រាជធានីភ្នំពេញ ៖ ក្រសួងធនធានទឹក និងឧតុនិយមបានបញ្ជាក់ថាចាប់ពីថ្ងៃទី១១ ដល់១៧ ខែមករាខាងមុខនេះ នៅតំបន់មួយចំនួននឹងមានចុះត្រជាក់ដល់១៩អង្សាសេហើយអាចនឹងមានភ្លៀងធ្លាក់ក្នុងកម្រិតខ្សោយដោយអន្លើ។
យោងតាមសេចក្តីជូនដំណឹងស្ដីពីស្ថានភាពធាតុអាកាស (ចាប់ពីថ្ងៃទី១១ ដល់ថ្ងៃទី១៧ ខែមករា ឆ្នាំ២០២៣ របស់ក្រសួងធនធានទឹក នៅថ្ងៃទី១០ មករា បានឲ្យដឹងថា ព្រះរាជាណាចក្រកម្ពុជាទទួលឥទ្ធិពលពីទ្រនុងសម្ពាធខ្ពស់(ចិន) និងខ្យល់មូសុងឦសាន្តក្នុងកម្រិតពីខ្សោយទៅមធ្យម។
ក្រសួងបានលើកឡើងថា ស្ថានភាពបែបនេះនឹងធ្វើឲ្យតំបន់ទំនាបក ណ្តាលរបស់កម្ពុជាមានសីតុណ្ហភាពអប្បបរមាមានពី២២-២៤ អង្សាសេ និងសីតុណ្ហភាពអតិបរមាមានពី៣០-៣២ អង្សាសេនឹងអាចមានភ្លៀងធ្លាក់ខ្សោយដោយអន្លើ។
ចំណែកតំបន់ខ្ពង់រាប មានសីតុណ្ហភាពអប្បបរមា មានពី ១៩-២២ អង្សាសេនិង សីតុណ្ហភាពអតិបរមា មានពី២៩-៣១ អង្សាសេនឹងអាចមានភ្លៀងធ្លាក់ខ្សោយដោយអន្លើ។ ខណ:ធាតុអាកាសអាចចុះត្រជាក់ក្នុងកម្រិតខ្សោយនាពេលព្រឹក។
ដោយឡែកនៅតំបន់មាត់សមុទ្រ មានសីតុណ្ហភាពអប្បបរមា មានពី ២២-២៤ អង្សាសេ និងសីតុណ្ហភាពអតិបរមាមានពី៣០-៣២អង្សាសេនឹងអាចមានភ្លៀងធ្លាក់ខ្សោយដោយអន្លើ៕
ចែករំលែកព័តមាននេះ