ជាមួយនឹងកំណើននៃវិស័យសំណង់ និងអចលទ្រព្យកើនស្ទុះខ្លាំងនៅប្រទេសកម្ពុជា រយៈពេលប៉ុន្មានឆ្នាំចុងក្រោយនេះ ហេតុនេះធ្វើឲ្យតម្រូវការស៊ីម៉ង់ត៍នៅលើទីផ្សារក៏មានការកើនឡើងខ្ពស់ផងដែរ។ ប៉ុន្តែអ្វីដែលគួរឲ្យកត់សំគាល់នោះគឺថាកន្លងមករាល់ការផ្គត់ផ្គង់ស៊ីម៉ង់ត៍ជាច្រើនប្រភេទនៅទីផ្សារកម្ពុជា គឺជាការនាំចូលពីបណ្តាប្រទេសនានា។
យ៉ាងណាមិញ នេះគឺជាដំណឹងល្អបំផុតសម្រាប់ទីផ្សារស៊ីម៉ង់ត៍នៅកម្ពុជា ព្រោះក្រុមហ៊ុន ជីបម៉ុង អ៊ិនស៊ី ស៊ីមេន ដែលជាក្រុមហ៊ុននាំចូលស៊ីម៉ង់ត៍ដ៏ធំនិងសំខាន់នេះបានបោះទុននូវទឹកប្រាក់ ២៦២ លានដុល្លារ បង្កើតរោងចក្រផលិតស៊ីម៉ង់ត៍អូដ្ឋដ៏ទំនើបមួយនៅ ស្រុកទូកមាស ខេត្តកំពត ហើយការសាងសង់ដែលបានចាប់ផ្តើមការដ្ឋានកាលពីចុងឆ្នាំ២០១៥ នឹងបញ្ចប់ការសាងសង់ក្នុងពេលឆាប់នេះ។ ហើយអ្វីដែលកាន់តែពិសេសនោះគឺថា ផលិតកម្មទីមួយនៃរោងចក្រស៊ីម៉ង់ត៍រំពឹងថានឹងផលិតចេញនូវផលិតផលដំបូងចុងឆ្នាំ២០១៧នេះតែម្តង។
ក្រុមហ៊ុន ជីបម៉ុង អ៊ិនស៊ី ស៊ីមេន កន្លងមកបាននាំចូលស៊ីម៉ង់ត៍អូដ្ឋដែលជាប្រភេទស៊ីម៉ង់ត៍មានគុណភាពខ្ពស់គួរជាទីទុកចិត្ត ដើម្បីយកមកបំពេញតាមត្រូវការអ្នកប្រើប្រាស់ក្នុងស្រុក ដោយយល់ឃើញថា ការប្រើប្រាស់ស៊ីម៉ង់ត៍នៅកម្ពុជាសព្វថ្ងៃក៏អាចជាចំណែកមួយនៃការលូតលាស់របស់ផលិតផលសរុបក្នុងស្រុក។
លោកឧកញ៉ា លាង ម៉េង អគ្គនាយកនៃក្រុមហ៊ុន ជីបម៉ុង គ្រុប និងជាប្រធានក្រុមប្រឹក្សាភិបាលនៃក្រុមហ៊ុន ជីបម៉ុង អ៊ិនស៊ី ស៊ីមេន បានថ្លែងថា៖ “ការវិនិយោគទុនលើកនេះ គឺមិនមែនដើម្បីតែប្រាក់ចំណេញមួយមុខទេ តែដើម្បីប្រជាពលរដ្ឋកម្ពុជាទាំងមូល”។
លោកឧកញ៉ា លាង ម៉េង បានបន្ថែមថា រោងចក្រស៊ីម៉ង់ន៍បានសាងសង់នៅទីតាំងខៀវស្រងាត់ ក្នុងទឹកដីខេត្តកំពត ជាទីកន្លែងដែលសំបូរទៅដោយវត្ថុធាតុដើមល្អៗក្នុងការផលិតស៊ីម៉ង់ត៍ ហើយក្រុមហ៊ុនក៏បានបំពាក់នូវគ្រឿងចក្រដែលមានបច្ចេកវិទ្យាធំទំនើប បូកផ្សំនឹងបុគ្គលិកដែលជាអ្នកជំនាញក្នុងការផលិតស៊ីម៉ង់ត៍នៅបរទេសមានបទពិសោធន៍ជាង៥០ឆ្នាំមកហើយនោះ ធ្វើឱ្យសង្វាក់ផលិតកម្មមួយនេះហាក់មានអាយុកាលជាច្រើនឆ្នាំទៅហើយ ទោះបីជារោងចក្រទើបតែបង្កើតឡើងថ្មីៗក៏ដោយ ព្រោះបុគ្គលិកគឺថាសុទ្ធតែជាអ្នកធ្លាប់ធ្វើការងារក្នុងការផលិតនេះ និងមានបទពិសោធន៍ខ្ពស់ច្រើនឆ្នាំមកហើយ។
លោកឧកញ៉ា លាង ម៉េង បានបន្តទៀតថា៖ “ក្រៅពីនេះ រោងចក្រស៊ីម៉ង់ត៍អូដ្ឋនឹងចូលរួមបង្កើនឱកាសការងារដល់ប្រជាពលរដ្ឋខ្មែរ ពោលគឺពួកគេអាចអភិវឌ្ឍន៍ខ្លួនពីអ្នកធ្វើស្រែចំការ មើលដំណាំ និងចិញ្ចឹមសត្វ មកជាអ្នកមានសមត្ថភាពក្នុងការបញ្ជាគ្រឿងម៉ាស៊ីន ព្រមទាំងជាឱកាសសម្រាប់ពួកគេ រៀនអភិវឌ្ឍន៍ខ្លួនឯងឱ្យទៅសង្គមមួយថ្មីផងដែរ។ ជាក់ស្តែងសូម្បីតែសិស្ស និស្សិតខ្មែរដែលកំពុងសិក្សាជំនាញទាក់ទិននឹងគ្រឿងសំណង់ ឬរោងចក្រ ក៏អាចមានឱកាសបានឃើញផ្ទាល់ពីការអនុវត្តន៍នេះផងដែរ”។
ទោះបីជាប្រទេសកម្ពុជានឹងរៀបចំការបោះឆ្នោតជ្រើសតាំងតំណាងរាស្ត្រនៅឆ្នាំ២០១៨ ខាងមុខនេះក៏ពិតមែន ក៏គណៈគ្រប់គ្រងជាន់ខ្ពស់នៃក្រុមហ៊ុនអះអាងថារឿងនយោបាយនិងការបោះឆ្នោតជាពេលខាងមុខ មិនមានផលប៉ះពាល់ដល់ការវិនិយោគរបស់ក្រុមហ៊ុនឡើយ ព្រោះប្រទេសកម្ពុជាមានសុខសន្តិភាព ហើយសេដ្ឋកិច្ចរីកលូតលាស់ដែលអំណោយផលដល់ការពង្រីកវិនិយោគនៅប្រទេសមួយនេះ។
លោកឧកញ៉ា លាង ម៉េង បានបន្ថែមថា ដោយសារប្រជាជនជាទូទៅ ក៏ដូចជារូបលោកផ្ទាល់មិនមានការភ័យខ្លាចក្នុងការរស់នៅ ប្រកបរបរចិញ្ចឹមជីវិតទើបលោកឧញ៉ា មិនមានការព្រួយបារម្ភទៅលើការបោះទុនទឹកប្រាក់លានដុល្លារនេះដែរ។ ហើយលោកឧញ៉ាជឿជាក់ថា ប្រទេសកម្ពុជានឹងនៅតែឆ្ពោះទៅរកសន្តិភាព មិនមានអ្វីជាបញ្ហាឡើយ ម្យ៉ាងសម្រាប់ការពង្រីកមុខជំនួញលើកនេះ ជាពិសេសលោកមិនដែលចាត់ទុកនរណាម្នាក់ ជាដៃគូប្រកួតប្រជែងនោះឡើយ ព្រោះសម្រាប់វិនិយោគិនទាំងអស់ “គឺជាមិត្តល្អនឹងគ្នា ដៃគូល្អនឹងគ្នា និងជាអ្នកពិភាក្សាទៅលើដំណោះស្រាយថ្មីៗដើម្បីបម្រើតម្រូវការអតិថិជន”។
ស្ថិតក្រោមប្រធានបទ «រួមគ្នាសាងសង់ដោយមោទភាព» ក្រុមហ៊ុន ជីប ម៉ុង អ៊ិនស៊ី ស៊ីមេន ជឿជាក់ថា ប្រជាជនទាំងអស់គ្នា គឺជាអ្នករួមចំណែកក្នុងការបង្កើនផលិតផលជាតិសរុបស្រុក (GDP) ដូចនេះ “យើងទាំងអស់គ្នាត្រូវរួមគ្នាក្នុងការបង្កើននូវសមិទ្ធផលដែលរឹងមាំល្អ ហើយយើងទាំងអស់គ្នានឹងមានមោទនភាពនៅក្នុងការសាងសង់”។
សូមបញ្ជាក់ថាកម្ពុជាដោយសារតែគោលការណ៍ត្រឹមត្រូវក្នុងការអភិវឌ្ឍន៍និងការទាក់ទាញការវិនិយោគ ដែលបានជួយទ្រទ្រង់កំណើនសេដ្ឋកិច្ចកម្ពុជាក្នុងរង្វង់ ៧% ក្នុងរយៈពេលជាច្រើនឆ្នាំបន្តបន្ទាប់។ តាមការព្យាករណ៍នៅឆ្នាំ២០១៧ នេះសេដ្ឋកិច្ចកម្ពុជានឹងសម្រេចបានក្នុងរង្វង់ ៧% បន្តទៀត ដែលក្នុងនេះវិស័យសំណង់លំនៅឋាន វិស័យអចលនទ្រព្យបន្តកើនឡើងគួរឲ្យកត់សំគាល់។
យោងតាមរបាយការណ៍របស់ក្រសួងដែនដី នគររូបនីយកម្ម និងសំណង់បានបង្ហាញថាទុនវិនិយោគវិស័យសំណង់និងលំនៅឋាន ៥ ខែដើមឆ្នាំ២០១៧មានកំណើនប្រមាណជាង ២០% ធៀបនឹងរយៈពេលដូចគ្នានៃឆ្នាំ២០១៦៕
ចែករំលែកព័តមាននេះ