន ចាន់ដា (ជនដៃដល់) មានការខឹងសម្បារជាខ្លាំង ក៏បានយកពូថៅរបស់ខ្លួន ដែលទុកនៅក្រោមគ្រែមកវាយប្អូនប្រុសរបស់ខ្លួនឈ្មោះ ចាន់ ឆាំ ចំនួន០២ពូថៅ (វាយនឹងខ្នងពូថៅ) បណ្តាលឲ្យរងរបួសធ្ងន់ ដេកដួលនៅក្បែរគ្រែ ក្រោយពេលវាយរួច ជនដៃដល់ឈ្មោះ ស៊ុន ចាន់ដា ក៏រត់គេចខ្លួនបាត់ ។ ដោយឃើញថាប្អូនរបស់ខ្លួនរងរបួសជាទម្ងន់ ខ្លួនជាបងរួមជាមួយអ្នកភូមិ បានដឹកជនរងគ្រោះយកទៅកាន់មន្ទីពេទ្យបង្អែកខេត្តកំពង់ស្ពឺ ដើម្បីឲ្យគ្រូពេទ្យសង្គ្រោះ ។
មន្ត្រីនគរបាលព្រហ្មទណ្ឌស្រុក បានបញ្ជាក់ប្រាប់ផងដែរថា ពេលនេះកម្លាំងជំនាញកំពុងតែស្រាវជ្រាវស្វែងរកចាប់ខ្លួនជនដៃដល់យកមកចាត់ការតាមច្បាប់ បើទោះជារត់ទៅដល់ណាក៏មិនឲ្យរួចខ្លួនដែរ ។ ប្រជាពលរដ្ឋនៅក្នុងភូមិ ដែលដឹងរឿងបានសម្ដែងនូវការហួសចិត្ត ចំពោះទង្វើរបស់ជនដៃដល់ថា មិនគួរណា ព្រោះតែរឿងបន្តិចបន្តួចសោះ បង្កទៅជាអំពើហិង្សាកាប់ចាក់គ្នាឲ្យមានរបួសស្នាម ហើយខ្លួនមានទោសជាប់ខ្លួនទៀត ។ នៅព្រឹកថ្ងៃទី០៧ ខែកក្កដា នេះ ជនរងគ្រោះនៅមិនទាន់ធូរស្បើយនៅឡើយទេ នេះបើតាមការបញ្ជាក់ប្រាប់របស់សមត្ថកិច្ចស្រុកភ្នំស្រួច ៕
ចែករំលែកព័តមាននេះ